Read anuak Aydheea 41 Bible Online

Aydheea 41 - anuak bible

Aydheea 41

¹Wuuö Jwøk aköö, «U na wïth juurre mo wø bëëdö yïth mïëri moa en bäät naama dwøŋ, noukïïl nyïma ni cegu ïthu baŋa. Beerra man ö wïth juurre ni jïtge ki teek mo nyään, ni öge kany mo cään ni cäänge. Beerra man öge nee wa røømwa ki ge kar løøk.

²?Aŋa noo tïŋ maal ki ŋat mo käla kur tuul-cäŋ, ni cwøla gø ki køør adïëri mare kiper tïïc mare, nee wïth juurre cïp cere, ni tïïc nyeye ni ena tiere, nee ge tïïe kaamar tør ko opëëllö mare, ni tïïc geni ka atheerø mare kaamar lethø mo okøøl apwøyaweerø?

³Eni køørge orieme ni pöödhe ni bäŋ gïn mo tägi dëëre, ni tïme ni bäŋ gïn mo gal wääth mare.

⁴?Aŋa na tïïc gïnögø na wëëk gø thur kare, na cwøl beenhnhe ki mana täge dïkwøŋ? Bee aani na Wuuö Jwøk na nut wïlöölö noo nut ya aŋuudi, ni bee aani na eni.

⁵«'Ba wïth juurre mo wø bëëdö yïth mïëri moa en bäät naama dwøŋ noo neenge gïnögø, geno put lwäyö, ni ö jøøa en teegi mo piny ni tïm dëëtge ni kwanynyi, ni cooŋge rege ni öge kany mo cään.

⁶Ni ö ŋat atut man nø ni køny ŋat atut mare, ni kö ŋati man nø ki watge, ni ‹Mak cwïnyï!›

⁷'Ba rëëmmö cwïny ŋat wø leeny warkey ocøme, ni ö ŋat wø den nywïëny ki guduum nee tïmge ni pøøth ni cøm cwïny ŋat thääth, ni ge köö jï ŋat wø kup nywïëny, ni ‹Tïïc marï beer;› ni ö ŋat gur ni put kït gïn wø lam cwöth piny ni teek, ni gur gø ki mucumääre nee ba pädhe.

⁸«Wui, ï na dhaanhnha ma Icriel[15] ni bee ï Jeekap na näk yaa jierø, ni bee ï na nyikwaar nyawatwa ma Eeberam,

⁹ïïna käla ki teegi mo piny, niï cwöla ka kany mo bäär døc, ni kööa, ni ‹Ïïna dhaanhnha;› aani, ï yaa nø jier niï ba kwiera këët.

¹⁰Kärï lwäyö, kiper a nut buutï, ni ba bwøk cwïnyï, kiper aana Jwøk marï. Ï tïïa tïïö niï teek, ni kønya ïïni, ni jøla ïïni ki cer cwïïa ni wø tïïya adïëri.

¹¹«Ka adïëri møn, jø wø bëëdö ni manynya wëër ki ïïni bëët wïthge olääy ni putge nipäät, ni ö jøøa bëëdö ni gëëmö ki ïïni bëët ni rwäänyge ni tïmge ni bäŋgø.

¹²Jøøa män ki ïïni geno manynyï ni ba jootï geni, ni ö jøøa many leny ki ïïni ni tïmge ni bäŋgø na bäre bäre.

¹³Kiper bee aani na Wuuö Jwøk, Jwøk marï, ni wø jøl cer cwïïï, ni wø köö ki ïïni, ni ‹Kärï lwäyö, ï kønya kønyø.›

¹⁴Wui, Jeekap, ï na rööm twöŋö, ni bee ï na Icriel na thiinh, kärï lwäyö, kiper aani ki dëëra ï kønya kønyø. Manøgø caana aani, a na Wuuö Jwøk, na wïïl ïïni wøk, a na Jwø Icriel na en kur keere.

¹⁵Ka adïëri møn, ï tïïa tïïö niï caala gïr dïn man wø tut dhäki, na teeŋ gïr dïn mo nyään mo beth mo lage thööth, nee wïth kïte dwøgï piny ki gø, ni nyaaï thuuri piny ki gø ni tïmge kaamar lethø.

¹⁶Geno kwørï ni køøli ya jamø, ni puti ya apwøyaweerø keethø. 'Ba ïïni, iï omïnni ki aani, a na Wuuö Jwøk, ni jiemï aani, a na Jwø Icriel na en kur keere.

¹⁷«'Ba jøøa can ki jøøa no oööl ge bëëdö ni ge manynya pïï, ni ge ba jïti, ni ö lëëpge ni bëëtge no otal ki riew. 'Ba a na Wuuö Jwøk, döötge wïnynya wïnynyö, ni kønya geni, ni ba wiia geni, a na Jwø Icriel.

¹⁸Aani näm wëëga kwödö ki bäät thuuri moa leer, ni wëëga pïï kwön wøk ki yïth gøli. Dïtëën tïïa tïïö na puul mo päŋ ki pïï, ni ö ŋöömma no otal ni wëëga gø cöödö ki jøør.

¹⁹Aani wïth jenni ma teeŋi wëëga tuuö dïtëën, ni beege jenni mo perge leth, ki thëëbe, ki jaath man wø nyïïe wel na maaw, ni ö ŋöömma no otal ni wëëga gø tuuö ki jenni mo bëëdö ni mar, mo bøøge moge ba øc piny,

²⁰nee joot jiyi, ni ŋäcge gø, nee caarge ni kwanyge tier gø, ki man näk mo bee aani na Wuuö Jwøk ki dëëra kiree na tïïc gø, ni bee aani na cwääc gø, a na Jwø Icriel na en kur keere.»

²¹Wuuö Jwøk, eni na nyeny nyïïkwaac Jeekap, aköö, ni «Caannu luubö maru, ni kälu gïïa näk cwïnynyu päŋ ki ge nyïm.

²²Kälu juu mou mo wø lammu, nee gïïo tägi yi nyïm caange jïwa, caannu gïïa no opöödhö, nee tietge kwanywa, nee wa cätwa kiperge na aŋuunge ŋäcwa, wala caannu gïïo tägi yi nyïm jïwa.

²³Caannu gïïo en yi nyïm jïwa, nee ŋäcwa ni uuna juu møn; tïïu ki gïn mo beer wala mo raac, nee cwïnywa bwøkge ni lwäcwa.

²⁴'Ba uuni, uuna gïï mo bäŋ karu, ni tïïe mou bäŋ gïn duuge, ni ŋat wø jier uuni, ec raac ki gø.

²⁵«'Ba aani, a na Wuuö Jwøk, a tïŋŋa maal ki dhaanhø ki jï løø wï-piny, 'ba eno ööi ki jï løø kur tuul-cäŋ ni cøøra nyeŋŋa, ni ööe ni nyør kwääri, kaaman wø ö dïcwäc dääe wø nyør odhöönh.

²⁶?Aŋa na cäänö kiper gïn ki mana täge dïkwøŋ, kiper nee ŋäcwa, wala caana gø ki mana täge ya acääŋŋe, nee wa köwa, ni ‹Mare beeye adïëri›? Ka adïëri møn, bäŋ ŋat mo ocaan gø, ni bäŋ ŋat mo okøp gø wala ŋat mo owïny luup mou.

²⁷Bee a na kwøŋ Dhayan na näk Jerucalem cäännö dïkwøŋ, ni kööa, ni ‹Neenï, gïïo tägi beege ii,› ni jääga baŋe ki dhaanhø mo køp luubö mo nyään mo met.

²⁸Aana rääŋö, 'ba bäŋ aciel mo jaal dhee. Bäŋ aciel dï juu moøgø mo cïpi ka acaara, ni bäŋ aciel mo oløk pïëc jïra kany wø pëënynya geni.

²⁹Ka adïëri møn, ge patha adïëri, ge bëët, ni tïïe moge bäŋ tietge, ni kïtge moa no otïïö bäŋ tietge, 'ba ge caala jamø jaak.»