Read anuak Aydheea 58 Bible Online

Aydheea 58 - anuak bible

Aydheea 58

¹Wuuö Jwøk aköö, ni «Kwöŋŋu døc ni ba wëëgu döötu jook; tïŋu döötu maal kaamar dwør tuuŋ, nou cara bääyö mar jiya ki raay moge, ge na nyïïkwaac Jeekap.

²Kiper a manyge manynyø ki yi cäŋ cooth, keda gena jiy mo yïthge met ki man ŋäcge uutjïëthe 'moa. Dëëtge ege tïïö kaamar jiy mo caatha køør bëënynyö, ni ge bëëdö ni caala jiy mo ciik Jwøk marge kärge wiiø. A pëënyge pëënynyö ki man ŋunna geni, keda gena jiy mo ge mëër ki man ena buutge.

³Ge köö, na ‹?Aŋø ni wø ba neenï wödö marwa en kany wø kwierwa cam ni marwa wödö? ?Na aŋø ni wø ba raŋï gø en kany wø dwøkwa dëëtwa piny ni wa mwöl?› «'Ba ka adïëri møn, uuni, kany wø wödu, u tïïya man wø manynyu keeru, nou bëëdö ni jø tïïc mou bëët you thiel piny.

⁴Ka adïëri møn, këël na bëëdu nou wödö, u poot pïëmu nou këëdö, ni dëëtu pöötu pöötö ka alööŋŋe mo reyø døc. Teeŋ wödö man wø wödu ki gø manøgø, döötu ba tïïe nee pïïe maal baŋa, a na Wuuö Jwøk.

⁵?Aŋø, teeŋ wödö manøgø beeye mana manynya, ni tïme ni beeye cäŋ man ö dhaanhø ni dwøk dëëre piny ni mwöl keere yie? ?Aŋø, beeye ki man ö dhaanhe ni kuul wïïe piny kaamar otöök, ni but piny yïth keece ki yi bur? ?Aŋø, manøgø beeye man wø cwøllu ni wödö, ni beeye cäŋ man wø jïëa, a na Wuuö Jwøk?

⁶«'Ba wödö mana manynya beeye en: Beeye ki man pätu jøøa no otwöö yi bëëtö mo leth, ni kälu tëëra peek wøk bäätge ni wø caal jaath man wø rïï ŋut dhieŋ ri puur. Beeye ki man pätu jiy moa no ocaannø, ni ö japa peek bëët na en bäätge, na caal jaath puur manøgø, ni kälu ge wøk.

⁷Beeye ki man pääŋŋu caammi mou ki jiy moa no onäk käci, ni ö jøøa canni moa näk thääyö jaak ni määnynyu ge ki kwör bëëte, ni ö jøøa näk cäädhi ka dëëtge ni runynyu dëëtge ka abïïe, ni ba løøu nyïmmu wøk ki tuŋi mou na näk rem dëëtu.

⁸'Ba ni näk mo gïïögø tïïyu tïïö, tar maru rieny kaawat man wø kwäär øwi, ni ö kønynyi maru ni laar nicäär. Bëënynyö maru bwödhö nyïmmu, ni ö ajiemmi mara, a na Wuuö Jwøk, ni en køøru ni koora uuni.

⁹Køøre noo cwøllu aani, a na Wuuö Jwøk, aani döötu wïnynya wïnynyö, ni kany wø jwöŋu kiper køny, løøa løø, ni ‹Aani en.› Ni näk mo tëëra peek ni wø caal jaath man wø rïï ŋut dhieŋ ri puur you käl wøk göök jiy; ni weyu jiy ki nyøthø ki lweetu nou jøøŋŋa ge;

¹⁰ni näk mo dëëtu you cïbö jï jøøa no onäk käci ki man mooyu geni ki cam, ni wëëgu jøøa näk ocaannø jääŋö kaawat man wø manyge, tar maru orieny yi muudhö, ni ö wäärri ni tïme kaamar dïcäŋ jïïu.

¹¹A na Wuuö Jwøk, u bwødha bwødhø cooth, ni mooa uuni ki cam yi cäŋa kwaar døc dïtëën kaawat man wø manynyu, ni wëëga cuu mou tëënnö. Bëëtö maru tïïa tïïö kaamar ajïniina mo di jøøyø ki pïï, ni tïme kaamar jøøro mo pïïe ba tal.

¹²Jiy moo ööi ki rou, mïëri mo acääŋŋe moa no oränynyö odwøkge karge, ni ö kwöra no opädhö ri kiir mana no ojal ni tïŋge ge maal ni ge geera ge. Køøre u di cwølø ni jøøa cäŋ kiir mana no opädhö geerrø, na jøøa dwøk uutjïëthe ki uudi karge.»

¹³«Ni näk mo dëëtu mänu mänö ki man tïïyu jap wø mïn yïthu ki ge yi cäŋ jwömö mara na en kur keere, ni cwøllu gø na cäŋ met ec na cäŋa en kur keere na näk owøørø na mara, a na Wuuö Jwøk, ni wøørru gø nou ba cäädhi ka jöö maru keeru, nou ba tïïc jap wø mïn yïthu ki ge keerge, nou ba cäänö ki luup mo oballe,

¹⁴køør japøgøøni, u jïtö ki met ec baŋa, a na Wuuö Jwøk. U tïŋa maal bäät piny, ni wëëga u cam gïïa beyø yi ŋöömma ci jï kwaru ma Jeekap.» Luummögø caana Wuuö Jwøki ki dhee kiree.