Read anuak Ciik Kiper Dïlämme 15 Bible Online

Ciik Kiper Dïlämme 15 - anuak bible

Ciik Kiper Dïlämme 15

¹'Ba Wuuö Jwøk acäänö ki Modhe ka Aran ni kööe,

²ni «Caannu jï jø Icriel ni kööu jïge, ni ‹Kanyo näk dhaanhø ma dïcwøø da tuut mo ööa wøk ki yi jaath dëël mare, tuut moøgø dhaanhø døøye mo ba waany.

³Ŋatøgø bëëdö ni ba waany ki køør tuut moøgø; nee tuut bëëdö ni muulö ki yi jaath mare, wala ba muuli, eni bëëdö ni ba waany.

⁴« ‹Pïën mano but ŋatøgø yie ni dëëre da tuut enø, tïmö ni ba waany. Ni gïn mo ŋatøgø opï bääte jaak tïmö ni ba waany.

⁵Ni ŋato gut pïën ŋatøgø, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

⁶Ni ŋat mo opï piny bäät gïn mo ŋatøgø ni dëëre da tuut enø obëëdö bääte, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

⁷« ‹Ni ŋato gut dëër ŋatøgø ni dëëre da tuut enø, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

⁸« ‹Wala ni näk mo ŋatøgø ni dëëre da tuut enø, oŋuut bäät ŋat mo waany ki laaw, ŋatøgø thuwø abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

⁹« ‹Ni køøm mo ŋatøgø ni dëëre da tuut enø opï bäät gø jaak kany wø cäädhe ki bäät arëën, køømøca tïmö ni ba waany.

¹⁰Ni ŋat mo ogutö ki gïrpiny jaak røk gïïa pï ŋatøgø bäätge, eni bëëdö ni ba waany këël kanyo päth cäŋŋi. Ni ŋato lwør gïïögø, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

¹¹« ‹Ni ŋatøgø ni dëëre da tuut enø, ni näk da ŋat mo ee gudö ki ceŋŋe mo käre lwøø ki pïï, ŋatøgø abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

¹²« ‹Ni dak ma mar odhöönh jaak mo ogut ŋatøgø ni dëëre da tuut enø, wär put nyath. 'Ba nee gïr tïïc mo tïïc ka jaath, wär put peny ki pïï.

¹³« ‹'Ba ŋatøgø ni dëëre da tuut enø, kanyo caŋ dëëre, dëëre wär kwäänne ki nïne abïriiø moo tïme ni waany yïthge; eni abïïe moe wär penye, ni lwøk dëëre ki pï mo kwödö. Køøre nø, eni dööŋ ni waany.

¹⁴'Ba noo tïme na ri bäc nïne, eni wär lwöte ka atuuy ariiø wala nyïï akuyi ariiø ni ö nyïm Wuuö Jwøk ki geni dho oduŋkaany røømmø, ni cïp geni jï dïlämi.

¹⁵Køøre dïlämi gïïögø cïbe cïbö, na aciel beeye olämi mar wëën raay, ni maya beeye olämi man wø waaŋ bäre. Ni manøgø tïïc dïlämi no okïdi nyïm Wuuö Jwøk na kar ŋatøgø kiper tuut moa en dëëre.

¹⁶« ‹'Ba ni näk dhaanhø ma dïcwøø da pï dëël mo oö wøk ki dëëre, eni dëëre bäre wär lwøe ki pïï; 'ba eni bëëdö ni ba waany këël kanyo päth cäŋŋi.

¹⁷'Ba gïn ma abïï dëël jaak mo pï dëël oci dëëre, wala cøøa dëër pïën, gïneca wär put peny ki pïï. 'Ba gïneca bëëdö ni ba waany këël kanyo päth cäŋŋi.

¹⁸'Ba ni näk dhaanhø ma dïcwøø obutö ki dhaagø, ni ö pï dëëlli wøk, geni karge riet dëëtge wär lwøkge ki pïï, 'ba ge bëëdö ni ba waany këël kanyo päth cäŋŋi.

¹⁹« ‹'Ba kany wø näk mo dhaagø da gïr mään mo otägö dëëre, eni bëëdö ni ba waany ki nïne abïriiø. Ni ŋat mo nyijøøgø ee gudö jaak, bëëdö ni ba waany këël kanyo päth cäŋŋi.

²⁰« ‹Ni teeŋ gïrpiny jaak mo nyijøøgø obut yie kanya bëëde ni dëëre da gïr mään, gïneca ba waany. Ni gïrpiny jaak mo nyijøøgø opï bääte, gïneca ba waany.

²¹Ni ŋat mo pïën niine mar nyijøøgø ee gudö jaak, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

²²Ni ŋat mo ogutö ki gïrpiny jaak mo nyijøøgø opï bääte, abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

²³Ni näk mo dhaanhø guta pïën niine wala gïn mo nyijøøgø opï bääte jaak, eni bëëdö ni ba waany këël kanyo päth cäŋŋi.

²⁴« ‹'Ba ni näk mo da dïcwøø mo obutö ki nyijøøgø, ni ö gïr määnni ni ci dëër ŋatøgø, ŋatøgø bëëdö ki nïne abïriiø ni ba waany. Ni pïën niine mo ŋatøgø obut yie jaak, pïëneca ba waany.

²⁵« ‹'Ba ni näk mo dhaagø da remø mo ööa wøk ki dëëre ki nïne mo thööth ni paa kany wø ö gïr määnni dëëre, wala ni näk mo remø mana ö wøk ki dëëre poot cäätha nyïme jaak ni kaala nïne mo gïr mään, yïth nïne bëët moo beet nyijøøgø ni dëëre da remø, eni bëëdö ni ba waany, kaawat man wø bëëde ni dëëre da gïr mään.

²⁶Ni pïën niine man wø buut nyijøøgø yie ki yïth nïne bëët moa beede ni dëëre da remø, wär bëëde ni ba waany ni caala man wø bëëde ni dëëre da gïr mään. Ni gïn mo eno pï bäät gø jaak, gïneca bëëdö ni ba waany ni caala man wø bëëde ni dëëre da gïr mään.

²⁷Ni ŋat mo gïïögø ee gudö tïmö ni ba waany. Ŋatøgø abïïe moe wär penye, ni lwøk dëëre ki pïï; 'ba eni bëëdö ni ba waany këël kanyo päth cäŋŋi.

²⁸« ‹Kanyo cuŋ remø dëër nyijøøgø, dëëre wär kwäänne ki nïne abïriiø. Køøre nø, eni tïmö ni waany.

²⁹'Ba noo tïme na ri bäc nïne, eni wär lwöte ka atuuy ariiø, wala nyïï akuyi ariiø ni kïth geni baŋ dïlämi dho oduŋkaany røømmø.

³⁰Køøre dïlämi aciel cïbe cïbö no olämi mar wëën raay, ni cïp maya no olämi man wø waaŋ bäre. Ni manøgø tïïc dïlämi no okïdi nyïm Wuuö Jwøk na kar nyijøøgø kiper mana bëëde ni ba waany ki remø mana en dëëre.›

³¹«'Ba ï na Modhe en ka Aran, bëëdu ni jø Icriel you tïïö ni karge bäär ki gïï mo døøya geni mo ba waany, kiper nee ge ba thøwge ki køør bäŋ waany marge kanyo tïïcge kar bëëtö mara na en dïge ni ba waany.»

³²Moøgø beege ciik kiper dhaanhø ma dïcwøø mo da tuut mo ööa wøk ki yi jaath dëël mare, ki dïcwøø mo da pï dëël mo oö wøk ki dëëre mo eno tïmö ni ba waany ki køørge,

³³ki dhaagø mo dëëre da gïr mään, ki ŋat mo da gïï mo ööa wøk ki dëëre, nee dïcwøø wala dhaagø, ki dïcwøø mo obutö ki dhaagø mo ba waany.