Read anuak Aydheea 8 Bible Online

Aydheea 8 - anuak bible

Aydheea 8

¹Køøre Wuuö Jwøk aköö jïra, ni «Lwötï ko opäm mo dwøŋ ni göörï luummi yie ni nyeŋge døøŋŋø, ni ‹Kar mak jiy ki tøŋ acäännö; kar twëër jammi arwänhnhö.›

²'Ba a na Wuuö Jwøk, a jëëdö ki jiy mo oŋäädhö mo tïmö na lïŋŋe kipera, ni bee Uria na näk dïlämi, ki Dhekaraya o Jeberekiya.»

³Køøre a na Aydheea, aana ci baŋ cïïa, ni jït yie ki dhaanhø, ni nyööte ki nyilaal ma dïcwøø. Kanyøgø Wuuö Jwøk aköö jïra, ni «Cak nyeŋŋe ni Maër-Caalal-Ac-Bac, [4]

⁴kiper kanyo poot nyilaalli manøgø ni wänni ki menni poot ba cwøle na Awuuö wala Ayaŋ, jap kwärö moa en Damacka ki jammi moa twier Cameria olwør nyeny Aciria ni aae ki geni.»

⁵Kanyøgø Wuuö Jwøk acäŋ cäänö ki aani ni kööe,

⁶ni «Kiper mana ö jø Juuda ni kwierge pïï moi ni muuli mëëth ii na käl Naam Cilöa, ni tïme ni yïthge mïnni ka Recin ki o Remaliya,

⁷ennø, a na Kwäärö Wuuö Jwøk, pï Naam Upareeti na thööth ni wø kwönni ni teek jääŋŋa jääŋŋö Juuda, ni beeye nyeya mar Aciria ka ajiem mare bäre; ni tïme kaamar pïï mo onithar yïth nyeŋŋi mo Juuda bëët, këël mano mut ageele moge bëët.

⁸Køøre pïï kwönna dï Juuda bäre ni muulö ki dïëre bäre na jwïëö, këël mano päŋe noo këët cwaak, këël mano ö were moe noo gaaŋge na løle ni put ŋööm Juuda bäre thaar, ni beeye ŋöömö marï, ï na Imanuwel.»

⁹Wui, u na wïth juurre, cooŋu rou kanya ciel, 'ba bäätu poot pädhö; uuni ni wø en kwör mo bäyö bäät piny bäre enø, cegu ïthu. Jegu dëëtu, 'ba bäätu poot pädhö; jegu dëëtu jaak, 'ba bäätu poot pädhö.

¹⁰Tïïyu uutjïëth tïïe mou, 'ba bäŋ gïn duuge; cïbu uutjïëth tïïe mou piny, 'ba ba løny tïïc jïïu, kiper Jwøk ena buutwa.

¹¹Kiper Wuuö Jwøk acäänö ki aani ni cere na teek ee cïp bääta, ni kööm aani ki man ba cäädha ki jöör jø Juuda, ni kööe,

¹²ni «Gïn wø kö jøøgø na ageem, kär jïëyu na ageem, ni ba lwäärru ki gïn wø lwäärge, wala u wëëga cwïnynyu bwøk ki gø.

¹³'Ba a na Wuuö Jwøk na näk wïth jammi bëët beeye a ŋata dou wøørø ni ena kur keere, ni beeye a ŋata dou lwäärö, ni beeye a ŋata di cwïnynyu böö ki gø.

¹⁴'Ba aano tïmö na kar bëëtö mana en kur keere kiperu; 'ba kiper dhi øt Icriel bäre beeye a kïnno cwany tiel noo wëëk ge pädhö, noo tïmö thuwø na akupa ka abïëp kiper jø Jerucalem.

¹⁵'Ba mo thööth tietge ocwanyge ri kïnnögø, ni päthge ni tøcge; ni ö møøki ni mak geni ka abïëp.

¹⁶'Ba ïïni, wëëk luup 'moa kan cwïny bääga, ni dëëdï ge cwïnyge nee gwøkge.»

¹⁷'Ba aani, Wuuö Jwøk na kan täärnyïme ki dhi øt Jeekap koora koorø; ni bëëda naa ŋäätha gø.

¹⁸Raŋï, Wuuö Jwøk, eni na wïth jammi bëët ni wø bëëdö bäät Kïn Dhayan, aani ko obwöre moa cïbe jïra, wa ee cïbö na ŋïïce na nyuuthe kiper jø Icriel.

¹⁹Kanyo cään jiyi ki uuni, ni «Pëënynyu jøøa näk rege da juu mo cøøra jwïëc jiy moa no othøw, jø wø ŋuri ni muuŋö,» käru jïëy. ?Aŋø, jiy ba doo na ge pëënynya Jwøk marge? ?Aŋø, jøøa no othøw doo pëënynyö kiper bëët jøøa kwøw?

²⁰Beerra man cïpge ŋäädhe marge ri pwöc Wuuö Jwøk ki ciik moe. 'Ba ni näk luummögø ba tïïcge, nyootha gø ni bäŋ tar bäätge.

²¹'Ba geno bëëdö ni ge thääyö dï ŋöömö ni bëëtö marge leth ni geno 'näk käci. 'Ba kanyo ö käci noo 'näk geni, geno gooti ni cienge nyeya marge ki Jwøk marge ni ge raŋŋa maal.

²²Køøre bäät piny oraŋge, ni tïme ni ge joota bëëtö mo leth ki muudhö ki lwøc mo di lwäärö; ni put geni køøl yi muudhö mo cøl døc.