Read anuak Aydheea 23 Bible Online

Aydheea 23 - anuak bible

Aydheea 23

¹'Ba luumma nyooth Wuuö Jwøki kiper Tayar bee en: Wui, baabuure mo gath mo jø Tarcëc, gööu ko oduuru! Kiper Tayar araanynyi ni bäŋ øtø mo odööŋ wala kany wø maa baabuure yie; ni ö luum ränynyö mare ni wïnye yi ŋööm Caypara.

²'Ba u na jø Tayar ki jø Caydan, u na jø gath, ni wø bëëdö bäät naama dwøŋ, kïmmu! Uuna jäägö ki jiy ni ŋølge naama dwøŋ,

³ni pïïcge Ijep. Ni ö caammi moa ciek deŋ Naam Ciör, ki moa ciek deŋ Naam Nail ni duunge ki jammi jïïu, ni tïm mïëri mou na kar gath jï wïth juurre.

⁴Wui, ï na Caydan, wïïï wär lääe, ï na paana teek na en bäät naama dwøŋ. Kiper naama dwøŋ aköö jïrï, «Aana tïmö kaamar dhaagø mo lwaar kuue mo mäc lwaar kuue, mo kär pïïdhö ko obwöc cwøw wala obwöc mään.»

⁵'Ba kanyo ö luummögø noo wïnye Ijep, cwïny jø Ijep pädhö døc kiper ränynyö mar Tayar.

⁶Wui, u ni bëëdö bäät naama dwøŋ en, gööu ko oduuru, ni bwøgu ni pööthu Tarcëc, paana bäär.

⁷?Aŋø, man beeye pääny maru møn, na päŋ ki met ec, päänya no oruuö na käl ya acääŋŋe, na wara ci jiye mïëri mo kwörge bäyö baŋ gath?

⁸?Aŋa na ŋøl gïn bäät Tayar, paana cïp kwär, na näk jø gath moe kwääri ni geno wøørø ki bäät piny?

⁹Beeye Wuuö Jwøk, eni na wïth jammi bëët, na ŋøl gïnögø bäät gø, ni lää wï gø, ni raany japa mïërö bëët na tööde kiperge, ni tïïc jic gø bëët moa no owøørø nee taak bäät piny.

¹⁰Wui, jø Tarcëc, pöödhu ki dï ŋöömö maru kaamar jwïïö mar Naam Nail; kiper bäŋ gïn mo män uuni këët.

¹¹Wuuö Jwøk cere atïŋ maal bäät naama dwøŋ, ni tïïc buc nyeye mo wø bëëdö bäät gø ni jäŋŋi, ni cïpe ki dwøl ki man raany kwör gwøk røk mo Keenan.

¹²Ni kööe, ni «Wui, jø Caydan, uuna thiel piny; yïthu ba mïnni këët. Ööu maal ni bwøgu løøga Caypara; 'ba këël noo pïïyu yie thuwø, u ba jïti ki jwöm.»

¹³Wui jø Tayar, raŋŋu ŋööm jø Babiløn, jøøa dööŋ ni bäŋ kwäänge. Jø Aciria jöör leny man døny yi kiir ki gø ageerge, ni nyaage uut paan dwøŋ piny, ni raanyge gø na bäre, ni tïïcge gø nee dööŋe jï lääc paap.

¹⁴Wui, jïëth naam mo jø Tarcëc, gööu ko oduuru, kiper päänya teek na ŋääthu araanynyi.

¹⁵'Ba ki mano täge dïcäŋeca, wïc wïl ki Tayar ki cwiiri ma pïërabïriiø, ni beege cwiiri mo röömi ki nïr nyeya. 'Ba kanyo tïme na aŋuun cwiiyøgø na pïërabïriiø yøø, gïn mør otägi kiper Tayar, mo caala gïna caan yi duuda cak kiper dhaaŋŋa bëëdö na kääbi, na køp,

¹⁶ni «Kwany thoom marï ni wïri dï pääny, wui, ï na dhaaŋŋa bëëdö na kääbi, na näk wïc owïl ki gø; pwöt thoom ni tøøtï tøøtø, ni wärï ki dudi mo thööth, nee wïc cäŋ parrø ki ïïni.»

¹⁷Kaawat manøgø thuwø, kanyo tïme na aŋuun cwiiyøgø na pïërabïriiø yøø, Wuuö Jwøk Tayar oliimme. Kanyøgø Tayar odøø ri gath ki wïth juurre bëët mo mïëc piny, kaamar dhaagø ma kääbi mo gatha dëëre.

¹⁸'Ba jammi moo joode ki køør gath mare ocïp kur keerge jï Wuuö Jwøk. 'Ba jammi moøgø ba kan wala ba cïp piny ki man mëët bäätge; 'ba owëëk jiy mo wø bëëdö ni wøøra Wuuö Jwøk, nee tïmge na mo ŋeewge ki caammi mo orømø kiper dëëtge ka abïïga beyø.