Read anuak Aydheea 47 Bible Online

Aydheea 47 - anuak bible

Aydheea 47

¹«Wui, ï na Babiløn, päänya caal nyakøø mo dëër dïcwøø poot kuue, dää piny ni pïï piny yi tør. Wui, ï na Babiløn, pï piny yïth ŋøøm jaak ni patha bäät wälu. Kiper ï ba cwøl këët niï mïërö niï jwøny.

²Lwør kïn guur ni gudï ki møø. Abïï man wø loop wïc käl wøk, ni jaarï thïnuura marï maal, ni wïïï tietï wøk, ni ŋørï nyeŋ näm.

³Dööŋŋö marï ki dëërï otïmö ni bäŋ gïn gëëŋ gø, ni ö lään wïci marï ni bëëde ni nëënö jaak. Kwör coola coolø ni bäŋ ŋat mo wëënna.»

⁴Eni na wïïl øøni wøk, nyeŋŋe beeye Wuuö Jwøk, eni na wïth jammi bëët, ni beeye Jwø Icriel na en kur keere.

⁵«Wui, ï na Babiløn na caal nyakøø, pï piny ni niïkïïl, ni ciï yi muudhö, kiper ï ba cwøl këët ni ïïna cuumi mar buc nyeye.

⁶Aana bëëdö naa wëëyö ki jiya; wï jur mana näk ya jierø atïïa ni ba waany, ni cïba gø cerï; 'ba bäŋ bäth ec mo iï nyoodhø jïge. 'Ba gïna tïïyï beeye caarø mo teek mo caala tëër mo peek na kïthï bäät jäle.

⁷'Ba ï poot köö, ni ‹Aani, a bëëdö ni aana cuumi na bäre bäre.› Gïïögø kärï maar caar, ni gïno duue dëërï kärï lääŋŋö.

⁸«'Ba ennø, wïny mara, ï ni wø mëër ki jammi mo dëël, ï ni wø bëëdö ni ba lwäär ki gïn mo raac. Ï wø cäänö ki cwïnyï ni kööï, ni ‹Bee aani keera, ni bäŋ ŋat mør këët mo kaala aani. Aani, a ba tïmö ni aana cï thøø, ni bäŋ gïn mo tägi dëët obwöre 'moa.›

⁹'Ba gïïögø na ariiø yøø puta tägö dëërï ni cwöba rïï ki dïcäŋ aciel keere. Obwöre moï thøw, ni dööŋï ni ïïna cï thøø. Gïïögø bëët tägö dëërï na kare kiree, këël na bëëdï ni jïrï da jap ajuuk mo thööth, ki teek mo dwøŋ man wø tïïyï ki køør thïëth marï.

¹⁰Ïïna bëëdö ni ïïno göök ri gïïa reyø ni wø tïïyï, ni kööï, ni ‹Bäŋ ŋat maa di joodø.› Leec wïc marï ki kwänynyö marï, ïïna tïïcge niï gaaï wøk. Kiper ïïna nø köö ki yi cwïnyï, ni ‹Bee aani keera, ni bäŋ ŋat mør këët mo kaala aani.›

¹¹'Ba gïï mo reyø otägi dëërï, ni tïme ni ba løny jïrï ki man kälï riï wøk ki køør jap ajuuk; ni ö gïï mo leth ni päthge bäätï, ni tïme ni ba løny ki man paanyï ge, ni ö ränynyö mo kanya käl yie kuyï ni ö bäätï ni cwöba riï.

¹²«'Ba ennø, put bëëtö niï poot tïïya tïïe mo wø tïïyï ki thïëth marï, ki jap ajuuk moï na thööth, na bëëdï niï tïïya ge ki mana kälï thïnhö; kanymør niï köö ni duunnö riï, ni kanymør jiy tïïyï tïïö nee lwäcge.

¹³'Ba ïïna ööl jaak ka acaare moa thööth na kwanyï. Beerra man ö jø wø kwaan ceer, ni wø caan gïï mo poot ena nyïm ki køør ceer ki päär mar dwääy, ni öge maal kuna piemge ïïni cer gïno leth mano ö bäätï.

¹⁴Neenï, jøøgø, ge tïmö kaamar luum mo otal, ni waaŋi ya maaci. Geni, ge ba løny ki man piemge dëëtge cer teek leep maac. 'Ba manøgø paa maac mo di juŋö ki gø, ni paa maac mo pïïa piny deŋŋe.

¹⁵'Ba teeŋ gïnögø bee gïno tïïcge kiperï, ge na tïïï ki geni na öölï, ni marï gath ki geni ki mana tägï ki thïnhö. ŋati man nø dëëtge aay ni thääyö ki jööre keere. Ni tïme ni bäŋ aciel dëëtge mo piema ïïni.