Read anuak Aydheea 44 Bible Online

Aydheea 44 - anuak bible

Aydheea 44

¹«'Ba ennø, cek ïthï, ï na dhaanhnha ma Jeekap,[16] ni bee ï Icriel na näk yaa nø jier.

²Man beeye dwør Wuuö Jwøk, eni na tïïc ïïni, na cwääc ïïni ec, eni noo køny ïïni, ena köö, ‹Wui, dhaanhnha ma Jeekap, ni bee ï Jecurun[17] na näk yaa nø jier, kärï lwäyö.

³Kiper aani pïï otïïa nee kwötge ki yi ŋöömma no onäk riewi, ni tïïa nyeŋ näm ni kwödö ki yi ŋöömma no otal. Jwïëy 'moa ojääŋŋa bäät jø okäl dëërï, ni bëët gwïëthi mara ni ena bäät nyïïkwaayï;

⁴ni ö geni ni tïmge kaamar gïï mo tuul wøk ka yïthakic luum, ni caala jenni mo ena deŋ naam.›

⁵'Ba ki dï jøøgø, ŋat mør köö, ni ‹Aana mar Wuuö Jwøk;› ni ö maya ni cwøl nyeŋŋe ri Jeekap; ni ö mørri ni gööt cere, ni ‹Manna mar Wuuö Jwøk,› ni cak nyeŋ Icriel na nyeŋ mo owøørø.»

⁶'Ba man beeye dwør Wuuö Jwøk, eni na nyeny Icriel, na wïïl jø Icriel wøk, ni bee eni na Wuuö Jwøk, eni na wïth jammi bëët, ena köö, «Bee aani na wïlöölö ni näga aŋuudi, ni bäŋ Jwøk mør këët ni näk mo paa aani.

⁷?Aŋa ni caal aani? Beerra man ö ŋateca ni køp mare ni caan gø; beerra man peeth gø nyïma na kare, ni caan gïïa tägö bëët ki mana täge ki kanya këëlla tier wï jur piny ki kany mo bäär cøøn. Ni put gïno tägi yi nyïm caan jïge thuwø.

⁸Käru bwøk ni ba lwäyu. ?Aŋø, kära caanø jïïu ni køba gø ki mana täge kany mo bäär cøøn? 'Ba uuni bee u na ŋäc tiet jammi 'moa ni wø caan gø! ?Aŋø, da jwøk mør këët ni näk mo paa aani? Ka adïëri møn, bäŋ Kïdi mør këët; bäŋ aciel mo ŋääa.»

⁹Jø wø tëëŋö ki kït gïï wø lam, ge bëët bäŋ karge, ni jap wø perge leth jïge bäŋ gïn duuge, ni këël jiy moa køp ni tiet gïïögø ŋäcge, tïmö ni gïïögø kucge, ni kärge neenø, ni put tïmö na lään wïc jïge.

¹⁰?Aŋa ni wø tïïö ki kït jwøk, ni wø tieŋ kït gïn wø lam mo bäŋ gïn duue dëëre?

¹¹Ka adïëri møn, geni ki jø wø wøør kït gïïögø, wïthge olääy, kiper jø wø tëëŋö, gena jiy jaak. Beerra man cooŋge dëëtge, beerra man öge maal, beerra man tïm dëëtge ni kwanynyi ki lwär, beerra man wëëk geni bëët lään wïc.

¹²Rëëmmö man wø thädhö ki nywïëny, nywïënyö wø di thäädhö ni tïïe ka maac, ni thääth gø ki nyööl na kït gïn wø lam, ni tïïe ka cere na teek. 'Ba eni thuwø wø näk käci nääö ni tïm dëëre ni jääk; ni nägi ya riewi kiper mana käre mäthö ki pïï.

¹³Ŋat mør tieŋa jaath, ni røm gø ki thøør røm, ni kiiw gø ki belø, ni tieŋ gø ki dïnöök, ni røm gø ki gïr røm, ni tïïc gø na kït dhaanhø, ni mïërö ni caala dhaanhø, nee tïme ni bëëdö yi øtø.

¹⁴Ka adïëri møn, teeŋ ŋatøgø jer lur Libaanø mo bäyö wø ŋøde piny kipere, ni jier teeŋ jenni moa teek møga nee bëëtge dï lul jïre kaace. Ni ö eni ni piith jaath lur Libaanø, ni tïïyi ya køthi nee døøŋŋe.

¹⁵Køøre nø, tïmö na jer maac jï dhaanhø. Møøk wø lwøre lwørø ni juŋe ki ge, ni äp møga ni thaal cam ki ge; ni tieŋ mør na kït gïn wø lam, ni wøør gø. Eni kït gïn wø lam wø di tieŋø møn, ni këël cøŋŋe piny nyïm gø.

¹⁶Thäk jenni møga wø kïthe maac; ni bul rïŋö ki ge ni cam gø ni jääŋe. Eni thuwø wø juŋö ki maac ni kööe, ni «Yaa, dëëra amurrö, maac apwøa møn.»

¹⁷'Ba thäk møga wø di tïïö na kït gïn wø lam ni ee tieŋø na jwøk mare, ni këël cøŋŋe piny nyïm gø ni wøør gø, ni läme jï gø ni kööe, ni «Piem aani, kiper bee ï na jwøk mara.»

¹⁸'Ba geni bäŋ gïn mo ŋäcge ni tier gø ba kwanyge, kiper nyeŋge omiiø nee ba nëënge, ni cwïnyge otïïö ni teek kiper nee tiere ba ci cwïnyge.

¹⁹Ni bäŋ ŋat mo para wïïe, wala ŋat mo da gïn ŋääe, wala ŋat mo kwanya tier gø mo köö, ni «Aani, thäk jenni anø kïtha yi maac ni nø thaala cam ki cuk moe, ni bula rïŋö ki ge ni cama gø. ?A ennø, maya daa tïïö na gïn mo Jwøk yie raac ki gø, ni këëlla cøŋŋa piny nyïm gïn ma jaath jaak?»

²⁰Teeŋ ŋatøgø tïmö ni cama bur, ni bee cwïny man wø cøøk dhaanhø na tïïc eni nee gaa wøk. Ni ba løny jïre ki man piem dëëre, ni dëëre ba pëënynye, na «?Aŋø, man paa tööt ni cer cwïïa en?»

²¹«Wui, ï na Jeekap, ni bee yi na Icriel, par wïïï ki gïïögø, kiper ïïna dhaanhnha; ïïna nø cwääa ni ïïna dhaanhnha. Wui, ï na Icriel, wïïa ba wïl ki ïïni.

²²Gïïa reyø bëët na bayï anø paanya bäätï kaamar pöölö mo odhïŋ, ni nø paanya raay moï kaamar rwöc. Duu baŋa, kiper ï ya nø wïïl wøk.»

²³Wui maal, kwöŋŋï ki met ec, kiper gïnögø tïïya Wuuö Jwøki! Wui, u na kwöra en piny kuya, beerra man kanynyu; wui, u na kïte, ki ï na lul ki jenni moa en yiï bëët, beerra man jøllu gø ni kwöŋŋu ki met ec; kiper Wuuö Jwøk, Jeekap anø wïïl wøk, ni nyooth ajiem mare dï Icriel.

²⁴Man bee dwør Wuuö Jwøk, eni na wïïl ï wøk, na cwääc ïïni ec, ena köö, ni «Aani, a na Wuuö Jwøk, bee aani na tïïc jammi bëët; maal apeera, ni tïïya a keera, ni peera piny a keera.

²⁵Jø wø ŋwöö kiper ŋïïce moge, tiet ŋïïce moge tïïa tïïö ni bäŋ karge, ni ö adïëda mar jø wø dëëdö ki jap nyïm ni tïme na jap bøølø, ni tïïa jøøa nyeŋge reegø nee wïthge rege nootge, ni tïïa kwänynyö marge na bøølø.

²⁶Luum dhaanhnha wëëga thur kare, ni ö luup jiy mo wø jääŋŋa ni tïmge na adïëri. Bee aani na caan luum Jerucalem, ni kööa, ni ‹Paanøgø jiy obëëdö yie!› Ni caana luum päänye mo Juuda, ni kööa, ni ‹Päänye moøgø di geerø!› Ni tïŋa ge maal ki yi ränynyö marge.

²⁷Bee aani ni wø köö ki naama dwøŋ na päŋ, ni ‹Talï!› ni puta nyeŋŋi moe taal.

²⁸Bee aani ni wø cäänö kiper nyeya ma Kiröc, ni kööa, ni ‹Ena dïkwääy mo tïnynya aani! Gïï wø manynya bëët tïïe tïïö.› Ni ö Kiröci ni caan luum Jerucalem ni kööe, ni ‹Pääny manøgø di geerø,› ni caan luum øtø mar Jwøk ni kööe, ni ‹Tierï mano geer ïïni bääte di caamø.› »