Read anuak Ciik Kiper Dïlämme 10 Bible Online

Ciik Kiper Dïlämme 10 - anuak bible

Ciik Kiper Dïlämme 10

¹'Ba Nadap ka Abiyu, wäät Aran, athääk jwïëlli mo mäc moge alwørge ni tøøge mäc yïthge, ni kïthge gïn wø jïye ŋwääi ni met bäätge, ni cïpge maaøgø nyïm Wuuö Jwøk na maac mør jaak mo geni käre köömmö ki gø.

²'Ba kanyøgø maac aput nituc ki nyïm Wuuö Jwøk, ni waaŋ geni, ni putge thøø nyïm Wuuö Jwøk.

³Ni put Modhe köö jï Aran, ni «Manøgø beeye gïna caan Wuuö Jwøki na kööe, «ni ‹Jiy mo wø nyänh buuta naa tïnyge, a wär raŋge naa ena kur keera, naa bëëdö naa di wøørø nyïm jiy bëët.› » 'Ba Aran alïŋö jaak.

⁴'Ba Modhe Micaël ki Eldapan, wäät Udhiel cöök wää Aranni, acwøle ni kööe jïge, ni «Ööu nyïm kany ni lwørru tuuŋu ii nyïm kany ni en kur keere en, ni kïthu geni wøk ŋää twïër.»

⁵Kanyøgø gena put ö nyïm ni lwørge geni ni jalabiiye moge poot ena dëëtge, ni kïthge geni wøk ŋää twïër ki køør mana caan Modhe.

⁶Køøre Modhe aköö jï Aran ki jï wäät Aran ma Eliedhar ki Itamer, ni «Uuni, kär jïëyu weyu ni rege jwälö, ni ba jeeyu abïïe mou, kiper nou ba thøwu, nee Wuuö Jwøk ba wëëre ki dhaanh Icriel bäre. 'Ba tuuŋu ma jø dhi øt Icriel keerge jwöŋö kiper jiy moøgø moa waaŋ Wuuö Jwøki.

⁷'Ba uuni käru døny wøk ki dho oduŋkaany røømmø, kiper nou ba thøwu; kiper maar rööny mar Wuuö Jwøk ojør dëëtu.» 'Ba geni gïnögø aputge tïïc ki køør luum Modhe.

⁸'Ba køøre Wuuö Jwøk acäänö ka Aran ni kööe,

⁹ni «Ïïni ki wäätï, kär nou bëëdö ni uuno mädhö ki køøŋ nyïïomøki wala køøŋø mo keec, kany wø cou yo oduŋkaany røømmø, kiper nou ba thøwu. Manøgø tïmö na ciik mo bëëdö na bäre bäre ki yïth beenhnhe mou,

¹⁰ki man bëët gïna näk ocïp kur keere na mar Jwøk ni you pääö ki jammi møga jaak; ki man bëët gïna waanynyi ni you pääö ki gïna ba waany;

¹¹ki man pwönynyu jø Icriel ki ciik bëët moa caana jïge, a na Wuuö Jwøk, ki ri Modhe.»

¹²'Ba Modhe aköö jï Aran ki wäät Aran moa dööŋ ni kwøw, ni beege Eliedhar ki Itamer, ni «Lwørru muuy mar møk beel mana dööŋ ro olämi man wø waaŋ ki maac jï Wuuö Jwøk, ni cammu gø no otïïö ni bäŋ thømmø dëëre, ni cammu buut gïn wø cïp olämme bääte; kiper beeye gïn mo ena kur keere mo pere leth.

¹³Wär tïme ni cammu yi kany mo ena kur keere; kiper beeye kuru ki wäätu røk olämme mo wø waaŋ ki maac jï Wuuö Jwøk, kiper manøgø beeye gïna kööm aani ki gø.

¹⁴'Ba gøŋŋø mana tuuŋŋi yi jamø no olämi ki ääm mana cïp no olämi, wär tïme ni cammu kany mo waany, ni beeye uuni ki wäätu ki nyïïu, kiper geno cïbö na kuru ki wäätu røk olämme mo wø duunni ki mëër ni wø cïp jø Icrielli.

¹⁵Ääm mana cïp no olämi ki gøŋŋø mana tuuŋŋi yi jamø no olämi wär käli na aciel ki dwäälö man wø waaŋ ki maac no olämi, ni tuuŋŋi yi jamø no olämi nyïm Wuuö Jwøk. 'Ba manøgø tïmö na kuru mo bëëdö ni nut cooth jïïu ki jï jøw käl dëëtu, ki køør mana cem Wuuö Jwøki.»

¹⁶'Ba kanya ö Modhe na many jöör ateea døøc mar olämi mar wëën raay, ka adïëri møn, ajoode no owaaŋø bäre. Ni ö eni ni put wëër ki Eliedhar ki Itamer, geni na wäät Aran moa dööŋ ni kwøw, ni kööe,

¹⁷na «?Aperŋø na ba cammu olämi mar wëën raay yi kanya en kur keere? Kiper eni ena kur keere ni pere leth; ena cïp jïïu nee bääyö mar jø Icriel tïme ni ena bääte ki mana tïï no okïdi kiperge nyïm Wuuö Jwøk.

¹⁸Kiper mana näk mo remø mare kär kïth yi kanya en kur keere, ka adïëri møn, doo na mo rïŋŋe you camø yi kanya en kur keere, kaawat mana cema gø.»

¹⁹'Ba adwøk Aranni jï Modhe, ni «Neenï, dïcäŋi kiree, geni olämi marge mar wëën raay, ko olämi marge man wø waaŋ bäre acïpge nyïm Wuuö Jwøk. ?Aŋø, kaawat man bëëde ennø ni da gïï mo opänh bääta, doo na mo aano cämö ki rïŋ olämi mar wëën raay, doo tïmö na gïn mo Wuuö Jwøk yie mïnnö ki gø?»

²⁰'Ba kanya ö Modhe na wïny gïnögø, aput tïmö na gïn mo yie mïnnö ki gø.