Read anuak Aydheea 3 Bible Online

Aydheea 3 - anuak bible

Aydheea 3

¹'Ba ka adïëri møn, Kwäärö Wuuö Jwøk, eni na wïth jammi bëët, ena bäät man käl køny mare wøk ki bäät Juuda ki Jerucalem, ni beege caammi ki pïï mo wø kønyge dëëtge ki ge;

²ki cwøw leny moa teek, ki jø leny møga, ki dïŋut luup ki nyïïkuk Jwøk, ki jø adïëda ki jø døøŋŋø,

³ki kwääc lwaa pïërabïïc, ki jøøa kwörge døøŋŋø, ki jø wø cïpi ka acaare, ki jø wø nyeŋge reegø ki tïïe mo wø tïïc ki ceŋ, ki jø thïëth.

⁴Aani obwöc cwøw tïïa tïïö na kwääri bäätge, ni tïmge ni ge ena tiet obwöre mo wïthge känni.

⁵Ni tïm jiyi ni ŋati man nø watge thiele piny, ni ö ŋat atut man nø ni dïïm ŋat atut mare. Wøpe ge ööa maal bäät jø døøŋŋø, ni tïm ŋata no otaaø ni töödö bäät ŋata no owøørø.

⁶'Ba ŋati man nø ki røk nyïïmenni ki dhi øt wänni keere, dhaanhø aciel omaae ni kööe jï gø, ni «Nyie, ïïni abïï dagø jïrï; tïmï ni ïïna dïbwödhi marwa, nee paani no oränynyö en nee tïme ni ena cerï!»

⁷'Ba dïcäŋeca, ŋatøgø ojwöŋi ni dwøre ee tïŋ maal, ni kööe, ni «Aani a ba tïmö na dïkunyi maru; bäŋ cam jïra wala abïïe mo ena paara. Kär a tïïyu na dïbwödhi mar jiy.»

⁸Kiper Jerucalem onø bøømø, ni ö Juuda ni nø pädhe, kiper luup mo wø carge ki tïïe moge ge raanynya cwïny Wuuö Jwøk ki ge, ni marge ageem ki Wuuö Jwøk na näk Jwø ajiem.

⁹Gïïa reyø na tïïcge nëënö täärnyïmge, ni ge bëëdö ni ge nyøtha raay moge kaamar Cødam, ni raay moge ba maarge kan. Wui, otïmö ni leth jïge, kiper gïïa reyø na kälge bäätge!

¹⁰Caannu jï jøøa bëëtö marge beer ki man näk mo tïmö ni beer jïge, kiper yïthge omïnni ki køør tïïe moge na beyø.

¹¹Wui, otïmö ni leth jï jø raay! Ränynyö ööa bäätge! Kiper gïïa reyø na tïïcge ki ceŋge døøa wïthge.

¹²Wui, obwöre beege na thiel jiya piny, ni tïm määnni na kwääri bäätge. Wui, u na jiya! Dïbwöthe mou uuna tïïcge nou gaau wøk; uuna kälge wøk øtjöör bëënynyö.

¹³Wuuö Jwøk aö maal baŋ løøk, ni cuŋŋe nee luup jiy ŋøle.

¹⁴Ni ö Wuuö Jwøki ni täge ki løøk ki jø døøŋŋø ki dïbwöthe mo jiy moe, ni kööe, ni «Bee u ki dëëtu na raany pwöth omøki,[3] ni jammi moa twierru baŋ jøøa can ena yïth mïëri mou.

¹⁵?Tiere ŋø cøøn ni thielu jiy 'moa piny en, ni røtu täärnyïm jiy moa can ki yïth ŋøøm?» Manøgø caana Wuuö Jwøki, eni na wïth jammi bëët.

¹⁶'Ba Wuuö Jwøk aköö, ni «Mään mo Dhayan gena tïmö ni ge töödö, ni ge cäädhi ni ge ŋaya ŋutge, ni mïëdö marge di joodø nyeŋge, ni ge cäädhi ni ge kiinynya tietge, ni ge tïïya dööt oguudi moa en tietge nee wïnye.

¹⁷Kiper manøgønø, Kwäärö Wuuö Jwøk wïth mään mo Dhayan mooe mooø ki täw gwøny, ni ö Wuuö Jwøki ni wëëk jïëcge pøtø.»

¹⁸'Ba dïcäŋece, Wuuö Jwøk jap mïërö moge di raanynyø, ni beege gïï wø twöge käät-oguudi moge, ki mo wø meen wïdhi, ki jap mïërö mo wø twöö cwaak,

¹⁹ki gwet ïdhi, ko oguudi mo ceŋ, ka abïïe mo wø rïëp täärnyïm,

²⁰ka abïïe mo wø loop wïdhi, ki tiimme mo wø twöö käät-oguudi, ki gïï wø twöö pier, ki wïlle mo riie, ko opïri mo gwïëth,

²¹ki gwet lweedi mo ceŋ, ki gwel mo wø kïth um,

²²ka abïïe mo wø wödö ki ge ka ajwöm, ka abïïe moa no ocwääö ki waac lïïna, ki tare, ko opïri mo gwel,

²³ki cïläälcae mo raŋ, ka abïïe mo wø kääri ki tiet abïïe, ka abïïe mo wø meen wïc, ki waare mo ocwääö.

²⁴Ni ö mädhi moa wara wïïrge ni ŋwääö ni met ni wiilge rege ni ŋwääö no okwäk, ni ö käär kaae ni wiil ree baŋ käär thøøli, ni ö jïër moge na beyø ni tïmge na jïër mo øya piny, ni ö käär abïïe moa beyø ni wiil ree baŋ käär keece, ni ö dëëtge na mïërö na pøøth ni tïmge ni da pööc mäc.

²⁵Cwøw moge ge di nääö ko opëëllö, ni ö jø lenynyi moge moa teek ni thøwge ri leny.

²⁶Dhøk kiir mo Dhayan ge göö ko oduuru ni kïmge, ni ö Dhayan ni pï piny yïth ŋøøm jaak ni eno dööŋ keere.