Read anuak Aydheea 57 Bible Online

Aydheea 57 - anuak bible

Aydheea 57

¹Dhaanhø mo beer thøw ni bäŋ ŋat mo kwany tier thøø mare. Jiy mo bëëtge beyø di kälö ni bäŋ ŋat mo kwany tier gø ki man näk mo ge käl kaper nee ge pääge ki raay.

²Jiy mo wø caath jöör adïëri, ge dønynya yi bëëtö mo beer; ge jïtö ki jwöm kany wø bëëtge ni geno pïël piny ni geno thøw.

³Wuuö Jwøk aköö, «'Ba uuni, u na wäät jø thïëth, na wäät kääpe, u na wäät jø wø gath dëëtge ki käp, ööu kany!

⁴?Aŋø, u buu ŋa? ?U ŋeethu bäät ŋa ni lëëpu you rwääö wøk? ?U patha wäät jø ageem, ni uuna wäät tööte?

⁵Juu mou na näk patha adïëri lammu nou døøa dëëtu ki käp tiet jenni moa no onigïït piny, ni nyïïu ŋallu ŋallø ni cïpu ge jïge no olämme deŋ nyeŋ näm ki tiet agäp-kïte.

⁶'Ba uuni nø, japa wøørru na en yïthakic kïte moa pøøth deŋ nyeŋ näm, beege noo tïmö na mou, na kuru; ka adïëri møn, uuna cïpö jïge ki muuce mo kwøŋ mo wø køny piny, ni mooyu geni ki muuce mo beel. ?'Ba you caarø ni cwïnya daa warø ki japøge?

⁷Kwör niine mou you tïïö maal wï kïdi mo bäär døc, nou etha maal bääte kaace thuwø kuna cïpu ko olämme.

⁸Kït gïï wø lammu you cwöth piny deŋ dhøk uudi mou, ni manøgø tïïyu nou kwiera aani; ni bëëdu nou bëëdö ka dëëtu kwör niine mou. Kany wø cou kwör niine mou, putu ka peeth ni laac jaak, ni dëëtu putu ka raanynyø ki jø wø mëërru ki niine ki ge, nou raŋŋa dëëtge na näk bäŋ abïïe.

⁹Uuna ci baŋ jwøa cwøl ni Mölek, ni cïpu jïre ki mädhi ki riie mo thööth; jiy mou ajääŋŋu kany mo bäär døc baŋ juu møøk, këël mana pïïcge piny kuya kar bëët jwïëc jøøa no othøw.

¹⁰Uuna ööl kiper waŋjöö maru na bäär døc, 'ba u kär köö, ni ‹Bäŋ gïn ŋääthwa këët nø.› 'Ba uuna jïtö ki teek mo nyään, ni bäŋ öölö mo you joodø këët.

¹¹«?Aŋø, aŋa na bwøgu ki gø na lwäyu ki gø, ni tïme nou cara tööt jïra en ni wïthu ba parru ki aani, ni bäŋ gïn caarru døøc kipera en? ?Aŋø, bee kiper mana bëëda ki kany mo bäär naa lïŋö, ni tïme naa ba lwäärru en?

¹²Aani, bëënynyö maru manø ni ŋääthu enø, ki tïïe mou, tïïa tïïö nee ŋäc, ki man näk mo bäŋ gïn mo kønyge dëëtu.

¹³Kït gïï wø lammu na näk you cooŋø, beerra man piemge uuni kany wø jwöŋu kiper køny. 'Ba ge poot käl jame kälö ge bëët; këël jam dhøk, ge køøle køølø bëët. 'Ba ŋato bëëdö ni ŋäätha göök mara, ŋöömö oci jïre, ni ö kïnna na en kur keere ni dööŋe jïre na mare.»

¹⁴'Ba Wuuö Jwøk oköö, ni «Thørru jöö, thørru, ni jiiŋŋu gø, daagu jammi bëët mo wø cwany tiel øtjöör jiya.»

¹⁵Kiper Wuuö Jwøk, eni na en maal na kare dwøŋ, ni wø bëëdö na bäre bäre, ni wø nyeŋŋe en kur keere, ena köö, ni «Aani, a bëëdö maal kany mo ena kur keere, naa bëëdö thuwø ni kara cään ki jiy moa näk cwïnyge opädhö kiper raay moge, ki jiy moa näk cwïnyge opädhö ki køør japa leth na pïï bäätge, nee jiy moa näk cwïnyge opädhö nee cwïnyge cøma, ni mooa jiy moa no ocaarø ki jwöm ki yïth cwïnyge.

¹⁶Kiper a ba bëëdö naa jälla geni cooth, naa ba gooti ki geni cooth; kiper noo nøøya ge, jwïëcge ränynyö nyïma, ni beege jwïëy moa cïba jïge, ge na cwääa.

¹⁷Aana gootø ki geni ni jääla geni kiper päl cwïny marge na raac, ni kana täärnyïma ki geni ni mara gootø. 'Ba këël na jääla ge, gena cäŋ bëëdö ni ge gaa wøk, ni bëëtge ni ge cäädhi ka køør jap wø many cwïnyge.

¹⁸Aani uutjïëthe moge ajooda, 'ba ge kønya kønyø; geno bwødha ni cäŋa cwïnyge cømmø, ge ni wø bëëdö ni ge kïmmö,

¹⁹ni tïïa ge naa pwøcge ki dhøkge, a na Jwøk. 'Ba bëët-mëër en jï jø wø kwörge bäyö ki jï jø wø kwörge cärö! Aani ge kønya kønyø.» Luummögø caana Wuuö Jwøki.

²⁰'Ba jøøa reyø bëëdö ni caala pï naama dwøŋ mo leeŋ athaga leeŋŋø, ni ba nikïïl, ni bëëtö marge caala gïï wø reyø ko odhöönh ni wø leeŋ athaga wøk.

²¹'Ba Jwøk mara aköö, ni «Bëët-mëër bäŋgø jï jø raay.»