Read anuak Aydheea 24 Bible Online

Aydheea 24 - anuak bible

Aydheea 24

¹Raŋŋu, Wuuö Jwøk piny jale jalø ni raany gø; ni wëëk gø niruuth, ni keeth jiy mo wø bëëdö yie.

²Ni ö ränynyö mano tägi ni tïme ni rwöpa jiy bëët, ni tïm dïlämi ni röömi ki dhaanhø jaak, ni tïm kwäärö ni röömi ki laŋŋø, ni tïm dhaagø man wø tïnynyi ni röömi ki dhaaŋ wø tïny gø, ni tïm ŋat gathi ni röömi ki ŋat ŋïëw, ni tïm ŋat wø määö baŋe ki jammi ni röömi ki ŋat wø mäyi, ni tïm ŋat wø cunni ki gwel ni da wïthge ni röömi ki ŋat wø cun gø.

³Piny niruuth bäre ni dööŋe keere, kiper luummögø caana Wuuö Jwøki.

⁴Piny 'otal kaamar bøøk jaath, ni tïme ni kïmmö. Eno tal ni kïmme ki jiy bëët moa kwörge døøŋŋø mo wø bëëdö yie.

⁵Piny atïïc jiyi ni ba waany, kiper jiy akweer ki man cääthge ki køør ciik Wuuö Jwøk, ni kärge luup moe gwøø, ni ö luumma tuut Wuuö Jwøki nee bëëde na bäre bäre ni raanyge gø.

⁶Kiper manøgønø, piny aränynyö ki køør acïën Jwøk, ni ö jø wø bëëdö bäät piny ni rømge ka ajäla manøgø. Geno thöör ajäle mo leth, ni tïme ni dööŋŋa jiy mo nøk.

⁷'Ba jer omøki 'otal, ni ö kwøk nyïïomøki ni tïme ni bäŋgø, ni ö jøøa bëëdö ni yïthge met bëët ni tïmge ni ge cooyø.

⁸Dööt anëët olïŋi, ni ö dööt jøøa cwïnyge päŋ ki met ec ni nigekïïl, ni ö dööt thøme moa met ni nigebäc.

⁹Jiy ba wär ki dudi këët bäät kwøŋ; kwøga keec otïmö ni raac ki dhøk jø omaath ge.

¹⁰Päänya no oränynyö otoor piny, ni ö jøøa dööŋ yie ni dëëtge uudi bäätge kiper jiy mo dønynya baŋge.

¹¹Ni bëët jiyi ni ge jwöŋö nyeŋ jïëthe ki cwaak køøŋø; ni ö met eci bäre ni løk ree na pänh cwïny. Met ec mar bäät piny oränynyi.

¹²Päänyögø oränynyi ni dööŋe keere, ni ö dhøk odhuule mo kiir mare ni bëëtge no otøyø piny jaak.

¹³Gïnögø tägö bäät piny dëët wïth juurre, kaawat man wø bëëde ni nyïï jaath man wø nyïïe wel na maaw diema piny ri kac, ni tïme ni dööŋŋa mo nøk; ni caala nyïïomøki mo nøk mo wø bøth ri kac.

¹⁴'Ba jiy moo dööŋ, döötge otïŋge maal, ni kwöŋge ki met ec. Geno kwöŋŋi ki jï løø kur pänh-cäŋ kiper dööŋö mar Wuuö Jwøk.

¹⁵Kiper manøgønø, u ni en jï løø kur tuul-cäŋ, jiemmu Wuuö Jwøk, ni ö uuni ni en bäät naama dwøŋ ni tïŋu nyeŋ Wuuö Jwøk maal, eni na Jwø Icriel.

¹⁶'Ba øøni, dudi owïnynyø bäät piny bäre, mo köö, na «Ajiem en jï Jwøa beer.» 'Ba aani, aana köö, «Otïmö ni leth jïra! Otïmö ni leth jïra møn! Aana ränynyö! Jø wø tïïc gïï mo reyø ki piny, ge poot bëëdö ni ge tïïya gïï mo reyø; ni ge bëëdö ni ge cäätha maal ki tïï gïï mo reyø.»

¹⁷Wui, u jø bäät piny, gïï mo di lwäärö, ki buur mo bäär, ka abïëp ena nyïmmu.

¹⁸ŋato reŋi ni ŋwieya waac gïïa leth, pätha yi buura bäär, 'ba ŋato päny wøk ki yi buura bäär omak abïëpi; kiper awëërnyeŋŋi mo maal di jabø, ni ö pinynyi ni jäŋi.

¹⁹Piny kaaŋŋø ni tïme na thäŋi, ni puti jäŋ døc.

²⁰Ni tïm pinynyi ni bøømmø kaamar dhaanhø mo omeer, ni tïme ni jäŋŋi kaamar abïla, kiper raay moe na peek bääte, ni pädhe ni ba løny ki ööny maal këët.

²¹Dïcäŋeca, Wuuö Jwøk gïïa jïge da teek maalø jääle jäälö kwöra enge yïthge maal, ni jääl nyeye mo piny bäät piny.

²²Geno cooŋ kanya ciel, kaamar jø tööc mo otwöö yi buur. Geno twöc, ni cïëk geni øt twöc ki kany mo yie bäär; køøre ge di jäälö ka ajäla mana dwøŋ.

²³Køøre dwääy wïïe olääi, ni ö cäŋŋi ni tïm waŋe ni law, kiper Wuuö Jwøk, eni na wïth jammi bëët, obëëdö na nyeya bäät Kïn Dhayan yi Jerucalem, ni ö ajiemmi mare ni nëëne jï dïbwöthe mo jiye.