Read anuak Aydheea 59 Bible Online

Aydheea 59 - anuak bible

Aydheea 59

¹Ka adïëri møn, cer Wuuö Jwøk ba ciek ki man kunye, eni wïnyö ni patha miiŋ;

²'Ba bee gïïa bayu na wëëk uuni apääk ki Jwøk maru, ni kan täärnyïme ki uuni kiper raay mou, ni tïme ni bäŋ gïn wïnyi jïre.

³Kiper ceŋŋu atïmö ni ba waany ki rem jiy moa kønynyu piny, ni lweetu bëëdö ni temma gïï mo reyø. Dhøgu päŋ ki luup tööt, ni lëëpu cara luup mo reyø.

⁴Bäŋ ŋat mo caath køør ŋøl luup ma kare, ni bäŋ ŋat mo cäänö ka adïëri kar ŋøl luup. Uuna tïmö nou ŋäätha luup mo bäŋ tietge, nou cara luup tööt. Ni ö gïïa reyø na tïïyu ni tïme ni ena yïthu kaamar dhaanhø mo ena ec, ni puti nywøl na gïn mo raac.

⁵U tudö ki luup mo reyø ni caala man wø tøk tøŋø mar olwierø, 'ba ni näk da ŋat mo cama tøŋø manøgø, eni thøw; 'ba noo tøk tøŋø, ööa wøk no olwierø. Ni päärru thøøth othïënhö ki man wenynyu ge,

⁶'ba thøøth othïënhö moa wenynyu ba tïmö na abïï, ni ba løny ki man rïëpu dëëtu ki gø. Tïïe mou reyø, ni ceŋŋu temma gïï mo reyø.

⁷Tietu ŋwieya køør gïïa reyø, ni u wø lääta baŋ køny rem jøøa beyø piny. Acaare mou beege acaare mo reyø, ni uutjïëthe mo wø caathu bëët, u temma gïï mo leth ka aranya.

⁸Uuni øtjöör bëët-mëër kuyu, ni bäŋ ŋøl luup ma kare uutjïëthe mou. Uutjïëthe mou you tïïö no oköömmö, ni ŋat wø cør yïthge bäŋ bëët-mëër mo ŋääe.

⁹Kiper manøgønø, ŋøl luup mana näk adïëri kare atïmö ni bäär ki øøni, ni ö bëënynyö ni ba pïïe baŋø. Øøni tar amanynyø, 'ba jammi bëët atïmö na muudhö, ni manynyø tac øw, 'ba øøna tïmö ni ø cäädha yi muudhö.

¹⁰Øøna tïmö kaamar cööye mo thäämmö dëër øtø, ni thäämmø kaamar jiy mo bäŋ nyeŋ jïge; ni cwanynyø tietø ki dhöör cäŋ keda pinynya wäär, ni putø tïmö kaamar jiy mo othøw yïthakic jøøa teek.

¹¹Øøni bëët øøna jwöŋö kaawat man wø jwöŋ cwienynyi, ni tïmø ni ø ŋurö kaamar akuyi. Øøna bëëdö ni ø koora ŋøl luup ma kare, 'ba atïmö ni bäŋgø, ni manynyø man piem øøni, 'ba kare atïmö ni bäär ki øøni.

¹²Kiper gïïa reyø na tïïø atïmö ni thööth døc nyïm Wuuö Jwøk, ni ö raayi moa tïïø ni jäälge øøni; bëëtö marø na raac nëënö jïïø, ni gïïa näk yøø bayø ŋääø;

¹³ni beege tïïc gïïa reyø, ki mooŋ Wuuö Jwøk, ki løø nyïm wøk ki Jwøk marø; ka acoona mar caar jiy, ka ageem, ki car luup tööt mo wø cooŋø ki yïth cwïnynyø.

¹⁴Køøre ŋøl luup ma adïëri adwøk ŋäc, ni ö bëënynyö ni cuŋŋe ni kare bäär; bëët adïëri apäth piny nyeŋ jïëthe, ni ö bëëtö mana thïïŋ ni dööŋe wøk.

¹⁵Kare møn, adïëri arwäänyö, ni ö ŋat wø kwier bëët raay ni tïme ni di caannø. 'Ba kanya ö Wuuö Jwøki na joot gø ni bäŋ ŋøl luup ma kare, yie atïmö ni raac.

¹⁶Ajoode møn ni bäŋ dhaanhø mo jooga jiy, ni thäŋ yie. Kiper manøgønø, bade na teek, køny atïïe keere, ni ö bëënynyö mare ni cwak eni.

¹⁷Bëënynyö arøø dëëre kaamar kwöt leny, ni ö pïëm man wø piem jiy ki gø ni kïth gø wïïe kaamar cöör; cool kwöri arøø dëëre kaamar abïï, ni rïëp këëyö dëëre kaamar aleeŋŋa.

¹⁸Wuuö Jwøk wëër, ni cool kwör dëët jøøa gëëmö ki eni, ki nyïïmän moe ki køør gïïa tïïcge; eni kwör di coolø dëët wïth juurre mo wø bëëdö yïth mïëri moa en bäät naama dwøŋ.

¹⁹Ni ö jø wø bëëdö jï løø kur pänh-cäŋ ki jø wø bëëdö jï løø kur tuul-cäŋ ni putge lwäyö ki nyeŋ Wuuö Jwøk ka ajiem mare; kiper Wuuö Jwøk öö kaamar jwïïö mo pänhnhö, mo køøle ka jam dhee.

²⁰'Ba mana caan Wuuö Jwøki bee en, ena köö, ni «Da ŋat mo wïïla jiy wøk mo ööa yi Dhayan ni ööa baŋu, u na jø dhi øt Jeekap moa køp raacge.

²¹«'Ba aani, a na Wuuö Jwøk, luubö mano tuuda ki uuni beeye en. Jwïëy 'moa na kïtha bäätu, ki luup 'moa na kïtha dhøgu, bëëdö ni ge ba ö wøk dhøgu, ki dhøk obwöre mou, ki dhøk nyïïkwaayu ki mano täge ennø, këël bäre bäre. Manøgø caana aani, a na Wuuö Jwøk.»