Read anuak Aydheea 48 Bible Online

Aydheea 48 - anuak bible

Aydheea 48

¹«Wui, jø dhi øt Jeekap, wïnynyu gïn, u na no ocaaø ri Icriel, na käl ri tuuŋ Juuda, ni wø kööŋ ki nyeŋ Wuuö Jwøk, ni wø cwøl nyeŋ Jwø Icriel, 'ba wø cwøllu ka jöö mo patha adïëri mo ba tiir.

²Uuni, dëëtu wø cwøllu cwølø na jø päänya en kur keere, ni göögu raa, a na Jwø Icriel, na näk nyeŋŋe bee Wuuö Jwøk, eni na wïth jammi bëët.

³Aani, ki kany mo bäär cøøn, jammi moa tägö bëët ni poot ena nyïm, akøba. Gena cur wøk ki dhaa, ni tïïa geni nee ŋäc jiyi. Køøre gïïögø atïïa ni putge tägö ni cwöba røk.

⁴Kiper ŋääa ni cwïnynyu teek, ni wïthu teek kaamar nywïënyö, ni teek wïc maru caala nywïënyö ma jwïël.

⁵Kiper manøgønø, gïïögø acaana jïïu ki kany mo bäär; kanya pootge ni ge poot kär tägö, akøba jïïu, nee ŋati man nø ba kööe, ni ‹Kït gïn wø lama bee na tïïc gïïögø; jaath mana tieŋa na kït gïn wø lam ki gïna leenya na kït gïn wø lam beege na tïïc gïïögø nee täkge.›

⁶Ennø, gïïögø anø wïnynyu. Neennu ge bëët. ?Aŋø, poot ba jïëyu ni bee adïëri møn? 'Ba da gïï mo nyärö mo caana caanø jïïu ki mano täge ennø, ni beege gïïa näk tietge okanø na näk kuyu.

⁷Gïïögø tägi ka kar kany ennø ni paa kany mo bäär; ni käru kwøŋ wïnynyö ya awääre, ni ba løny ki man kööu, ni ‹Ka adïëri møn, gïïögø ŋäcwa.›

⁸'Ba gïïögø käru wïnynyö, ni tietge kuyu. Ki kany mo bäär cøøn, ïthu poot kär jäpö, kiper ŋääa møn nou doo tïïö ki riek waŋ mo raac døc. Uuni, u ŋäc ki man näk mo uuna jø ageem ki mana nywöl uuni.

⁹'Ba kiper nyeŋŋa nø, wëër mara jooa jooø, ni cïba cwïnya piny kiper ajiem mara, nou ba ŋula wøk.

¹⁰Ka adïëri møn, bëëtö mo leth akäla bäätu naa päära uuni, kaawat man wø leeny gwel-bïrö ki maac, 'ba bäŋ gïn mo beer mo yaa joodø baŋu.

¹¹'Ba kiper nyeŋŋa, a ki dëëra kiree, gïnögø tïïa tïïö. ?Aŋø, olønye nidïï ki man wëëga nyeŋŋa päät? Aani, ajiem mara ba cïba jï gïn mør.

¹²«Wui, nyïïkwaac Jeekap, ni bee u jø Icriel na näk yaa jierø, cegu ïthu ki dwøra. Bee aani na Wuuö Jwøk na näk wïlöölö, ni näga aŋuudi.

¹³Ka adïëri møn, piny acwääa ki cera, ni peera maal ki cer cwïïa, ni kany wø cwøla geni, ge puta cuŋŋö na aciel.

¹⁴«Uuni bëët, cooŋŋu rou ni cegu ïthu. ?A kït gïn wø lam mane na caan tiet luup moi ii? Eni na jier Wuuö Jwøki, mana many Wuuö Jwøki tïïe tïïö dëër Babiløn, ni ö teek bade ni bëëde ni ena dëëtge, ge na jø Kaldia, ni jääla ge.

¹⁵Aani, a ki dëëra, aana nø cäänö. Ka adïëri møn, eno cwøla ni tïïa eni nee ööe. Ni ö eni ni tïïc uutjïëthe moe nee thurge karge.

¹⁶Ööu ni nyänhnhu buuta, ni cegu ïthu ki luubö man. Ki mana täga cøøn, a kär cäänö ki luup mo tietge okanø. Kany wø täk gïrpinynyi, aani, a nutö kaace.» 'Ba ennø, Kwäärö Wuuö Jwøk aana jääŋŋe ni Jwïëy moe ena bääta.

¹⁷Man beeye dwør Wuuö Jwøk, eni na wïïl uuni wøk, eni na Jwø Icriel na en kur keere, ena köö, ni «Aani, aana Wuuö Jwøk, Jwøk maru, ni wø pwöny uuni nou bëënynyu, ni wø bwøth uuni ki jöö mano cøru yie.

¹⁸'Ba doo na gïïa köömma uuni ki geni you gwøø, bëët-mëër maru doo tïmö kaamar naam mo kwödö ni ba cuŋ, ni ö bëënynyö maru ni dee tïmö ni päl kaamar athaŋ naama dwøŋ.

¹⁹Jø oööi ki rou kwäänge doo tïmö ni thööth kaamar akwöny deŋ naama dwøŋ, ni tïm kwään nyïïkwaayu ni thööth kaamar nyeŋ akwöö. Nyeŋge ba doo kïï wøk, ni ge ba doo raanynyø nyïma.»

²⁰Ööu wøk ki yi Babiløn! Rïŋŋu wøk ki yïthakicge, ge na jø Kaldia! Gøøu luubö man piny nou kwöŋŋö ki met ec, ni køpu gø, ni jääŋŋu gø nee pïïe bäät piny bäre, ni kööu, «Wuuö Jwøk jiye ma nyïïkwaac Jeekap awïïl wøk.»

²¹Geni, ge kär näk riewi kanya bwøth geni ki dï paap. Eni pïï atïïe nee kwönge wøk ki ri kïdi kiper nee maathge. Eni, kïdi akaae, ni put pïïyï ö wøk ni kwödö.

²²Wuuö Jwøk aköö, ni «Bëët-mëër bäŋgø jï jø raay.»