Read anuak Ciik Kiper Dïlämme 13 Bible Online

Ciik Kiper Dïlämme 13 - anuak bible

Ciik Kiper Dïlämme 13

¹'Ba Wuuö Jwøk acäänö ki Modhe ka Aran ni kööe,

²ni «Ni näk da dhaanhø mo da gïn mo opäny wøk ri buny dëëre, wala nyoonynyø, wala kany mo obuth mo løny ki man tïme na täw mo muuö, eni wär käli ni kïthi baŋ dïlämi ma Aran wala baŋ dïlämi man nø røk jø wø käl dëëre.

³Ni ö dïlämi ni raŋ gïna näk opäny wøk ri buny dëël; 'ba ni näk mo jïër moa en yi waŋ ŋwellø rege ege wiilø ni tar, ni ŋwellø nëëni ni ree ee luut piny ni buny dëël ee wii maal, gïnögø beeye ŋwellø mar täw buny dëël. Ni ki køør mana ö dïlämi na raŋ gø, wär put caan ki man näk mo ŋatøgø ba waany.

⁴'Ba ni näk mo gïna näk obuth nëëni ni tar jaak bäät buny dëëre, ni nëënnö mare ree paa ee luut piny, ni jïër moa en waŋe rege kärge wiilø ni tar, dïlämi ŋatøgø ni dëëre da ŋwellø enø wär tïïe nee bëëde kur keere ki nïne abïriiø.

⁵'Ba noo tïme na ri bïriet nïne, dïlämi ŋatøgø wär raŋe; 'ba noo nëën ŋwellø ki jïre ni dëëre käre wiilø, ni ŋwellø kär nyaay bäät buny dëëre, dïlämi ŋatøgø wär tïïe nee bëëde kur keere ki nïne abïriiø møøk.

⁶'Ba noo tïme na ri bïriet nïne, dïlämi ŋatøgø wär cäŋ raŋŋø; 'ba ni näk mo ŋwellø odøø piny ni kär nyaay bäät buny dëël, dïlämi wär caane ki man näk mo ŋatøgø waany. Gïnögø beeye nyoonynyø jaak. Køøre ŋatøgø abïïe moe wär penye. Køøre nø, eni dööŋ ni waany.

⁷'Ba ni näk mo nyoonynyø onyaay bäät buny dëër ŋatøgø, køør mana nø nyooth dëëre jï dïlämi kanya nø caan waany mare, ŋatøgø ree wär cäŋ nyoothø nyïm dïlämi.

⁸Køøre raŋ dïlämi raŋø; 'ba ni näk mo nyoonynyø onyaay bäät buny dëëre, wär caan dïlämi ki man näk mo ŋatøgø ba waany. Manøgø beeye täw buny dëël.

⁹«Ni näk mo dhaanhø dëëre da ŋwellø mar täw buny dëël, eni wär kïth baŋ dïlämi,

¹⁰nee raŋ dïlämi. 'Ba ni näk mo da gïn mo tar mo opäny wøk ki yi buny dëëre, ni wiil jïër ni tar moa en waŋe, ni da rïŋö mo ocwäny wøk ki yi waŋ gïna näk opäny wøk,

¹¹manøgø beeye täw buny dëël mo ba caŋŋi dëëre. Wär caan dïlämi ki man näk mo ŋatøgø ba waany. Ba many gø këët nee tïïe ki man bëëde kur keere nee cäŋ raŋŋø, kiper oløny ni ba waany.

¹²«'Ba ni näk mo täw buny dëël obwön wøk dëëre bäre, ni täw manøgø dëër ŋatøgø ee gääbö bäre, ki mana täge wïïe këël tiete, ni beeye gïn mo nëënö jaak jï dïlämi,

¹³wär raŋ dïlämi. 'Ba ni näk mo ee joodø ni dëël ee gääbö bäre, no onibuuth ni tar bäre, ŋatøgø waany. Dïlämi wär caane ki man näk mo ŋatøgø waany.

¹⁴'Ba ni näk mo da rïŋ dëëre moo cäŋ cwäny wøk, eni ba waany.

¹⁵Ni kanyo ö dïlämi noo raŋ rïŋö mana näk ocwäny wøk, wär put caan ki man näk mo ŋatøgø ba waany. Rïŋö mo ocwäny wøk dëël beeye täw buny dëël, ni ŋatøgø ba waany.

¹⁶'Ba ni näk mo rïŋö mana no ocwäny wøk dëëre odøø piny ni neebuuth ni tar, ŋatøgø wär døø baŋ dïlämi.

¹⁷Køøre dëëre raŋ dïlämi raŋø. 'Ba ni näk mo ŋwellø onibuuth ni tar møn, dïlämi wär caane ki man näk mo ŋatøgø ni dëëre da ŋwelløgø enø waany.

¹⁸«'Ba ni näk mo dëër dhaanhø ojïtö ki boor ni caŋŋe,

¹⁹ni ö kar boorri manøgø ni jïte ki gïn mo tar mo opäny wøk wala gïn mo kwaar, ŋatøgø dëëre wär nyoodhe jï dïlämi.

²⁰Køøre raŋ dïlämi raŋø. 'Ba ni näk mo nëëni ni ree ee luut piny ni buny dëël ee wii maal, ni jïër moa en waŋe rege ege wiilø ni tar, dïlämi wär put caan ki man näk mo ŋatøgø ba waany. Manøgø beeye ŋwellø mar täw buny dëël na tuny wøk ki yi øt boor enø.

²¹'Ba ni näk mo kanyo raŋi ya dïlämi, bäŋ jïër mo tar mo ena yi waŋ ŋwellø, ni ree käre luut piny, 'ba eno døø piny, dïlämi ŋatøgø wär tïïe nee bëëde kur keere ki nïne abïriiø.

²²'Ba køør nïrögø, ni näk mo ŋwellø manøgø onyaay bäät buny dëël, dïlämi wär caane ki man näk mo ŋatøgø ba waany. Ni manøgø beeye ŋwellø kiree.

²³'Ba ni näk mo gïna no opäny wøk na tar poot bëëdö kare, ni kär nyaay, manøgø poot na dhi øt boor jaak. Køøre dïlämi wär caane ki man näk mo ŋatøgø waany.

²⁴«'Ba ni näk mo dhaanhø da kany mo owaaŋ maaci dëëre, ni ö kanya waaŋ maaci enø ni jïte ki rïŋö mo ocwäny wøk mo onibuuth ni tar wala mo kwaar,

²⁵dïlämi gïnögø wär raŋe. 'Ba ni näk mo jïër moa en yi waŋ ŋwellø manøgø no onibuuth enø rege ege wiilø ni tar, ni ŋwellø ree ee luut piny ni buny dëël ee wii maal, manøgø beeye täw buny dëël na päny wøk enø ki yi øt maac. Kiper manøgønø, dïlämi wär put caan ki man näk mo ŋatøgø ba waany. Ni manøgø beeye ŋwellø mar täw buny dëël.

²⁶'Ba ni näk mo kanyo ö dïlämi noo raŋ gø, ni jïër moa en yi waŋ ŋwelløgø no onibuuth enø ba tar, ni ree käre luut piny, 'ba nëëni no odøø piny, dïlämi ŋatøgø wär tïïe nee bëëde kur keere ki nïne abïriiø.

²⁷'Ba noo tïme na ri bïriet nïne, dïlämi ŋatøgø wär raŋe. 'Ba ni näk mo ŋwellø onyaay bäät buny dëëre, dïlämi wär put caan ki man näk mo ŋatøgø ba waany. Ni manøgø beeye ŋwellø mar täw buny dëël.

²⁸'Ba ni näk mo ŋwelløgø no onibuuth enø poot bëëdö kare ni kär nyaay bäät buny dëël, 'ba nëëni no odøø piny, ena wëënnö mar maac. Køøre dïlämi wär caane ki man näk mo ŋatøgø waany, kiper manøgø beeye øt maac jaak.

²⁹«'Ba ni näk mo dhaanhø ma dïcwøø wala dhaagø da gïï mo opäny wøk wïïe wala tïïe,

³⁰dïlämi ŋwellø manøgø wär raŋe. 'Ba ni näk mo nëëni ni ree ee luut piny ni buny dëël ee wii maal, ni jïër moa en waŋe abäga, no obøøc ni wetø, dïlämi wär caane ki man näk mo ŋatøgø ba waany. Manøgø beeye täw mo jelli. Ni ena täw buny dëël mar wïc wala mar tïk.

³¹'Ba ni näk mo kanyo ö dïlämi noo raŋ ŋwellø manøgø ni jelli enø, ni nëëni ni ree käre luut piny buut buny dëël, ni bäŋ jïër mo cøl yie, dïlämi ŋatøgø ni dëëre da ŋwellø mo jelli enø, wär tïïe nee bëëde kur keere ki nïne abïriiø.

³²'Ba noo tïme na ri bïriet nïne, dïlämi ŋwellø manøgø wär raŋe. Ni näk mo kanyø ni jelli enø kär nyaay, ni bäŋ jïër ma abäga mo otuy yie, ni nëëni ni ree käre luut piny,

³³ŋatøgø jïëye wär liele, ni wec kanya näk jelli ni ba liele. 'Ba dïlämi ŋatøgø ni dëëre da kany mo jelli enø, wär tïïe nee bëëde kur keere ki nïne abïriiø møøk.

³⁴'Ba noo tïme na ri bïriet nïne, dïlämi kanyø ni jelli enø wär raŋe. 'Ba ni näk mo kanya jelli kär nyaay bäät buny dëël, ni eni nëëni ni ree käre luut piny ni buny dëël käre wii maal, dïlämi wär put caan ki man näk mo ŋatøgø waany. 'Ba ŋatøgø abïïe moe wär put peny; køøre nø, eni dööŋ ni waany.

³⁵'Ba ni näk mo kanya jelli enø onyaay bäät buny dëël, køør mana nø caan luum waany mare,

³⁶dïlämi dëër ŋatøgø wär raŋe. 'Ba ni näk mo kanya jelli enø onyaay bäät buny dëël, ba many gø këët ki man ö dïlämi ni neet gø ki man näk mo da jïër ma abäga yi gø; ŋatøgø ba waany.

³⁷'Ba ki jï dïlämi ni näk mo kanya jelli enø poot bëëdö kare, ni ö jïër mo cøl ni tucge ki yie, ni dijel mare manøgø caŋŋø, ŋatøgø waany. Køøre wär caan dïlämi ki man näk mo ŋatøgø waany.

³⁸«'Ba ni näk dhaanhø ma dïcwøø wala dhaagø da gïï mo obuth ni tar bäät buny dëëre, ni beeye gïï moo päny wøk mo tar møn,

³⁹wär raŋ dïlämi. 'Ba ni näk mo gïïa no obuth ni tar bäät buny dëëre nëëni ni dhïïth, manøgø beeye ŋwellø mo jööt jaak na tuny wøk ki bäät buny dëëre enø. Teeŋ ŋatøgø waany.

⁴⁰«'Ba ni näk dhaanhø ma dïcwøø jïëc lool wïïe oøøc piny ni tal wïïe, teeŋ ŋatøgø waany.

⁴¹Wala ni näk mo ŋatøgø talø mar wïïe tägi ka täärnyïme, ni bëët wïïe ni da bøønnø, teeŋ ŋatøgø waany.

⁴²'Ba ni näk mo lool wïïe kanya näk otal wala bøønnø mare da ŋwellø mo kwaar mo opäny wøk ki yie, manøgø beeye täw buny dëël na päny wøk enø ki dï lool wïïe kanya näk otal, wala ki dï bøønnø mare.

⁴³Køøre dïlämi dëër ŋatøgø wär raŋe. 'Ba ni näk mo ŋwellø mana no opäny wøk dï lool wï ŋatøgø, wala dï bøønnø mare beeye gïn mo kwaar, ni nëëni kaamar täw buny dëël,

⁴⁴ŋatøgø dëëre da täw buny dëël. Ni teeŋ ŋatøgø ba waany. Dïlämi wär caane ki man näk mo ŋatøgø ba waany, kiper ŋwellø mana en dï wïïe.

⁴⁵«'Ba ŋata näk dëëre da teeŋ ŋwel buny dëël manøgø, wär bëëde ni käära abïïe mo ojeeyø, ni bëët wïïe no ojwälö, ni uum dhee, ni kwöŋŋe, ni ‹Aani, a ba waany; a ba waany møn.›

⁴⁶Teeŋ ŋatøgø bëëdö ni ba waany ki yïth nïne bëët moo beede ni dëëre da ŋwellø; eni ba waany. Eni wär bëëde kur keere, ni kar bëëtö mare beeye ŋää twïër.

⁴⁷«'Ba ni näk ma abïï mar dëël opuunnö,[7] nee ena abïï ma cuup wala abïï ma lïïna,

⁴⁸nee abïï mo tïïc ni di cwääö mo tïïc ka waare mo lïïna wala waare mo cuup, nee pïën wala gïn mo tïïc ka pïën,

⁴⁹ni näk mo puunnö manøgø kwaar wala marr na ci ra abïï wala ri pïën, wala ra abïïna näk ocwääö, wala ri gïn mo tïïc ka pïën, manøgø beeye puunnö; 'ba wär nyooth jï dïlämi.

⁵⁰Køøre dïlämi puunnö manøgø raŋe raŋø, ni tïïc gïna ci dëër gø nee bëëde kur keere ki nïne abïriiø.

⁵¹'Ba noo tïme na ri bïriet nïne, dïlämi gïnögø raŋe raŋø. 'Ba ni näk mo puunnö manøgø onyaay dëër abïï, nee dëër gïna näk ocwääö, nee dëër pïën wala dëër gïn mo tïïc ka pïën, manøgø beeye puunnö mo raac, ni gïna ci dëëre ba waany.

⁵²Dïlämi abïï dëël manøgø wala gïna näk ocwääö, mo tïïc ka waare mo cuup wala waare mo lïïna, wala teeŋ gïrpiny jaak mo tïïc ka pïën moa dëëtge puunnö, wär waaŋ. Kiper beeye puunnö mo raac. Gïna ci dëër gø wär put waaŋ ki maac.

⁵³«'Ba ni näk mo kanyo ö dïlämi noo raŋ puunnö manøgø, ni kär nyaay dëër abïï dëël, wala dëër gïna näk ocwääö, wala dëër gïrpiny jaak mo tïïc ka pïën,

⁵⁴dïlämi wär cïpe ki dwøl nee gïna puunnö peny ki pïï. Køøre eni gïnögø wär tïïe nee bëëde kur keere ki nïne abïriiø møøk.

⁵⁵'Ba køør kanyo nø peny gïna puunnö, dïlämi gïnögø wär cäŋ raŋŋø. 'Ba ni näk mo puunnö manøgø nëëni ni ree käre wiilø, këël na näk mo kär nyaay, gïna ci dëër gø ba waany. Gïnögø wär waaŋŋu ki maac, këël doo na mo kanya cam puunnö beeye løøk aciel wala ki løøk maya.

⁵⁶'Ba ni näk mo kanyo ö dïlämi noo raŋ puunnö manøgø ni dhïïth køør mana nø penyi, kanya näk mo opuunnö manøgø dëër abïï dëël wala dëër pïën, wala dëër gïna näk ocwääö, wär ŋul wøk.

⁵⁷'Ba ni näk moo cäŋ nëënö dëër abïï dëël, nee dëër gïna näk ocwääö, wala dëër gïrpiny jaak mo tïïc ka pïën, ena gïn mo nyaay; gïno en dëër gø jaak wär waaŋ ki maac.

⁵⁸'Ba abïï dëël wala gïna näk ocwääö, wala gïrpiny jaak mo tïïc ka pïën, ni beeye gïna ö puunnö wøk dëëre kanya penyi, wär cäŋ nwøyø ki peny. Køøre eni dööŋ ni waany.»

⁵⁹Manøgø beeye ciik kiper puunnö mo oci dëër abïï mo cwääc ka waare mo cuup wala waare mo lïïna, wala dëër gïna näk ocwääö, wala dëër gïrpiny jaak mo tïïc ka pïën, ki man caani ni ge waany wala ba waany.