Read anuak Aydheea 31 Bible Online

Aydheea 31 - anuak bible

Aydheea 31

¹Wui, otïmö ni leth jï jø oci Ijep kiper køny, ni beege jø wø kïth ŋäädhe marge bäät okwëënyi, ni wø ŋääth thööth mar jïëth leny mo wø tut okwëënyi, ni wø ŋääth teek mar jø leny mo wø këëdi ki bäät okwëënyi; 'ba geni, ge kär göök ri Jwø Icriel na en kur keere, ni kärge eni manynyø, eni na Wuuö Jwøk.

²'Ba Wuuö Jwøk thuwø, wïïe leer; eni ba døø ŋääe ki luumme mo ee caanø. Eno känni ki gïï mo leth. Eni ööa maal ni tïïc gïn mo raac dëët jø wø tïïö ki gïï mo reyø ki dëët jø wø køny geni.

³Kiper jø Ijep gena jiy, ni ge paa Jwøk, no okwëënyi moge beege lääy jaak, ni teek marge ba bëëdö na bäre bäre. 'Ba Wuuö Jwøk cere orwiee, ni ö ŋata cïp køny ni cwaany tiere, ni ö ŋata køny ni pädhe, ni ö geni bëët ni putge ränynyö na aciel.

⁴Kiper Wuuö Jwøk aköö ki aani, ni «Kaawat man wø bëëde ni ŋuu mo teek märö bäät cam mare, ni kany wø ö jø kwaathi wø cøørge dëëtge ki man cige baŋ gø na aciel, ba lwäyi ki döötge, ni ba bwøk ki dïlweel marge, aani na Wuuö Jwøk, a na wïth jammi bëët, a öö naa këëda ki jø wø bëëdö bäät Kïn Dhayan jï kuna en bäät thuur.»

⁵Kaawat man wø ö wenyø wø bëëde ni määdö maal bäät øde ni koora nyïïe, Wuuö Jwøk, eni na wïth jammi bëët, Jerucalem ogwøe. Ogwøe møn, ni piem gø, ni køny gø.

⁶Wui, u na jø Icriel, duu baŋ Wuuö Jwøk. Kiper uuna gaa wøk ni weyu eni.

⁷Kiper noo tïme na dïcäŋeca, ŋati man nø dïïu kït gïï wø lam moe moa no otïïö ki gwel-bïrö ki warkey leeŋe piny, ni beege gïïa tïïyu ki ceŋŋu ni beege raay.

⁸'Ba jø Aciria di nääö ko opëëllö mo paa mar dhaanhø, ni ö opëëllö manøgø ni paa mar dhaanhø enø ni thöör geni. Geni ge ba bøth ki thøw opëëllö manøgø, ni ö cwøw moge moa näk wøpe ni tïmge na jø tïïc mo wø mak ki teek.

⁹'Ba man beeye dwør Wuuö Jwøk, na näk maac mare ena Dhayan, ni këën maac mare man wø liel døc ena Jerucalem, ena köö, ni «Kïn gwøk røk mana teek mar jø Aciria pädhö ki køør böök, ni ö kwääri mo lwaa leny moge ni lwäcge døc kanyo neenge ŋïï mar leny.»