Read anuak Aydheea 62 Bible Online

Aydheea 62 - anuak bible

Aydheea 62

¹'Ba kiper nyeŋ Dhayan a ba nikïïl; kiper nyeŋŋe, eni na Jerucalem, a ba bëëdö naa lïŋö, këël kanyo ö bëënynyö mare noo kwääre kaamar tiet cäŋ mo tuulö, noo ö pïëmmi man piem eni ki gø noo liele kaamar ameeth.

²Wui Jerucalem, bëënynyö marï ojoot wïth juurre, ni ö ajiemmi marï ni jooti ya nyeye bëët; ïïno cwøl ki nyeŋ mo nyään, ni beeye nyeŋ mano cur dhi Wuuö Jwøk.

³Ïïno tïmö ni ïïna aduda mar ajiem cer Wuuö Jwøk, ni ïïna aduda mar nyec cere, eni na Jwøk marï.

⁴Køør man ï ba cwøl këët ni ïïna pääny mo okwierø, ni bäŋ ŋat mo köö këët ni ŋöömö marï bäŋ gïrpiny yie. 'Ba ïïno cwøl Wuuö Jwøki ni Dhaaŋŋa Met Yia Ki Gø, ni ö eni ni cwøl nyeŋ ŋöömö marï ni Dhaaŋŋa Nywøma; kiper Wuuö Jwøk yie met ki ïïni; eno mëëyi ki ŋöömö marï kaawat man wø nywøm dhaagø.

⁵Kaawat man wø ö dïcwøø wø nywøm nyakøø, ï na Jerucalem thuwø wäätï omëëyi ki ïïni; kaawat man wø ö dïcwøø wø mïn yie kany wø tïŋ cïïe na dhaagø thiinh, Jwøk marï thuwø yie mïnnö ki ïïni.

⁶Wui Jerucalem, Wuuö Jwøk acïpö ki dïkuye bäät kiir marï, mo ge bëëdö ni ge rwääö ki yi cäŋ ki wäär bäre ni ge ba lïŋi. 'Ba uuni ni wø par wï Wuuö Jwøk, kär dee jwöm mo tïïyu kiper dëëtu,

⁷ni ba wëëgu eni jwöm thuwø këël kanyo këël tier Jerucalem piny ni teek, ni mooc gø ka ajiem bäät piny.

⁸'Ba Wuuö Jwøk akööŋ bäät cer cwïïe, ni beeye bäät bade na teek, ni kööe, ni «Beel mou ba cïba na cam jï nyïïmän mou këët; ni bäŋ juurre mo path mo mädhö ki kwøk nyïïomøki mo nyään këët moa jootu ki køør tïïa leth na tïïyu.

⁹'Ba jiy moo cooŋ beel, beel camge camø, ni pwøcge aani, a na Wuuö Jwøk, ni jiy moo cooŋ nyïïomøki, kwøk nyïïomøki omaathge yi kal mara na en kur keere.»

¹⁰U na jø Jerucalem, cou dønynyu wøk ki dhøk kiir, ni tïïyu øtjöö ni leer kiper jiy; thørru jöö nee tïme na øtjöö mo dwøŋ, ni daagu kïte yie, ni mooyu gø ki ŋïï nee ŋäc jiyi bëët.

¹¹Ka adïëri møn, Wuuö Jwøk rwääö ni cäänna teegi mo piny bäre, ni kööe ni caannu jï jø Dhayan, ni «Neennu, pïëmi maru öö, ni käära jøøa ööle kiperge, ni beege jiy moa joode ni wø cäädhi nyïme.»

¹²Køøre jøøgø, ge di cwølø ni gena jiy mo ena kur keerge, ni beege jøøa wïïl Wuuö Jwøki wøk, ni cwøl Jerucalem ni Pääny Mana Manynyi, na Pääny Mo Kär Wiiø.