Read anuak Ciik Kiper Dïlämme 18 Bible Online

Ciik Kiper Dïlämme 18 - anuak bible

Ciik Kiper Dïlämme 18

¹'Ba Wuuö Jwøk acäänö ki Modhe ni kööe,

²ni «Caanï jï jø Icriel ni kööï jïge ni Wuuö Jwøk aköö, ni ‹Beeye aani na Wuuö Jwøk, Jwøk maru.

³Käru tïïö ki gïï wø tïïc yi ŋööm Ijep na bëëdu yie, ni ba tïïyu gïï wø tïïc yi ŋööm Keenan noo kïtha u yie; käru cäädhö køør ciik moge.

⁴Gwøgu luup ŋøl 'moa ki ciik 'moa ni caathu køørge ni wïthu you koorø. Beeye aani na Wuuö Jwøk, Jwøk maru.

⁵Uuni ciik 'moa ki luup ŋøl 'moa wär gwøgu, ni beeye gïïo bëët dhaanhe ni kwøw ki køørge ni näk mo ee kïth bäät tïïc. Beeye aani na Wuuö Jwøk.

⁶« ‹Kär dee dhaanhø dïïu mo døøa ri watge mana kälge ri remø aciel ki gø ki man ci baŋ gø na dhaagø. Beeye aani na Wuuö Jwøk.

⁷« ‹Kär wäru døøc mo jööt ki man ciï baŋ meru na dhaagø, kiper ena meru; ï ba doo ci baŋe na dhaagø.

⁸« ‹Kärï ci baŋ cï wäru na dhaagø; kiper ï døøya wäru mo jööt.

⁹« ‹Kärï ci baŋ coku na dhaagø, nee nyiwäru wala coku mana nywøl meru, nee nywølla dï kal wala kääri ka käw.

¹⁰« ‹Kärï ci baŋ nyikwaarï na dhaagø, nee nyi wäädï wala nyi nyaarï; kiper ge käla dëërï.

¹¹« ‹Kärï ci baŋ nyiwäru na dhaagø, kiper eni nywøla wäru, ni ena coku.

¹²« ‹Kärï ci baŋ waau cöök wäru na dhaagø, kiper eni käla ri remø aciel ki wäru.

¹³« ‹Kärï ci baŋ maru cöök meru na dhaagø, kiper eni käla ri remø aciel ki meru.

¹⁴« ‹Kär wäru cöök wäru døøc mo jööt ki man ciï baŋ cïïe na dhaagø, kiper ena cï wäru.

¹⁵« ‹Kärï ci baŋ cï nyaarï na dhaagø, kiper ena cï wäädï; ï ba doo ci baŋ gø na dhaagø.

¹⁶« ‹Kärï ci baŋ cï coku na dhaagø, kiper ï døøya coku mo jööt.

¹⁷« ‹Dhaagø ki nyaare kär rwöpï ki man ciï baŋge na mään, ni ba ciï baŋ nyikwaare na dhaagø, nee nyi wääde wala nyi nyaare, kiper ge käla ri remø aciel, ni teeŋ gïnögø beeye gïn mo raac.

¹⁸« ‹Cöök cïïï kär nywømï ki man ciï baŋe na dhaagø nee tïmge na nyäge ni cïïï poot kwøw.

¹⁹« ‹Kärï ci baŋ dhaagø na dhaagø kanyo poot dëëre ni ba waany ki gïr mään.

²⁰« ‹Kärï ci baŋ cï dhaanhø mør na dhaagø, niï tïïya dëërï ni ba waany ki gø.

²¹« ‹Ki røk obwöre moï kär dee gø mo jïëyï jïëö nee ge cïp no olämi jï jwø wø cwøl ni Mölek, kiper tïmö niï pääta nyeŋ Jwøï; ni beeye aani na Wuuö Jwøk.

²²« ‹Kärï ci baŋ dïcwøø ni butï ki gø kaawat man wø ci baŋ dhaagø, kiper ena gïn mo ec raac ki gø.

²³« ‹Ïïni thuwø, kärï ci baŋ lääy ni butï ki gø niï tïïya dëërï ni ba waany ki gø; ni kär dee dhaagø mo ci nyïm lääy nee lääy ci baŋ gø na dhaagø; ni teeŋ gïnögø beeye gïn mo ogaa wøk ki ri bëëtö.

²⁴« ‹Kär dëëtu døøyu mo ba waany ki køør gïïögø; kiper wïth juurre moo riema wøk nyïmmu, oløny ni ba waany ki køør gïïögø.

²⁵'Ba kiper mana tïm ŋöömö marge ni ba waany, aani ŋöömö manøgø bëëdö ni yaa nø raanynyø ki køør raay moa tïïc yie, ni nø tïïa gø nee jiye kwiere.

²⁶'Ba uuni, gwøgu ciik 'moa ki luup ŋøl 'moa, ni ba tïïyu teeŋ gïïögø ni ec raac ki ge yøø, ni manøgø rwöpa ŋat Icriel ki wëëllö mo path mo bëëdö dïïu.

²⁷Kiper jøøa bëëdö nyïmmu yi ŋöömö manøgø, teeŋ gïïögø ni ec raac ki ge yøø atïïcge, ni ö ŋöömmögø ni put tïmö ni ba waany.

²⁸'Ba ni näk mo ŋöömmögø tïïyu tïïö ni ba waany, u tïïa tïïö nou kwiere kaawat mana kwier wïth juurre moa bëëdö yie dïkwøŋ nyïmmu.

²⁹« ‹Kiper ŋat mo tïïya teeŋ gïïögø ni ec raac ki ge yøø, wär put tïmö ni tøør yïthakic tuuŋge.

³⁰Kiper manøgønø, gwøgu gïïa cema yøø, ni ba tïïyu teeŋ kööŋŋe moa raac eci ki ge na tïïc yi ŋöömö nou poot kär pïï yie, ni ba døøyu dëëtu mo ba waany ki køør gïïögø; kiper beeye aani na Wuuö Jwøk, Jwøk maru.› »