Read anuak Aydheea 53 Bible Online

Aydheea 53 - anuak bible

Aydheea 53

¹?Aŋø, aŋa na ŋääth luumma køpwa? ?Na a jï ŋa na nyuth bat Wuuö Jwøk eni?

²Kiper dhaanh Wuuö Jwøk na näk ee jierø adøøŋŋø nyïm Wuuö Jwøk kaaman wø løth bat jaathi ri gutö, ni caala lweet jaath mo tuya yïth ŋøøm mo otal. 'Ba eni ba nëëni ni kare dwøŋ, ni bäŋ kït mïërö jïre ki man mäk nyeŋ jiyi dëëre, ni kïdö mare, jiy ba tuude ki man raŋi.

³'Ba ena bëëdö no otaaø no okwier jiyi, ni bëëdö ni kïmmö ni ena yi bëëtö mo leth. Jiy bëëdö ni täärnyïmge løøge wøk ki eni, kaamar dhaanhø mo dëëre da täw mo raac. Ena bëëdö no otaaø, ni kärø cädö døc kipere.

⁴Ka adïëri møn, ŋwiili 'moø alwøre, ni ö gïïa rämö ki ge ni käär ge. 'Ba ø ki dëëtø, ø poot köö ni gïïa leth na tägö dëëre tïïya Jwøki, no oraany Jwøki, no ocaar Jwøki.

⁵'Ba eni, dëëre ajïtö ki ŋwiili ki køør japa reyø na tïïø, eni gïï mo leth apïï dëëre kiper raay moø. Gïïa tägö dëëre beeye na jïtø ki bëët-mëër ki køørge; ni bee ŋwiili moa pïï dëëre na jöön dëëtø en.

⁶Øøni bëët, øøna tïmö kaamar rööm mo orwäänyö, ŋati man nø dëëtø ena gak ki waŋjööre keere. 'Ba Wuuö Jwøk raay 'moø bëët akïth bäät gø.

⁷Ena caari ni wëëgi jwør gïï mo leth, 'ba eni dhee käre tuuö; ena lïŋö kaamar nyidiel mo køøla baŋ ŋaal, ni neekïïl kaamar røømmø mo ena nyïm jø wø nyaar jïëye, ni dhee käre tuuö.

⁸Ena käl ni di caarø ni kïtha baŋ ajäla. 'Ba yi beenhnhø maneca, bäŋ ŋat mo ocädö kiper gïno tägi yi nyïm, kiper ena ŋul wøk yi ŋöömö mana näk mar kwøw, ni jwør gïï mo leth kiper raay mo jø pøø.

⁹Ena koony kanya koony jøøa reyø yie, ni bee kanya koony jøøa no okwär yie, këël na bëëde ni bäŋ gïn mo raac mo ee tïïö, ni bäŋ cwøk mo owïnyö dhee.

¹⁰'Ba beeye mana many Wuuö Jwøki ki man wëëk gø caarø ni jwør gïï mo leth, ni cïp jwïëc gø no olämi man wëën bääyö mar jiy ki gø. 'Ba cwiiye otïmö ni thööth, ni neen beenhnhø mano en yi nyïm. Gïïa met yi Jwøki ki ge otïïe ni wëëk ge thur karge.

¹¹Wuuö Jwøk aköö, ni «Køør gïïa jwøre ki cwïnye, yie omïnni kanyo joot gïno beer. Eni na dhaanhnha na mare beer, ki køør leec wïc mare, jiy mo thööth ojïëe ni marge beer ki køør mana käär raay moge.

¹²Kiper manøgønø, eno mooa ki kure dï moa teek, ni putge gø pääŋŋö na aciel ki ge na teek, kiper eni dëëre akïth yi thøø, ni kwaani røk jø adhala. 'Ba eni ki dëëre beeye na käär raay mo jiy mo thööth, na lämö kiper jø adhala.»