Read anuak Aydheea 34 Bible Online

Aydheea 34 - anuak bible

Aydheea 34

¹Wui, u na wïth juurre, ööu ni nyänhnhu kuna wïnynyu gïn; cegu ïthu, u na jiy! Beerra man ö pinynyi ki japa en yie bëët ni wïnyge gïn; beerra man ö bäät ŋøømmi ki japa en yie bëët ni cekge ïthge.

²Kiper gootø mar Wuuö Jwøk ena bäät wïth juurre bëët, ni wëër mare ena bäät jø leny bëët mo wïth juurre. Eni wïth jø bäät piny dïïre dïïrö na bäre; eni jø bäät piny wëëge 'näk.

³Ni ö dëëtge moa no othøw ni leeŋi wøk; ni ö bäät kïte ni putge nikwaar ki remge; ni ö rïŋ dëëtge moa no othøw ni ŋwääge no okwäk.

⁴'Ba gïïa en maal bëët oraanynyi, ni ö maalø ni bani kaamar warakata; ni ö jap maalli bëët thuwø ni øcge piny kaaman wø øc bøøk jer omøki piny, wala man wø øc bøøk olaammi piny.

⁵'Ba Wuuö Jwøk, kanyo thöör tïïc mare maalø, ka adïëri møn, opëëllö mare owëëk ööny piny bäät ŋööm Ëdöm ni jääl gø, ni beege jøøa näk ee nø jiiŋŋø ki man raany ge bëët.

⁶Opëëllö mare ogääbi ki remø bäre. Ree orwødhe ki dwäle, ni rwøth ree ki rem mo caala rem mo nyïï rööm ka atëëe, ki dwäle mo caala dwäle mo røgi mo nyöök rööm. Kiper Wuuö Jwøk jiy onääe yi Bödhra, kaawat man wø 'näk lääy mo wø cïp no olämme, ni tïïc 'näk mana dwøŋ døc yi ŋööm Ëdöm bäre.

⁷Jø wø caal oluuy mo jööpe moa døøŋŋø ki moa therø onäk, ni ö ŋöömö marge ni pääŋe ki remø, ni tïm tørri bäre mar ŋöömö marge ni nwaaŋ ki dwäle.

⁸Kiper da cäŋ ajäla mar Wuuö Jwøk, ki cwiir man cool kwör mar jø Dhayan yie ni kønya geni.

⁹Nyeŋ näm mo ŋööm Ëdöm otïmö na maaw mo nwaaŋ, ni tïm ŋøøm moge na teeŋ tør man wø liel; ni paac marge bäre bëëdö na maaw mo liel.

¹⁰'Ba maac manøgø obëëdö ni liel ki wäär ki dïcäŋ, ni ba løny ki bïp; ni bëët jïye ni cøøa maal ni ba cuŋ. Maac manøgø bëëdö ni ba thøw këël mano këët ri beenhnhe moo ööi bëët, ni bäŋ ŋat mo pöödhö ki yi ŋöömmögø na bäre bäre.

¹¹'Ba poge oput dööŋŋe jï olwedhe ki thëëwe, ni tïme na kar bëëtö mar tule ka agääe; ni ö Wuuö Jwøki ni put gø wëëk ränynyö, ni dööŋe na ŋöömö mo bäŋ gïrpiny yie.

¹²Dïbwöthe mo këëlla buc nyec piny otïmö ni bäŋgø yie, ni ö jiyi bëët moa kwörge døøŋŋø ni rwäänyge.

¹³'Ba koodhi otuy yïth uut koor moge moa no ogeerø ni ena maal, ni ö otwelli ko odhäŋŋe ni tucge yïth päänye moge moa no ogeerø ni teek; ni put tïmö na kar bëëtö jï othööe, na kany noor tule yie.

¹⁴'Ba lääc paap geno røømmi yie ko orude, ni tïme ni beeye kany wø bëët adëële yie ni cøøra rege. Ka adïëri møn, tïmö na kar bëëtö jï lääy mo wø cäädhi ki wäär na kany rïïge yie.

¹⁵Tule otïïö ki kwör bëëte moge yie, ni nywølge yie ki tøŋ, ni tøkge tøŋ moge, ni cooŋge nyïïge tier tïpö mar gø. Kanyøgø cøre dëëtge oputge cooŋ yi gø, ni man nø ki watge.

¹⁶Wëël Wuuö Jwøk japï ni kwaanï luup moa no ogöörö yie. Bäŋ gïrpiny aciel dëët gïïögø mo rwäänyi, ni bäŋ aciel mo bëëdö keere ni bäŋ watge. Kiper beeye Wuuö Jwøk na kööm ge, ni beeye Jwïëye na cooŋ ge.

¹⁷Wuuö Jwøk beeye na pääŋ ŋøøm jïge, ni mooc man nø ki kare, ni put tïmö na moge na bäre bäre; këël beenhnhe moge moo ööi køørge poot bëëdö yie.