Read anuak Aydheea 38 Bible Online

Aydheea 38 - anuak bible

Aydheea 38

¹'Ba ki yïth nïrögøøni, Edhekaya atïmö ni tuu ni ena um thøø. Køøre nyikuŋ Jwøk ma Aydheea wär Amöth aö baŋe ni kööe jïgø, ni «Man bee dwør Wuuö Jwøk, ena köö, ni ‹Caan dwørï, kiper ï thøw; ï ba kwøw.› »

²Kanyøgø Edhekaya nyïme aput løø ri øtø, ni läme jï Wuuö Jwøk,

³ni kööe, «Wui, Wuuö Jwøk, a kwaya ïïni, par wïïï ki mana bëëda naa caatha køørï na adïëri ki cwïnya bäre, ni tïïa ki gïï mo nëëni ni beyø ki jïrï.» Ni ö Edhekaya ni put jwöŋö døc ni yie ee keeyø.

⁴Kanyøgønø dwør Wuuö Jwøk aput ö bäät Aydheea, ni kööe,

⁵ni «Ciï ni caanï gø jï Edhekaya ni man beeye dwør Wuuö Jwøk, Jwø kwaru ma Deebit, ena köö, ni ‹Lam marï awïnynya, ni jooda pï nyeŋŋï. 'Ba aani, bäät cwiiri moï mëënna mëënnö ki cwiiri apaar kurbïïc.

⁶'Ba ïïni ki pääny man, u piema piemø cer nyeny Aciria, ni gwøa pääny man.›

⁷« ‹'Ba man otïmö na nyuudhi mano nyoodha kiperï, a na Wuuö Jwøk, mo nyootha gø ni gïna caana tïïa tïïö.

⁸Ka adïëri møn, tïpö man wø nyooth pöödhö mar caa ki bäät gïna no otïïc nyeya ma Eeyeth, tïïa tïïö nee døø ŋääe ki rumme apaar.› » Kanyøgø tïpö man wø nyooth pöödhö mar caa aput døø ŋääe ki rumme apaar.

⁹Luubö mana göör Edhekaya nyeny Juuda kanya nø jöön dëëre køør täw, beeye en:

¹⁰Aani, aana köö, ni «Kara atïmö ni cään ki thøø ni cwiiri 'moa poot nøk. Aani, aana nø mäni ki cwiic kwøw moa daa beedø.»

¹¹Aani, aana köö, ni «Wuuö Jwøk ba jooda këët møn, ni beeye Wuuö Jwøk mana ŋääa kanya bëëda naa kwøw; ni bäŋ dhaanhø mo neena këët møn røk jiy moa en bäät piny.

¹²Dëëra na näk kar bëët jwïëy 'moa, akäl, kaawat man wø ö oduŋkaara mar dïkwääc dïëk wø pudhi wøk. Jwïëy 'moa, aban kaawat man wø tïïc ŋat wø cwääö ka abïïe. Wuuö Jwøk aana ŋul wøk kaamar aŋuun waarø man wø ŋul wøk ri gïr cwääc ka abïïe. Ï na Wuuö Jwøk, ki mana täge ki dïcäŋ këël wäär, aŋuun kwøw mara atïïyï nee cuŋŋe.

¹³Aana bëëdö ni cwïnya yaa cïp piny këël amöölla; cuu 'moa bëët atøyï kaawat man wø tïïc ŋuuwi; ki mana täge ki dïcäŋ këël wäär, aŋuun kwøw mara atïïyï nee cuŋŋe.

¹⁴Aana jwöŋö kaamar ojwaak ko olwaarø, ni ö ŋurö mara ni wïnye kaamar dwør akuuru. Nyeŋŋa atal ki mana bëëda naa neeta maal. Wui, Kwäärö Wuuö Jwøk, a ena yi bëëtö mo leth; tïmï ni ïïna kunyi mara.

¹⁵«?'Ba agïne noo caana nø? Kiper Wuuö Jwøk anø cäänö ki aani, ni ö eni ki dëëre kiree ni nø tïïc mare. Aano bëëdö ni dëëra yaa dwøk piny ki yïth cwiiri 'moa bëët, kiper gïna leth na jwøra ki cwïnya.

¹⁶Wui, Kwäärö Wuuö Jwøk, jiy wø bëëdö ni kwøw ki køør køny marï, ni beeye tiere thuwø ni kwøw jwïëy 'moa en. Wui, jööt dëël mara adwøgï kare ni wëëgï a kwøw.

¹⁷Ka adïëri møn, leth bëëtö mana tägö dëëra beeye kiper naa bëënynya. Aana gwøgï ki køør mëër marï, ni kära päth yi buur ränynyö, ni ö raay 'moa bëët ni jarï ge ŋääï.

¹⁸Kiper jwïëc jiy moa en kar bëët jwïëc jøøa no othøw ï ba jiemge, ni jøøa no othøw ï ba pwøcge. Jiy mo wø ci yi buur piny, adïëri marï ba ŋääthge.

¹⁹Jiy moa kwøw beege ni wø pwøc ïïni, kaawat man tïïa dïcäŋi en. Adïëri marï caan wëëe caanø jï obwöre moge.

²⁰«Ka adïëri møn, Wuuö Jwøk a pieme piemø. Kiper manøgønø, ø wär ki dudi ni ø pöödö ki thøme mo thøøli moge onetø ki yïth nïr kwøw 'moø bëët yi Øt Wuuö Jwøk.»

²¹'Ba kar kaaca, Aydheea onø köö, ni «Beerra man lwørge nyïï olämmi moa no omiiø na dhøk, ni twöge gø bäät boor, kiper nee dëëre jöönne.»

²²'Ba Edhekaya thuwø onø pëëö, na «?Agïnaŋø noo tïmö na nyuudhi ki man näk maa cøøa maal yi Øt Wuuö Jwøk?»