Read anuak Aydheea 43 Bible Online

Aydheea 43 - anuak bible

Aydheea 43

¹'Ba ennø, Jeekap, Wuuö Jwøk na cwääc ïïni, na tïïc ïïni, ï na Icriel, ena köö, ni «Kärï lwäyö, kiper ïïna nø wïïla wøk, ïïna nø cwøla ki nyeŋŋï, ni ïïna thööŋŋa!

²Kany wø cäädhï yïth pïï, aano bëëdö naa nut buutï; ni kany wø cäädhï yïth näm, ï ba køøl pïïyi. Kany wø cørï yi maac, ï ba waaŋ, niï ba gut leep maaci.

³Kiper bee aani na Wuuö Jwøk, Jwøk marï, a na Jwø Icriel na en kur keere bee aani na pïëmï marï. Ijep anø coola karï, ni ö Kuuci ki Ceba ni nø wiila ge ki ïïni.

⁴Kiper mana näk mo perï leth jïra, ni ïïno wøørø, naa mëër ki ïïni, jiy møøk laa karï, naa coola wïth juurre kar jwïëy moï.

⁵Kärï lwäyö, kiper a nut buutï; jiy moo käl riï tïïa tïïö nee öge ki jï løø kur tuul-cäŋ, ni cuuŋa uuni ki jï løø kur pänh-cäŋ.

⁶Caana caanø jï wï-piny, ni kööa, ni ‹Cïp geni!› Ni caana gø jï tier-piny, ni kööa, ni ‹Ge kär mänï. Duu wääta ki kwöra enge yie na bäär, ni duuï nyïïa ki yïth teegi mo piny,

⁷ni beege jiy bëët moa näk cwøla ri nyeŋŋa, na cwääa kiper ajiem mara, ni beege moa tïïa ki cera kiree.› »

⁸Käl jiy wøk moa näk nyeŋge dagø, 'ba gena cööye; ni kälï jiy wøk moa näk da ïdhi jïge, 'ba gena meŋŋe.

⁹Wïth juurre bëët dëëtge anø dwalge, ni cooŋge dëëtge kanya ciel. ?Aŋa dëëtge noo caan tier gïn en, noo køp gïïa dïkwøŋ jïïø? Beerra man känge ki jiy mo tier gïnögø ŋäcge naa adïëri marge ŋäc, nee wïny jiyi ni köge, ni «Bee kare.»

¹⁰'Ba Wuuö Jwøk aköö, ni «Uuni, uuna jiya moa ŋäc tier gïnögø ni wø caan gø. Ni bee u na jiya moa näk yaa nø jier, ki man ŋäyu aani ni ŋääthu aani, ki man kwanynyu tiere ni bee aani na eni. Bäŋ Jwøk mør mo onut dïkwøŋ, ni bäŋ gø këët mo öö køøra.

¹¹Aani, bee aani na Wuuö Jwøk; ni bäŋ pïëmi mør këët ni näk mo paa aani.

¹²Bee aani na nø køp gïno tïïa, ni piema uuni, ni caana tier gø, ni bäŋ jwøk mo path mo obëëdö yïthakiyu. Kiper manøgønø, uuna jøøa ŋäc tier gïnögø ni wø caan gø. Manøgø beeye dwøra, a na Wuuö Jwøk. Bee aani na Jwøk.

¹³Ki mana täge cøøn bee aani na eni, ni bäŋ ŋat mør mo piema dhaanhø cera. Aani, mara wø tïïa tïïö, ?'ba aŋa ni wø wiil gø?»

¹⁴Man bee dwør Wuuö Jwøk, eni na Jwø Icriel na en kur keere na wïïl u wøk, ena köö, na «A jääga Babiløn ki jø leny kiperu, ni ö jø Kaldia bëët ni päärge wøk, ni ge aay ka baabuure mo wø töötge kiperge.

¹⁵Bee aani na Wuuö Jwøk, Jwøk maru na en kur keere, ni bee aani na nyeya maru na cwääc Icriel.»

¹⁶Man bee dwør Wuuö Jwøk, eni na tïïö ki jöö mo cøra dï naama dwøŋ, ni beeye jöö mo cøra dï pïï mo kwödö ni teek,

¹⁷na tïïc jïëth okwëënyi mo leny, ko okwëënyi, ki jø leny ko otëëk leny nee öge; 'ba geni, gena put päänhnhö ni ge kär duu maal këët, ni putge thøø kaamar maac mo obïbö;

¹⁸Wuuö Jwøk aköö, ni «Kär wïthu parru ki gïïa dïkwøŋ, ni ba lääŋŋu jammi moa no opöödhö.

¹⁹Ka adïëri møn, aani, da gïn mo tïïa tïïö mo nyään, gïneca tägö ennø. ?Aŋø, 'ba nëëni jïïu? Aani da jöö mo tïïa tïïö mo cøra paaba näk tëën, ni tïïa ki näm mo cøra paaba no otal.

²⁰'Ba lääc paap aano jiemge, ni beege orude ki ude, kiper pïï moa cïba paaba näk tëën, ki näm moa tïïa paaba no otal, naa mooya jiya moa näk yaa jierø ki gïn maathge.

²¹Jiya moa tïïa kiper dëëra ajiem mara caange caanø.

²²«'Ba ï na Jeekap, nyeŋŋa kärï cwølø. Wui, ï na Icriel, ïïna jøøm ki aani.

²³Bäŋ dïëk mo iï cïbö jïra no olämme mo wø waaŋ bäre, naa kärï wøørø ko olämme moï møga. Yiï kära cwaadø ki man cïpï ki muuce mo beel, niï kära öölö ki man cïpï ki jer wø jïcge ŋwääi ni met.

²⁴Bäŋ teeŋ thieŋ mo wø ŋwääi ni met mo iï ŋeeø ki gwel jïra, ni bäŋ dwäle mo olämme moï mo yia iï tïïö ni met ki ge. 'Ba yia acwaatï ki raay moï, ni öölï a ki gïïa bayï.

²⁵«'Ba bee aani ki dëëra kiree ni wø wëën raay moï bëët kiper nyeŋŋa; ni wïïa ba para ki raay moï këët.

²⁶Par wïïa ki japa no opöödhö, ni carø luup 'moø na aciel. Caan luubö marï nee ŋäc ni marï adïëri.

²⁷Kwaru mana dïkwøŋ atïïö ki raay, ni ö jøøa cäänö na karï ni bääcge dëëra.

²⁸Kiper manøgønø, dïlämme moa kwörge døøŋŋø mo wø tïïö kanya en kur keere, otïïa nee bëëtge ni ba waany. Nyïïkwaac Jeekap ocïba nee ge 'näk, ni tïïa geni na jø Icriel nee ge jøøŋŋi.»