Read anuak Aydheea 5 Bible Online

Aydheea 5 - anuak bible

Aydheea 5

¹Aani a wär ki duut jï ŋata mëëra ki gø, ni bee duut mo cäänö kaper omëëya ki pwöth jer omøki mare. Ŋata mëëra ki gø jïre da pwöth jer omøki yïth ŋøøpa beyø nyäär thuur.

²Eni pwödhö manøgø apuure ni kwäny kïte wøk, ni tøøk jer omøki moa beyø yie. Ni gëëde ka abïl koor dïëre, ni kunye ki buur man bii pï nyïïjenni yie. Køøre ena bëëdö ni koora nyïëdi mo beyø moo nywøl jer omøki mo pwöthögø, 'Ba atïmö ni nywøla nyïëdi mo reyø.

³'Ba ennø, ŋata mëëra ki gø aköö, ni «U ni wø bëëdö yi Jerucalem ki jø Juuda, ŋøllu luubö man yïthakicwa ki pwöth jer omøki mara.

⁴?Agïnaŋø mør këët nø, noo tïïa mo odööŋ ni kära tïïö kiper pwöth jer omøki mara? ?Kanya bëëda naa koora nyïëdi mo beyø ki man nywøl gø, aperŋø ni tïme ni nywøla nyïëdi mo reyø?

⁵'Ba ennø, gïno tïïa kiper pwöth jer omøki mara caana caanø jïïu: jenni moa näk yaa piidhø na ciel deŋŋe käla wøk, ni wëëga gø raanynyø, ni ö cielli mana no otïïö ki kïte ni nyaa gø piny ni dööŋe na kar adhwøla.

⁶Tïïa tïïö ni tïme na pwödhö mo oränynyö. Jer omøki moe wïthge ba goor, ni tietge ba puur; 'ba otwel ki koodhi oput tuuö yie. Ni köömma pöölö nee ba pädhe na køth bääte.»

⁷'Ba pwöth jer omøki mar Wuuö Jwøk, eni na wïth jammi bëët, beeye dhi øt Icriel, ni jenni moa tøøe na mëëre ki ge, beege jø Juuda. Ena bëëdö ni räŋö ni koora ŋøl ma kare, 'ba atïmö ni nuta køny remø piny; ni bëëde ni räŋö ni koora bëënynyö, ni tïme ni wïnynya oduuru mar pänh cwïny.

⁸'Ba otïmö ni leth jïïu, u ni wø meet uudi mou ki uudi møøk, ni wø mëën bäät pwöth mou ki pwöth møøk, ni tïme ni bäŋ kany mo dööŋ jï jiy møga, ni dööŋŋa u keeru yi ŋöömö manøgø.

⁹Wuuö Jwøk, eni na wïth jammi bëët, akööŋ ni wïnyö jïra ni kööe, ni «Ka adïëri møn, uudi mo thööth odööŋ keerge, këël uudi moa døøŋŋø na mïërö, odööŋ ni bäŋ jiy yïthge.

¹⁰Pwödhö ma böölle apaar mo jer omøki otïmö ni duua nyïëdi mo rømi ka nywøp køøŋø ma yi caapiia aciel keere, ni ö köödhi mo päŋ yi baarmïïl ni tïme ni duua beel ma caapiia keere.»

¹¹Otïmö ni leth jï jø wø päny maal ka amöölla døc, ni wø läät bäät kwøŋ moa keec, jø wø këët dïwäär ni ge mädhö ni wø meeyi døc.

¹²Ni ge bëëdö ni ge pöödö ki wïth thøme ma teeŋi kwör maath moge, ni ge pöödö ka anëët ni ge kudhö ko opele; 'ba ïthge ba cekge ki tïïe mo Wuuö Jwøk, ni bäŋ gïn caarge kiper japa tïïc Jwøki.

¹³Kiper manøgønø, ge na jiya geno käl ni geno maa ki tøŋ, ni bäŋ gïn ŋäcge. Jiy moge moa kwörge døøŋŋø ge thøw ni ge 'näga käci, ni ö lwaae moge ni tal kööthge ki riew.

¹⁴Kiper manøgønø, kar bëët jwïëc jøøa no othøw, yie di tïïö ni laac, ni jap dhee døc ni päl, ni ö jø Jerucalemmi moa kwörge døøŋŋø, ki jiy moe bëët mo wø lweelli kwör maath, ki mo wø bëëdö ni yïthge met jaak ni wïthge owïl, ni päthge yie.

¹⁵Kanyøgønø wïth jiy døøa piny, ni ö jøøa kwörge døøŋŋø ni dwøk wïthge piny, ni ö bëëtö mar jø wø tïŋ dëëtge maal ni dwøgi piny.

¹⁶'Ba Wuuö Jwøk, eni na wïth jammi bëët, nyeŋŋe obëëdö ni ena maal ki ri ŋøl mare; ni ö eni na Jwøk na en kur keere ni nyooth ree ni eni ena kur keere ki køør bëënynyö mare.

¹⁷Køøre nyïïdïëk ocämö dï paac kaamar kar kwaath marge, ni ö wëëlle ni caamge gïïa jootge wïth mïëri moa no oränynyö mo jøøa no okwär.

¹⁸'Ba otïmö ni leth jï jø wø tuut raay bäätge ki jöör tööt, kaawat man wø tuut gïrpiny bäädi ki thøøl, ni wø tuut rääö bäätge kaawat man wø tuut jää okweeny,

¹⁹ni beege jø wø cäänö ni ge jaŋa Jwøk ni wø köö, ni «Beerra man ö Jwøki ni lääde, beerra man ö eni ni lac tïïc mare, nee neenø. Beerra man ö eni na Jwø Icriel na en kur keere ni laar tïïe moe wëëk thur karge nee ŋääø.»

²⁰'Ba otïmö ni leth jï jø wø köö ni gïn mo raac beeye gïn mo beer, ni wø köö ni gïn mo beer beeye gïn mo raac; jø wø köö ni muudhö beeye tar, ni tar beeye muudhö, jø wø köö ni gïn mo keec ŋweeth, ni gïn mo ŋweeth keec.

²¹Otïmö ni leth jï jø wø köö ni leerra wïthge keerge, ni wø car riek waŋ marge keerge.

²²Otïmö ni leth jï jø wø nyeŋge ŋäc ki maath kwøŋ, ni wø teek ki maath wïth kwøŋ mo ojääbö;

²³jø wø jïëc luum dhaanhø mo mare raac ki køør gïn wø cïp ki piny, ni wø kwier luum ŋata beer na mare thïïŋ.

²⁴Kiper manøgønø, kaawat man wø ö leep maaci wø gam lethø, ni ö luummi mo otal ni thööri ya maaci, geni thuwø ge tïmö kaamar jenni mo lweetge otøp, mo bøøkge køøl jame køølø kaamar tør; kiper ciik Wuuö Jwøk, eni na wïth jammi bëët, akwierge, ni taakge luum gø, eni na Jwø Icriel na en kur keere.

²⁵Kiper manøgønø, wëëc Wuuö Jwøk ni wø liel kaamar maac, kïthe bäät jiye, ni tïŋ cere maal bäätge ni 'näk geni. Thuuri di jäŋö, ni ö dëët jiy moa no othøw ni tïmge kaamar wär mo oker piny nyeŋ jïëthe. 'Ba këël køør japøgø bëët, eni wëër mare poot ba paanye; cere poot bëëdö ni ee rwieø.

²⁶Eni ŋïï mare tïŋe maal nee joot wïth juurre moa kwörge bäyö, ni cwøl nyïïmän moa en teegi mo piny ki dwør lwiyø, nee laarge ö ni ge rwäänhnhö,

²⁷ni bäŋ dhaanhø mo ööl wala mo cwaanya tiere, ni bäŋ dhaanhø mo nanni wala mo butö; ni bäŋ kaw mo nilwak pëëtge wala thøøth war mo cööt.

²⁸Athëëre moge beth, na atume moge bëët ege niidø; tiet okwëënyi moge teek kaamar kïte, ni jïëth okwëënyi moge kany wø rïïŋge, tietge lwör kaamar atuunna.

²⁹Ni ge löörö kaamar ŋuu ma maath, ni löörö marge thuwø caala dööt cïgïïc ŋuuwe, kany wø ŋärge bäät caammi moge ni ge jwaa ge wøk, ni bäŋ ŋat käl gø wøk ceŋge.

³⁰Dïcäŋeca ge löörö bäätge kaawat man wø lwör athaŋ naama dwøŋ. 'Ba ni näk da ŋat mo raŋa bäät ŋöömö manøgø, eni muudhö ki bëëtö mo leth pute ka joot, kiper tar ree løøe baŋ muudhö ki køør pöölö.