Read anuak Ciik Kiper Dïlämme 16 Bible Online

Ciik Kiper Dïlämme 16 - anuak bible

Ciik Kiper Dïlämme 16

¹'Ba Wuuö Jwøk acäänö ki Modhe køør mana nø thøw wäät Aranni moa na ariiø, kanya cige nyïm Wuuö Jwøk na thøwge.

²Eni na Wuuö Jwøk ena köö jï Modhe, ni «Caanï jï coku ma Aran nee eni ba døny yi kanya en kur keere na pere leth ki kany wäro manynye jaak, ni beeye kanya no ogëëŋö ka abïï nyïm rëëbi mana näk nyuudhi mar wëën raay mana näk acanduk orïëbö ki gø, kiper nee eni ba thøøe. Kiper kany wø nyoodha raa yie ki yi pöölö beeye bäät rëëbi manøgø.

³«'Ba jöö man wø ö Aranni noo døny yi kanya en kur keere ki gø beeye en: eni käädö ki rwaath no olämi mar wëën raay, ki nywø røømmø no olämi man wø waaŋ bäre.

⁴Eni jalabiny lïïna mana ciek na näk ocïp kur keere, wär røø dëëre, ni røø libaa lïïna dëëre man wø røø tier abïï, ni twöö kaa lïïna piere, ni ö abïï man wø kïth wïc, ni kïth gø wïïe. Moøgø beege abïïe mo ocïp kur keerge. Eni dëëre wär lwøe ki pïï, køøre ge kïthe ka dëëre.

⁵Køøre eni kädö baŋ jø Icriel ki nyöök atëëe ariiø no olämme mo wëën raay, ki nywø røømmø aciel no olämi man wø waaŋ bäre.

⁶«Køøre Aran rwaath wär cïbe no olämi mar wëën raay moe, ni tïïe no okïdi kiper dëëre ki jø paare.

⁷Ni lwør nyöök atëëe moa näk ariiø ni kïth ge nyïm Wuuö Jwøk dho oduŋkaany røømmø.

⁸Ni ö eni na Aran ni tïïe ki ŋïïce ki ri kwääk ki baw kiper atëëe moø na ariiø yøø, na aciel tïïc kaper man ci jï Wuuö Jwøk, ni maya beeye kiper man käär raay.

⁹Køøre Aran diel mano päth ŋïïyi bääte na mar Wuuö Jwøk, wär cïbe ni tïïc gø no olämi mar wëën raay.

¹⁰'Ba diel mano päth ŋïïyi bääte na man käär raay, wär cïp ni kwøw nyïm Wuuö Jwøk ni tïïca eni no okïdi ki man wii nee aa dï paap na man wø käär raay.

¹¹«'Ba Aran rwaath wär cïbe no olämi mar wëën raay moe, ni tïïe no okïdi kaper dëëre ki jø paare, ni ŋaal rwaadhøgø no olämi mar wëën raay enø ni beeye kiper raay moe ki dëëre.

¹²Køøre eni wär lwöte ka athaanh jwïël mar maac mo yi gø ee pääŋö ki cuk, ni lwøre bäät gïn wø cïp olämme bääte nyïm Wuuö Jwøk. Ni lwöte ki gïn wø jïye ŋwääi ni met mana no oguurö, ni jøøbe ka ceŋŋe karge riet, ni kïth ge yi kanya en kur keere na pere leth na näk ogëëŋö.

¹³'Ba kiper nee eni ba thøøe, gïn wø jïye ŋwääi ni met wär cïp bäät maac nyïm Wuuö Jwøk, nee jïye rëëbi mana näk nyuudhi mar wëën raay na en bäät acanduk rïëbe, ni beeye acanduk mana en ciiki yie moa tuut Wuuö Jwøki ki jiy.

¹⁴Køøre eni lwötö ki rem rwaath ki lweete, ni ker gø dëër nyïm rëëbi mana näk nyuudhi mar wëën raay, ni ker remø mør piny ki lweete kwöre abïriiø nyïm rëëbi manøgø.

¹⁵«Køøre Aran ateea mana näk olämi mar wëën raay wär ŋaale kiper jiy, ni kïth remø mar gø yi kanya en kur keere na pere leth na näk ogëëŋö, ni tïïc remø ki jöö mana kwøŋ rem rwaath tïïc ki gø, ni mare ker gø dëër nyïm rëëbi mana näk nyuudhi mar wëën raay, ni ker mør piny nyïm rëëbi manøgø.

¹⁶Ni eni mare tïïc gø no okïdi kiper kanya en kur keere na pere leth, ki køør mana bëët jø Icrielli ni ba waany ki køør gïïa bacge, ki teeŋ raay bëët moa tïïcge. Ni manøgø tïïe kaper oduŋkaany røømmø na en dïge ni beeye yïthakicge, ge na ba waany.

¹⁷Aran ki mano døny kuna tïïc okïdi yi kanya en kur keere na pere leth, këël kanyo duu wøk, bäŋe dhaanhø mo nut yo oduŋkaany røømmø. Ni beeye okïdi mano tïïe kiper dëëre, kiper jø paare, kiper dhaanh Icriel bäre.

¹⁸«Køøre eni wär duny wøk baŋ gïn wø cïp olämme bääte na en nyïm Wuuö Jwøk, ni tïïc okïdi kiper gø, ni lwöte ki rem rwaath, ki rem ateea, ni naaŋ gø dëët tuk gïn wø cïp olämme bääte.

¹⁹Ni ö reme mørri ni ker gø ki lweete kwöre abïriiø bäät gïn wø cïp olämme bääte, ni eni tïïa gø ni waany, ni cïba gø kur keere ki køør mana bëët jø Icrielli ni ba waany.

²⁰«'Ba Aran kanyo nø thöör tïïc mar okïdi kiper kanya en kur keere na pere leth, kiper oduŋkaany røømmø, kiper gïn wø cïp olämme bääte, eni ateea mana kwøw wär käl nyïm.

²¹Ni ö eni na Aran ni peeth ceŋŋe karge riet bäät wï ateea manøgø ni kwøw enø, ni køp raay bëët mo jø Icriel bäät gø, ki gïïa bacge, ki teeŋ raay bëët moa tïïcge, ni kïtha gïïögø bäät ateea manøgø; ni wëëk gø ciin paap, ni kïtha ŋata näk ojiiŋŋø kiper tïïc manøgø.

²²Køøre ateea manøgø, raac jiy bëët kääre käärö ki dëëre ni kïth ge yi ŋöömö mo ba beet. Køøre ŋatøgø ateea wär put wii dï paap.

²³«'Ba Aran wär put døø yo oduŋkaany røømmø, ni gööny abïïe wøk dëëre moa näk lïïne na røøe kanya døny yi kanya en kur keere na pere leth, ni wii geni yie kaace.

²⁴Ni ö eni ni lwøk dëëre ki pïï yi kany mo ena kur keere, ni røø abïïe moe dëëre, ni put ö wøk ni cïp olämi man wø waaŋ bäre kiper dëëre, ko olämi man wø waaŋ bäre kiper jiy; ni mare tïïc okïdi kiper dëëre, kiper jiy.

²⁵Køøre eni maaw mar olämi mar wëën raay manøgø wär waaŋe ki maac bäät gïn wø cïp olämme bääte.

²⁶«'Ba ŋata wii ateea paap na man wø wec nee aae, abïïe moe wär penye ni lwøk dëëre ki pïï. Køøre nø, eni dunynya yi twïër.

²⁷«'Ba rwaath ka ateea moa cïp no olämme mo wëën raay, na rem moge kïth yi kanya en kur keere na pere leth ki man tïï no okïdi, wär kïth wøk ŋää twïër, ni waaŋ pëëne moge ki maac, ki rïŋ moge, ki weenynye moge.

²⁸'Ba ŋato waaŋ geni abïïe moe wär penye, ni lwøk dëëre ki pïï. Køøre nø, eni dunynya yi twïër.

²⁹«'Ba man tïmö na ciik kiperu mo bëëdö na bäre bäre: kanyo tïm nïr dwää abïriiø na apaar, wäru dëëtu dwøgu piny, nou ba cämö, ni bäŋe tïïc mo tïïyu, nee ŋat Icriel wala wëëllö mo path mo bëëdö dïïu;

³⁰kiper beeye dïcäŋ mano tïïc okïdi yie kiperu, ki man tïmu nou waany. Køøre uuni, u tïmö nou waany nyïm Wuuö Jwøk ki køør raay mou bëët.

³¹Manøgø tïmö ni beeye cäŋ jwömö mar jwöm dëël jïïu na bäre, ni dëëtu you dwøk piny, nou ba cämö. Ni manøgø tïmö na ciik mo bëëdö na bäre bäre.

³²Dïlämi mano wïïe thïïmmi ki maaw noo røøny nee tïïe na dïlämi kar wänni beeye noo tïïc okïdi. Eni abïïe moa näk ocïp kur keerge na näk lïïne, wär røø dëëre,

³³ni tïïc okïdi kiper kanya en kur keere na pere leth, kiper oduŋkaany røømmø, kiper gïn wø cïp olämme bääte. Ni ö eni thuwø ni tïïc okïdi kiper dïlämme, kiper dhaanh Icriel bäre.

³⁴«'Ba manøgø bëëdö na ciik kiperu mo bëëdö na bäre bäre, ki man tïïc okïdi kiper raay bëët mo jø Icriel, ni tïïc ka yi cwiir yie aciel.» 'Ba gïnögø aput tïïc ki køør mana ö Wuuö Jwøki na kööm Modhe ki gø.