Read anuak Aydheea 42 Bible Online

Aydheea 42 - anuak bible

Aydheea 42

¹Wuuö Jwøk aköö, ni «Ka adïëri møn, man beeye dhaanhnha, na näk yaa jølø, ni beeye na jiera na met yia ki gø; jwïëy 'moa okïtha bääte, ni ö eni ni tïïc ŋøl luup mana näk kare bäät wïth juurre.

²Eni ba lweelli, ni dwøre ba tïŋ maal, ni dwøre ba wïnynyi nyeŋ jïëthe.

³Eni otöök mo onyøc, ba toore, ni lamba mo manynya thøø ba nääe; 'ba ŋøl luup mana näk kare beeye noo tïïe.

⁴'Ba eni këël kanyo tïïc ŋøl luup mana näk kare bäät piny, eni ba ööl, ni ba døø ŋääe. 'Ba wïth juurre mo wø bëëdö yïth mïëri moa en bäät naama dwøŋ, ge bëëdö ki ŋäädhe ni ge køya ciik mo gø.»

⁵Wuuö Jwøk, eni na cwääc maal ni ee peerø, na cwääc piny ki japa no otuy na en yie, eni na tïïc jiy nee bëëtge ni ge jwïëy bäät piny, na cïp kwøw jï jiy mo wø cäädhi bäät piny, ena köö,

⁶ni «Aani, a na Wuuö Jwøk, ïïna cwøla ki køør adïëri mara; ï maa maaø ki cerï ni koora ïïni, ni tïïa ïïni ni ïïna ŋato wëëk luumma tuuda ki jiy thur kare, ni ïïna tar kiper wïth juurre,

⁷nee nyeŋ cööye japï, nee jiy moa no otwöö uut tööc nee ge pätï, ni beege jø wø bëëdö kwör tööc moa cøl yi muudhö.

⁸«Aani, aana Wuuö Jwøk, ni manøgø beeye nyeŋŋa; ajiem mara ba wëëga ŋat mør, ni pwøc mara ba wëëga kït gïï wø lam.

⁹Ka adïëri møn, jammi moa caana dïkwøŋ anø tägö; 'ba ennø, u cäänna cäännö ki jammi møøk mo nyärö. 'Ba kanyo pootge ni kär tägö, caana caanø jïïu.»

¹⁰Wärru ki duut mo nyään jï Wuuö Jwøk, wärru nou pwøya nyeŋŋe, u ni en teegi mo piny! Pwøyu nyeŋŋe, u ni wø cäädhi dï naama dwøŋ, ki gïï wø en yi naama dwøŋ bëët. Pwøyu nyeŋŋe, u na wïth juurre mo wø bëëdö yïth mïëri moa en bäät naama dwøŋ, ki u jø wø en yïthge bëët.

¹¹Beerra man ö paana näk dïtëën ki päänye moa en yie ni tïŋge döötge maal ni ge pwøya Wuuö Jwøk; beerra man ö atude mo wø bëët jø Këdar yïthge ni mïn yïthge. Beerra man ö jø wø bëëdö Cela ni wärge ni döötge ena maal; beerra man kwöŋge ki met ec ni ge ena wïth kïte.

¹²Beerra man ö geni ni pwøcge Wuuö Jwøk, ni caange ajiem mar gø jï wïth juurre mo wø bëëdö yïth mïëri moa en bäät naama dwøŋ.

¹³Wuuö Jwøk dønynya wøk kaamar oteen leny, eni këëyö mare nyoodhe nyoodhø kaamar ŋat leny; eni twäätö ri leny, twäätö møn ni dwøre ena maal. Eni ööa maal bäät nyïïmän moe ni bööt geni.

¹⁴Wuuö Jwøk aköö, ni «Aana bëëdö ki kany mo bäär naa lïŋö, aana bëëdö ni aano nikïïl ni dëëra yaa juunynyö. 'Ba ennø, kaaman wø tïïc dhaagø mo ogøøc mäc lwaarri, aani, a köök ni jwëëya døc ni laba ree.

¹⁵Kïte ki thuuri wëëga pädhö, ni ö japa no otuy bäätge bëët ni talge; näm wëëga dwön ni ŋørge ni tïmge na acuul, ni taala pulli.

¹⁶Cööye bwødha bwødhø ki waŋjöö mo kucge, ge pieya pieyø ki nyeŋ jïëthe mo kucge. Muudhö tïïa tïïö na tar nyïmge, ni ö kwöra gwalli øtjöö ni tïïa ge ni pøøth. Gïïögøøni beege noo tïïa, ni ge ba wïïa jaak ni kära tïïö.

¹⁷'Ba jø wø ŋääth juu mo wø tïïc ki ceŋ, ni wø köö jï kït gïï wø lam, ni ‹Uuna juu mowa,› ge dwøga ŋäthge ki lään wïc mo dwøŋ.»

¹⁸Wuuö Jwøk aköö, ni «Wïnynyu, u na meŋŋe ii! Raŋŋu, u na cööye ii, nee jootu.

¹⁹?Aŋa na cwør ni kaala dhaanhnha, wala na miiŋ ni caala eni na jääŋŋa? ?Aŋa na cwør ni caal eni na bëëdö ki bëët-mëër ki aani en, wala mo caala eni na dhaanhnha, a na Wuuö Jwøk?

²⁰«Uuna rääŋö ki jammi mo thööth, 'ba tietge käru kwanyø; ïthu bëëdö ni ŋammø, 'ba bäŋ gïï mo wïnynyu.»

²¹Wuuö Jwøk yie amïnnö ki køør adïëri mare ki man tïïc ciik moe ni pere leth, ni ee jiemø.

²²'Ba jøøgø, gena wï jur mo omaa ki tøŋ ni twier geni, ge bëët, gena leeŋ yïth buri, ni kaan geni uut tööc; gena mak ki tøŋ ni bäŋ ŋat mo owïïl geni wøk, ni käl geni ni bäŋ ŋat mo oköö, ni «Duu geni.»

²³?Aŋa dïïu noo wïny gïn, wala cega ïthe ki luup moo en yi nyïm?

²⁴?Aŋa na tïïc Jeekap nee mak ki tøŋ? ?Aŋa na tïïc eni na Icriel nee twier? ?Aŋø, patha Wuuö Jwøk na bääyø dëëre, na kweerø ki man cäädhø ki uutjïëthe moe, na kweerø ki man jïëø ciik moe?

²⁵Kiper manøgønø, wëër mare ni wø liel kaamar maac, na caal mäc leny, akøny bäätø, ø na jø Icriel, ni wëëk maac liel ki deŋ Icriel bäre; 'ba øøna bëëdö ni tier gø poot ba kwanyø. Øøna waaŋ Wuuö Jwøki ki maac, ni bëëdø ni bäŋ gïn mo caarø kiper gïna tägö.