Read anuak Aydheea 60 Bible Online

Aydheea 60 - anuak bible

Aydheea 60

¹Wui Jerucalem, päny maal ni rienyï, kiper tar marï aöö; ajiem mar Wuuö Jwøk apïï dëërï.

²Ka adïëri møn, muudhö bäät piny aume, muudhö mo cøl ena bäät wïth juurre; 'ba Wuuö Jwøk ööa baŋï, ni ö ajiemmi mare ni nëëne bäätï.

³'Ba wïth juurre oö yi tar marï, ni ö nyeye ni öge yi däär tar marï mano rieny.

⁴Tïŋ wïïï maal ni lwïthï, jiy moï bëët rege acooŋge ni ge ööa baŋï; wäätï gena cäänhnhö ki kany mo bäär, ni nyïï di käärö ki tiet jööthi.

⁵'Ba oraŋï ni mïn yiï, cwïnyï omïnni ni pääŋe ki met ec; kiper mano ö jap kwärö mo naama dwøŋ noo käli jïrï, ni ö kwärö mar wïth juurre ni ö baŋï.

⁶'Ba athïrööle mo thööth ŋöömö marï opääŋge, ni beege athïrööle moa therø mo jø Midien ki jø Gëpër. 'Ba jø wø en Cïïba bëët geno ööi ni ge käädö ki warkey ki jer wø jïcge ŋwääi ni met, ni ge pwøya Wuuö Jwøk ni ge køpa luubö mo nyään mo met.

⁷'Ba pïïth dïëk bëët mo jø Këdar ogwäär baŋï, ni ö nyöök rööm mo jø Nebayöt ni kønyï riï ki ge; geno jïëc ki man cïp geni no olämme bäät gïn wø cïp olämme bääte mara, a na Wuuö Jwøk, ni ööa ni jiema øtø mara na näk øt ajiem.

⁸?Aŋø, moi aŋaani ni määdö kaamar pøøl ii, ni caal akuyi mo lääta yïth uudi moge ii?

⁹Ka adïëri møn, wïth juurre mo wø bëëdö yïth mïëri moa en bäät naama dwøŋ, jïra oneetge, ni ö baabuure mo Tarcëc ni kwøŋge pïï, ni ge käla wäätï ki kanya bäär, ni wäätï gwet-bïrö moge ki warkie moge käärge käärö, ni ge ööa kuna wøørge Wuuö Jwøk, Jwøk marï, ni beeye Jwø Icriel na en kur keere; kiper eni ajiem mo dwøŋ acïbe jïrï.

¹⁰Wuuö Jwøk aköö jï Jerucalem, ni «Jøøa path, kiir marï ocäŋge geerrø, ni ö nyeye moge ni tïnyge ïïni. Këël na bëëdï niï yaa raanynyø ki gootø mara, mëër mara nyoodha nyoodhø jïrï ki køør bäth ec mara.

¹¹Dhøk kiir marï bëëdö no ojabø cooth, ni ba cïëgi ki dïcäŋ ki wäär, kiper nee wïth juurre jap kwär moge kälge jïrï, ni öge ki nyeye moge ni jøl geni.

¹²'Ba wï jur ki buc nyec mano ba tïny ïïni, ge ränynyö; wïth juurre moo ba tïny ïïni wïthge dïdö na bäre.

¹³Ajiem mar Lur Libaanø di kälö jïrï, ni beege teeŋ jenni moa perge leth, nee øt lam mara nee tïïc ni mïërö ki ge, ni wëëga kar bëët tieta jiem.

¹⁴'Ba wäät jøøa dïïm ïïni geno ööi ni këëlge cøŋge piny nyïmï; jiy bëët moa taak ïïni, wïthge okuulge piny ni nuumge tietï ni ge wøøra ïïni, ni cwølge ïïni ni Pääny Wuuö Jwøk, ni bee ï Dhayan na näk mar Jwø Icriel na en kur keere.

¹⁵«Këël na bëëdï ni ïïno kwierø ni jiy omännö ki ïïni, ni bäŋ ŋat mo cur dïërï, ï na Jerucalem, nyeŋŋï tïŋa maal ka ajiem mo bëëdö na bäre bäre, ni tïmï ni ïïna kar met ec jï beenhnhe moo ööi cään bëët.

¹⁶Ïïni, jap kwärö marï ojootï baŋ wïth juurre ki nyeye, kaawat man wø dhøøth nyilaalli ki caak kö menni. Køøre, putï ka ŋäc ni bee a na Wuuö Jwøk, a na pïëmi marï, ni bee a na wïïl ïïni wøk, a na Jwøa teek mar Jeekap.

¹⁷Aani, a känna baŋï ki warkey, na kar nywïënyö ma jwïël, a känna baŋï ki gwel-bïrö, na kar nywïënyö jaak, a känna baŋï ki nywïënyö ma jwïël, na kar jaath, ni känna baŋï ki nywïënyö, na kar kïte. Bëët-mëër tïïa tïïö na gïn käär akwöma marï ki gø, ni tïïa bëënynyö na gïn bwøth ïïni.

¹⁸Kanyøgø bëët aranya otïmö ni bäŋgø mo wïnynyi yi ŋöömö marï këët, ni bäŋ aranya wala dïïr wïc mo wïnyö dïërï, ï na Jerucalem; 'ba kiir marï oputï cwøl ni Pïëmi, ni ö dhøgi moe ni cwølï ge ni Pwøc.

¹⁹Kanyøgønø, otïmö ni patha cäŋ këët noo cïp tar jïrï, ni patha tar mar dwääy noo rieny bäätï; 'ba a na Wuuö Jwøk, aano tïmö na tar marï mano bëëdö na bäre bäre; a na Jwøk marï, aano tïmö ni aana ajiem marï.

²⁰Cäŋ obëëdö ni ba pädhi bäätï, ni bëët dwääyi ni ba ci muudhö; kiper a na Wuuö Jwøk, a tïmö na tar marï mano bëëdö na bäre bäre, ni ö nïr kïmmö moï ni thumge.

²¹Køøre jiy moï bëët otïmö ni beyø, ni ö geni ni ci ŋöömö jïge na bäre bäre, ni beege gïïa tïïa ki ceŋŋa, na caal jenni mo otøø ni løthge, nee nyeŋŋa jiem rege.

²²Dhaanhø aciel onyaay na wï tuuŋ mo dwøŋ, ni ö wï tuuŋ mo thiinh ni nyaae ni tïme na wï jur mo teek. Aani, a na Wuuö Jwøk, gïnögø laya layø, ni wëëga gø thur kare yi caanne.»