Read anuak Aydheea 22 Bible Online

Aydheea 22 - anuak bible

Aydheea 22

¹'Ba luumma nyooth Wuuö Jwøki kiper jøøa bëëdö goor wø nyooth luup yie bee en: «?Aŋø, agïnaŋø na tägö rou ennø, ni tïme ni u bëët, u puta eth wïth uudi maal en?

²Wui, ï na pääny mo yie päŋ ki dïlweel, ni kwöŋŋö ki met ec dwøŋ yie en! Jiy moï moa thøw, ba thøw ni ge näk ko opëëllö, ni ge ba thøwa ri leny.

³Cuumme moï bëët anø bwøk na aciel, ni nø mak geni ki tøŋ ni bäŋ leny. Jiy moï bëët moa joot, amak ki tøŋ ni käl geni ni geno twöö ge bëët, këël na bëëtge ni geno bwøk ni geno nø reŋ kany mo bäär.»

⁴Kiper manøgønø aana köö, ni «Paanynyu nyeŋŋu dëëra. Weyu aani naa jwöŋa naa keeya yia. Kär pääru ki man cømmu cwïnya kiper ränynyö mana pïï dëët jø powa.»

⁵Kiper Kwäärö Wuuö Jwøk, eni na wïth jammi bëët, da dïcäŋ ma mar böök mo dwøŋ døc, ka adïma, ko okiera, mo ee cïp piny nee täge yi goor wø nyooth luup yie. Ni beeye cäŋ mo kiiri nyaa piny yie, no oduuru jwøa baŋ kïte.

⁶Jø Ilam jap leny alwørge, ni jiiŋge jïëth leny mo wø tut okwëënyi, ki jø leny mo wø këëdi ki bäät okwëënyi; ni ö jø paana cwøl ni Kir ni lwørge kööde mo leny moge.

⁷Køøre, gøli mou moa perge leth apäŋ ki jïëth leny mo wø tut okwëënyi, ni ö jø wø këëdi ki bäät okwëënyi ni cïïmge rege dhøk kiir kwöra perge leth.

⁸Køøre Wuuö Jwøk gïn wø gwøk jø Juuda apaanye bäätge. 'Ba dïcäŋeca, uuna göök ri jap leny moa en yi øda cwøl ni øt Lur Libaanø.

⁹'Ba uuni kwöra ŋammø ri kiir Pääny Deebit ajootu, ni cooŋŋu pïï mo puul mana en jï piny.

¹⁰Køøre uudi mo Jerucalem akwaannu, ni nyaau uudi møøk piny nee kiir tïïyu ni teek ki geni.

¹¹'Ba uuna tïïö ki kany cooŋ pïï yie yïthakic kiir mana näk ogeerø na ariiø kiper pï puul mana no oruuö. 'Ba uuni u kär göök ri Jwøk na tïïc gø, ni käru göök ree, eni na caar gø dïkwøŋ kany mo bäär.

¹²Kiper manøgønø, dïcäŋeca, Kwäärö Wuuö Jwøk, eni na wïth jammi bëët, uuna cwøle nou jwöŋu nou gööu ko oduuru, nee wïthu gwääru wøk, ni dwølu keece dëëtu kiper pänh cwïny maru.

¹³'Ba neennu, gïna tïïyu, maru atïmö na kanynyø ni yïthu met, nou cööbö ki dhäk ni ŋädu ki dïëk, ni cämu ki rïŋ ni mädhu ki kwøk nyïïomøki, ni kööu, ni «Cämø ni mädhø nø, kiper kanymør ø thøw diøø.»

¹⁴'Ba Wuuö Jwøk, eni na wïth jammi bëët, ree anyoodhe jïra ni kööe, ni «Ka adïëri møn, raay moa tïïyu, u ba wëënni ki geni këël mano thøwu.» Manøgø beeye dwør Kwäärö Wuuö Jwøk, eni na wïth jammi bëët.

¹⁵Man beeye dwør Kwäärö Wuuö Jwøk, eni na wïth jammi bëët, ena köö, ni «Ö maal ni ciï baŋ Cebna manøgø na no orøønyø na kare dwøŋ bäät paan dwøŋ, ni kööï jïre,

¹⁶na ‹?Aŋø, da teek jïrï kany? ?Da tuuŋu kany, ni tïme ni bwörö marï iï jiiŋŋø kany en, ni iï tïïö kany mo ena maal, ni iï tieŋø yi kïdi na kar jwöm røk jïrï?

¹⁷« ‹Neenï, Wuuö Jwøk oløny ni leeŋa ïïni wøk, ï na teek. Eni, ï di maaø ni teek,

¹⁸ni loom ïïni kaamar kuura, ni leeŋ ïïni wøk, ni päthï yi ŋöömö mo yie dwøŋ, ni putï thøø kaace, ni ö jïëth okwëënyi moï moa mïërö ni dööŋge wøk kaace, wui, ï na käl lään wïc bäät jø po kwäärö marï!› »

¹⁹«Wuuö Jwøk aköö, ‹Aani, ï käla wøk ki bäät kwär marï, ni rïëma ï wøk ki bäät køøm marï.

²⁰« ‹'Ba dïcäŋeca, dhaanhnha ma Eliekim o Kilkiya ocwøla,

²¹ni røøa abïï kwär marï dëëre, ni twöa kaw marï piere, ni puta teek kwär marï bäre cïp jïre, ni ö eni ni put tïmö na wää jiy mo wø bëëdö Jerucalem ki dhi øt Juuda.

²²Køøre aani, kulpïï mar dhi øt Deebit cïba cere, ni tïm teeki ni ena jïre, ni kany wø jap dhøk uudi, bäŋ ŋat mo cïëga ge, ni kany wø cïëk ge bäŋ ŋat mo japa ge.

²³Eni tïïa tïïö ni teek kaamar jaath mo orääö dëër øtø ni teek kany mo oŋäädhö, ni tïme na wälu mar ajiem jï dhi øt wänni.

²⁴« ‹Køøre ajiem mar dhi øt wänni bäre, ko obwöre moge, ki nyïïkwaacge, okuut dëëre, kaawat man wø lïër jap tïïc mo paac moa thenh thenh dëër jaath, teeŋ ka cäänne ki wïlle bëët.› »

²⁵'Ba Wuuö Jwøk, eni na wïth jammi bëët, mare acaane, ni kööe, «Dïcäŋeca, jaath mana no orääö ni teek kanya no oŋäädhö tïmö ni lwäägö, ni toore ni pädhe, ni ö gïïa no olïër dëëre bëët ni ränyge.» Kiper eni na Wuuö Jwøk mare ee nø caan.