Read anuak Aydheea 27 Bible Online

Aydheea 27 - anuak bible

Aydheea 27

¹'Ba dïcäŋeca Wuuö Jwøk thwöl man wø rïïŋi døc ni wø cwøl ni Lëëwatan, ni beeye thwör wø bëëdö ni dëëre di meennø, di jäälö ko opëëllö mare na beth na dwøŋ na teek. Eni thwörögø na dwøŋ enø ni wø bëëdö yi naama dwøŋ di nääö.

²'Ba dïcäŋeca da duut mo di wärö na ennø, «Wärru ki duut kiper pwöth jer omøki moa no onywøl.

³Aani, a na Wuuö Jwøk, beeye noo gwøk gø. Aani, a bëëdö naa jøøya gø ki pïï cooth. Aani, a bëëdö naa koora gø ki waŋcäŋ ki wäär, nee bäŋe ŋat mo raanynya gø.

⁴Aani, a ba wëër ki gø këët. 'Ba ni näk mo da ŋat mo känna bääta ko otwel ki koodhi ni mare leny, aani, ge nyøøna piny ni puta ge waaŋ na bäre bäre.

⁵'Ba mana beerra eni, beeye ki man ö eni ni bëëde ri göök mara. Beerra man ö eni ni tïïc bëët-mëër ki aani, ni wëëk bëët-mëër manøgø bëëtö yïthakicwa ki eni.»

⁶'Ba noo tïme na yïth nïrögø, Jeekap tiere okëët piny kaamar jaath mo lweete okëët piny, ni ö eni na Icriel ni lødhe, ni ŋøøe, ni ŋweele, ni pääŋ bäät piny bäre ki nyïëdi.

⁷?Aŋø, Wuuö Jwøk jiye ajääle na bëëde, kaawat mana jääl nyïïmän moge? Wala jiye ma jø Icriel anääe na bëëde, ka teeŋ mana näk nyïïmän moge?

⁸'Ba ajäla mana tïïc Wuuö Jwøki, atïïe ni ee rømø kiper jø Icriel, ni cöör ge wøk kaawat man wø tïïc apwøyaweerø man wø kwönni ki jï løø kur tuul-cäŋ.

⁹Kiper manøgønø, gïnögø otïmö na jöö man wëën bääyö mar Jeekap ki gø; ni gïno duu wëën raay manøgø beeye kanyo ö eni noo raany kïte mo gïn wø cïp olämme bääte ni tïïc ge kaamar tør mar kïn booya; ni beeye kanyo ö jenni moa näk ege tieŋø na no ocaa ri jwøa cwøl na Acara, ki gïï wø waaŋ gïï wø jïcge ŋwääi ni met bäätge noo tïmge ni bäŋgø mo cuŋŋi këët.

¹⁰Kiper pääny mana no ogeerø ni teek adööŋ keere ni ba beet, ni wïl wïci ki gø, ni tïme kaamar dï paap, ni ö nyïïrøøe ni bëëtge ni ge cämö ki luum yie kaace, ni butge piny yie, ni camge bäät jenni moa en yie.

¹¹'Ba kanyo tal bäädi moøgø, ge di tøyø, ni ö määnni ni møøtge ge na jer maac. Kiper jiy moøgø paa jiy mo wïnyö ki luup. Kiper manøgønø, ŋata tïïc geni na jiy, cwïnye ba ware ki geni; ŋata cwääc geni, cwïnye ba cïp piny ki geni.

¹²'Ba noo tïme na dïcäŋeca, Wuuö Jwøk tägö ka ajäla mare kaawat man wø dïn beel, ni tägi ka Naam Upareeti këël mano pïïe waŋ naam mar Ijep. Wui, jø Icriel, uuno cäŋ cooŋ kanya ciel, nou käli na aciel aciel.

¹³Noo tïme na dïcäŋeca thuwø, tuuŋ di koodhø ni dwøre ena maal døc, ni ö jiyi moa no orwäänyö yi ŋööm Aciria, ki moa no okeethø yi ŋööm Ijep, ni öge ni wøørge Wuuö Jwøk bäät kïnna en kur keere yi Jerucalem.