Read anuak Aydheea 25 Bible Online

Aydheea 25 - anuak bible

Aydheea 25

¹Wui Wuuö Jwøk, ïïna Jwøk mara, nyeŋŋï tïŋa maal, ni pwøa nyeŋŋï; kiper ïïna tïïö ki gïï mo rëëma ec, ni beege japa caarï ya acääŋŋe na wëëgï tïïc na karge.

²Päänye araanynyï ni tïïyï ge na wïthur, ni wëëgï päänye moa no ogeerø ni teek ränynyö; ni ö mïëc juurre moa no ogeerø ni beyø ni tïmge ni bäŋgø, ni ge ba cäŋ geerrø këët na bäre bäre.

³Kiper manøgønø, wïth juurre moa teek ïïno jiemge; ni ö päänye mo wïth juurre moa no ogäy ni lwäcge ki ïïni.

⁴Kiper ïïna ŋat wø gwøk jiy moa näk bäŋ jø køny ge, ki jøøa can ni wø bëëdö ki bëëtö mo leth, ni bee ï ŋat wø gwøk dhaanhø ki gïï mo caala atuunna, ni ïïna tïpö kiper lïëth piny; kiper jam dhøk mar jøøa no ogäy caala atuunna man wø kwöt dëër kiir,

⁵ni caala lïëth piny man wø en dïtëën. Dïlweel mar wïth juurre wø wëëgï nibäc, kaaman wø ö lïëth pinynyi oŋïnynye ki tïm pøøl, ni ö dööt jøøa no ogäy ni wø wär ki dudi ni put nikïïl.

⁶Wuuö Jwøk, eni na wïth jammi bëët, tïïö ka atïya bäät kïdi man jï wïth juurre bëët mo bäät piny; 'ba atïya mano tïïe beeye køøŋ nyïïomøki mo met, ki rïŋ mo lääy mo cuu moge päŋ ki mädhi, ki køøŋ nyïïomøki mana luy na met.

⁷'Ba bäät kïdi man, eni na Wuuö Jwøk gïna leth na näk jiy bëët ee rïëbö, na bëëdö ni ree ee peerø bäät wïth juurre bëët, wääre wøk bäät jiy.

⁸Kwäärö Wuuö Jwøk thøø raanynye raanynyø na bäre, ni pooc pï nyeŋ jiy bëët, ni ö eni ni käl lään wïc wøk bäät jiye moa en bäät piny bäre; kiper luummögø caana Wuuö Jwøki.

⁹'Ba dïcäŋeca, jiy oköö, «Raŋŋu, man beeye Jwøk marø mana koorø nee ø pieme. Man beeye Wuuö Jwøk mana koorø; beerra man kanynyø ni mïn yïthø ki pïëm mare mana piem øøni ki gø.»

¹⁰Kiper Wuuö Jwøk cere ocïp bäät kïdi man, 'ba jø Möap onyøri kar bëëtö marge, kaaman wø nyør wär mo ojääbö ki juu ki pïï.

¹¹Ceŋge opeerge yi gø, kaamar ŋat kwaaŋ kany wø peer ceŋŋe kiper kwaaŋ. 'Ba Wuuö Jwøk atöör marge dwøge piny ki japa reyø bëët na tïïcge ki ceŋge.

¹²Kiiri moge moa no ogeerø ni bäyö onyaa Wuuö Jwøki piny, ni wëëk ge niruuth yïth ŋøøm, këël mano gääpge ki tør.