Read anuak Ciik Kiper Dïlämme 1 Bible Online

Ciik Kiper Dïlämme 1 - anuak bible

Ciik Kiper Dïlämme 1

¹'Ba Wuuö Jwøk Modhe acwøle ki yo oduŋkaany røømmø,[1] ni cään gø ni kööe,

²ni «Caanï jï jø Icriel ni kööï jïge, ni ‹Kany wø näk dhaanhø mo ena dïïu kännö ko olämi jï Wuuö Jwøk, olämi mano kälu wär tïme ni käla røk dhäk wala røk dïëk.

³« ‹Ni näk mo olämi mare beeye olämi man wø waaŋ bäre mo käla røk dhäk, eni wär cïbe na rwaath mo bäŋ gïn mo ogwäyö dëëre, ni kanyo cïp gø yie beeye dho oduŋkaany røømmø, kiper nee eni jïëc nyïm Wuuö Jwøk.

⁴'Ba eni cere wär cïp bäät wï olämi man wø waaŋ bäre manøgø, kiper nee olämi manøgø jïëc no okïdi na kar ŋatøgø.

⁵Køøre eni rwaath manøgø wär ŋaale nyïm Wuuö Jwøk, ni ö dïlämme, wäät Aran, ni lwørge remø ni kønyge gø dëët bööp gïn wø cïp olämme bääte mana en dho oduŋkaany røømmø.

⁶Køøre eni olämi man wø waaŋ bäre manøgø wär jaaŋe ni bak gø na thäŋi.

⁷Ni ö dïlämme, wäät Aran, ni cïpge maac bäät gïn wø cïp olämme bääte ni kumge jenni bäät maac.

⁸Køøre dïlämme, wäät Aran, rïŋö kwöra bagi na thäŋi, këël ki wïc ki dwäälö, peethge peedhø na kare bäät jenni moa no oäbö bäät gïn wø cïp olämme bääte.

⁹Ŋata cïp olämi manøgø, ec ki tiel wär penye ki pïï. Køøre dïlämi olämi manøgø waaŋe waaŋø bäre bäät gïn wø cïp olämme bääte, ni beeye olämi man wø waaŋ bäre, no olämi man wø waaŋ ki maac man wø ŋwääi ni met jï Wuuö Jwøk.

¹⁰« ‹'Ba ni näk mo olämi mar ŋatøgø käla røk rööm wala røk atëëe, no olämi man wø waaŋ bäre, wär tïme ni cïbe na nywøk mo bäŋ gïn mo ogwäyö dëëre.

¹¹Ni kanyo ŋaal gø yie beeye buut gïn wø cïp olämme bääte jï løø wï-piny ni ŋaale nyïm Wuuö Jwøk. Køøre dïlämme, wäät Aran, remø mar olämi manøgø kønyge dëët bööp gïn wø cïp olämme bääte.

¹²Ŋatøgø olämi wär bage na thäŋi, køøre dïlämi gïïögø ki wïc ki dwäälö peedhe peedhø na karge bäät jenni moa no oäbö bäät gïn wø cïp olämme bääte.

¹³Ŋata cïp olämi manøgø, ec ki tiel wär penye ki pïï. Køøre dïlämi olämi manøgø bäre lwøre lwørø ni waaŋ gø bäät gïn wø cïp olämme bääte, ni beeye olämi man wø waaŋ bäre, no olämi man wø waaŋ ki maac man wø ŋwääi ni met jï Wuuö Jwøk.

¹⁴« ‹'Ba ni näk mo olämi mar ŋatøgø mano cïbe jï Wuuö Jwøk beeye olämi man wø waaŋ bäre mo käla røk weny, eni olämi manøgø wär tïme ni lwøre røk atuuy wala røk akuyi.

¹⁵Køøre dïlämi olämi manøgø lwøre lwørø ni kïth gø buut gïn wø cïp olämme bääte; ni meen ŋut gø, ni cööt wï gø wøk ni waaŋ gø bäät gïn wø cïp olämme bääte; ni ö remø mare ni twiinyi piny buut gïn wø cïp olämme bääte.

¹⁶Ni ö eni thuwø ni käl looŋ gø wøk ki cam mana en yie, ni wet ge ki buut gïn wø cïp olämme bääte, ni wete jï løø kur tuul-cäŋ jï løø wø wet bur yie.

¹⁷Køøre dïlämi bwöp gø maae maaø ni jeec gø, 'ba ba pääŋŋe ki dïëre bäre, ni ö eni na dïlämi ni waaŋ gø bäät gïn wø cïp olämme bääte, bäät jenni moa no oäbö. Ni manøgø beeye olämi man wø waaŋ bäre, no olämi man wø waaŋ ki maac man wø ŋwääi ni met jï Wuuö Jwøk.