Read anuak Aydheea 40 Bible Online

Aydheea 40 - anuak bible

Aydheea 40

¹'Ba Jwøk marø aköö, ni «Cømmu cwïny jiya; cømmu cwïnyge.

²Cäännu jø Jerucalem ni mëër you nyoodhø jïge; caannu jïge ni rwaayu rwaaø ki man näk mo bëët laŋ na teek na en bäätge othum, ni kwör raay moge onø cool, kiper a na Wuuö Jwøk gena nø jääla ka ajäla mo orømø ki raay moge bëët.»

³Da dwøl mo wïnyö mo cwödö, ni «Jiiŋŋu jöör Wuuö Jwøk dï paap, tïïu ki øtjöö dïtëën mo thïïŋ mo dwøŋ kiper Jwøk marø.

⁴Beerra man ö aguule bëët ni thøri, ni ö kïte bëët ki thuuri ni dwøgi piny. Beerra man ö kwöra gwalli ni tïï ni pøøth, ni ö kwöra no opäny maal ni tïï ni ree ee päärö.

⁵Køøre nø, ajiem mar Wuuö Jwøk onyooth, ni ö jiyi bëët ni putge gø raŋ ge bëët. Luummögø caana Wuuö Jwøki ki dhee kiree.»

⁶Dwøl aköö jïra, ni «Gööc piny ki luubö.» Køøre aana köö, na «?A luumma ŋø noo gøøa piny?» Jiy bëët caala luum, na ajiem marge caala wï luum mo oŋøøk yi pwödhö.

⁷'Ba luum wø tal, ni päth wïïe piny, kany wø ö jam dhi Wuuö Jwøk wø kwöt dëër gø; kiper ka adïëri møn, jiy caala luum.

⁸Luum tal ni päth wïïe piny, 'ba dwør Jwøk marø bëëdö na bäre bäre.

⁹Wui, ï na Dhayan[14] na öö ki luubö mo nyään mo met, eth maal bäät kïdi mo bäär ni køpï gø! Wui, ï na Jerucalem na öö ki luubö mo nyään mo met, tïŋ dwørï maal døc ni køpï gø; tïŋ dwørï maal ni ba lwäyï; caanï jï päänye mo Juuda, «Ka adïëri møn, Jwøk maru en!»

¹⁰Raŋŋu, Kwäärö Wuuö Jwøk öö ki teek mo dwøŋ, ni teek bade beeye noo käär piny ki gø. Raŋŋu, eni öö ni käära jøøa ööle kiperge, ni beege jiy moa joode ni wø cäädhi nyïme.

¹¹Wuuö Jwøk jiye gwøe gwøø, kaawat man wø ö dïkwääyi wø gwøk dïëk moe, kaawat man wø ö eni wø cooŋ nyïïdïëk ki cere, ni käär ge ki kööre, ni bwøth moa näk nyoori ni kääre mëëth.

¹²?Aŋø, aŋa na cøt pï naama dwøŋ ki thäny cere ni røma gø? ?Aŋa na røm maalø ki rumi mar yïthakic lweedi mo cenø? ?Aŋa na cooŋ tør mar bäät ŋøøm ni røm gø ki gïr røm? ?Aŋa na røm kïte ki thuuri ki gïr røm?

¹³?Aŋø, aŋa na kööm Jwïëc Wuuö Jwøk, ni nyuunhnha gø ki luup?

¹⁴?Aŋa na mooc gø ka acaara, na wëëk gø kwany tiet jammi? ?Aŋa na pwöny gø ki jöör ŋøl luup ma kare? ?Aŋa na pwöny gø ki leec wïc, na nyooth jöör kwany tiet luup jïgø?

¹⁵Ka adïëri møn, wïth juurre caala ŋïnh pïï mo töön piny ka tier agwäy, ni ge bëëdö kaamar tør mo thiinh mo ena bäät gïr røm. Raŋŋu, Wuuö Jwøk wïth juurre mo wø bëëdö yïth mïëri moa en bäät naama dwøŋ tïŋe maal ni jööt jaak kaamar tør mo otwäät.

¹⁶'Ba këël jer lur Libaanø ba rømi na jer wääŋö ko olämme, ni lääy moa en yie thuwø ba rømi ki man cïbi no olämme mo wø waaŋ.

¹⁷Ki baŋ Wuuö Jwøk, wïth juurre bëët nëëni kaamar gïn mo bäŋ kwäänne, ni raaŋe kaamar gïn mo thiinh døc mo bäŋ tiere.

¹⁸?A ennø, Jwøk pääru gø ki ŋa? ?A kït gïnaŋø nou pääru eni ki gø?

¹⁹Kït gïn wø lam wø tïïc rëëmmö tïïö, ni ö ŋat wø lëënyö ki warkey ni lëëny dëër gø ki warkey, ni ö ŋat wø tïïö ki gwel-bïrö ni kïth dëër gø ki tiimme mo gwel-bïrö.

²⁰'Ba dhaanhø mo can mo ba løny ki man cïpe ki teeŋ muuy manøgø, jëëtö ki jaath mo teek mo ba laar tøbø, ni määnye ki rëëmmö man tieŋ gø na kït gïn wø lam ni cwöth gø piny ni teek nee ba pädhe.

²¹?Aŋø, gïn kuyu? ?Käru wïnynyö? ?Kär caanø jïïu dïkwøŋ ya acääŋŋe? ?Aŋø, tiere poot käru kwanyø en ki mana cak piny ya acääŋŋe?

²²Bee eni ni wø pï piny maal, ni piny ee luuŋ piny, ni jø piny bëëdö ni nëëni kaamar aditwie; ni maal ee peerø kaamar abïï ma gëëŋi, ni ee peerø kaamar oduŋkaara na kar bëëtö.

²³Bee eni ni wø dwøk kwääri piny ni tïïc ge kaamar gïn mo bäŋgø; ni bee eni ni wø tïïc dïŋut luup mo bäät piny kaamar gïn mo bäŋ tiere.

²⁴'Ba kanyo pootge ni ge poot kär tïmö kaamar nyijaath mo onø piith, ni ge poot kär tïmö kaamar nyijaath mo onø tøøk, mo lweete onø këët piny yïth ŋøøm, Wuuö Jwøk jamø wëëge kwöt bäätge ni talge, ni ö geni ni køøli ya apwøyaweerø kaamar lethø.

²⁵Wuuö Jwøk na en kur keere aköö, ni «?Aano päänynyu gø ki ŋa? ?Aŋa ni röömwa ki gø?»

²⁶Lwïthu ni raŋŋu maal mø. ?Japøge bëët ocwääya ŋa? Bee eni ni wø bëëdö na wïc bäätge ni wø ŋäc kwäänge, ni ge cwøle cwølø bëët ni man nø cwøle ka nyeŋ gø. 'Ba kiper mana näk mo dööŋö mare ki teek mare opöödhö, bäŋ aciel dëët japøge mo rwäänyi.

²⁷Wui, u na nyïïkwaac Jeekap, ni bee u na jø Icriel, ?aŋø ni ŋuru ni kööu, ni «Waŋjöö marwa arwäänyö ki baŋ Wuuö Jwøk, ni ö luup gïïa leth na en bäätwa ni pöödhe ki bäät Jwøk marwa ni käre ŋølø»?

²⁸?Aŋø, gïn kuyu? ?Käru wïnynyö? Wuuö Jwøk beeye Jwøk man wø bëëdö na bäre bäre, ni bee eni na cwääc piny bäre; eni dëëre ba øc piny ni eni ba ööl. Ena Jwøk mo tier leec wïc mare ba løny ki kwany.

²⁹Eni cïpö ki teek jï jiy moa no ööl, ni ö ŋata bäŋ teek jïre ni mooc gø ki teek mo opöödhö.

³⁰Këël wøpe kiree wø tïmö ni jägö ni dëëtge øya piny, ni ö obwöc cwøwi moa teek ni tïm tietge ni cwänyö ni ge päänhnhö.

³¹'Ba jiy mo wø bëëdö ni ge ŋäätha Wuuö Jwøk ge jïtö ki teek mo nyään; ni määtge ki bwöm kaamar odhuuth, ni rïïŋge ni ge ba ööl, ni cääthge ni tietge ba øc piny.