Read anuak Ciik Kiper Dïlämme 2 Bible Online

Ciik Kiper Dïlämme 2 - anuak bible

Ciik Kiper Dïlämme 2

¹« ‹'Ba kany wø näk dhaanhø cïpö ki muuy mar møk beel, na muuy man wø cïbe jï Wuuö Jwøk, muuy mare manøgø wär tïme na møø mana pøøth. Eni maaw wär køny bäät gø, ni ö gïn wø jïye ŋwääi ni met ni cïp gø bäät gø.

²Ni ö eni ni kïth muuy manøgø baŋ dïlämme, wäät Aran, ni ö dïlämi ni lwöte ri møgø pøøth enø, ni kuure ka maaw ki yi cere ni päŋ, ni dwal gø ki gïn wø jïye ŋwääi ni met bäre na no ocïp bäät møgøgø, ni waaŋ geni na gïr par wïc, ni beeye olämi man wø waaŋ ki maac ni wø ŋwääi ni met jï Wuuö Jwøk, ni waaŋŋa bäät gïn wø cïp olämme bääte.

³Køøre thääŋ muuy mar møk beel mano dööŋ tïmö na mar Aran ki wääte, ni beeye gïn mo ena kur keere mo pere leth røk muuce mo wø waaŋ ki maac jï Wuuö Jwøk.

⁴« ‹'Ba kany wø kännï ki muuy mar møk beel mo odeelø no opamø mo deel ka athaa, wär näk mo bäŋ thømmø dëëre, ni beeye møø mana pøøth mo coot ka maaw; wala wär näk mo møø mo otïïö ni reep mo bäŋ thømmø dëëre mo bääte owïïrö ki maaw.

⁵'Ba ni näk mo muuy mar møk beel marï tïïc ni deel ka gïr deel, wär näk mo beeye møø mana pøøth mo coot ka maaw ni bäŋ thømmø dëëre.

⁶Møgøgø wär pøtï ni thenh thenh ni kønynyï maaw bääte, ni beeye muuy mar møk beel.

⁷'Ba ni näk mo muuy mar møk beel marï tïïc ni deel ka täba, wär näk mo beeye møø mana pøøth ni coot ka maaw.

⁸Kany wø cïpï muuy mar møk beel marï jï Wuuö Jwøk mo tïïc ka uutjïëthe mo nëëna moøgø, wär kïth baŋ dïlämi, ni beeye ŋato kïth gø buut gïn wø cïp olämme bääte.

⁹Ni ö dïlämi ni lwöte wïth muunni moa no odeelø, ni lwøre na gïr par wïc, ni waaŋ ge bäät gïn wø cïp olämme bääte, ni beeye olämi man wø waaŋ ki maac ni wø ŋwääi ni met jï Wuuö Jwøk.

¹⁰Køøre thääŋ muuy mar møk beel mano dööŋ tïmö na mar Aran ki wääte, ni beeye gïn mo ena kur keere mo pere leth røk muuce mo wø waaŋ ki maac jï Wuuö Jwøk.

¹¹« ‹Muuy mar møk beel man wø cïpï jï Wuuö Jwøk, wär näk mo bäŋ thømmø dëëre; kiper uuni, bäŋe gïn mo waaŋŋu mo ree da thømmø wala maar kïc røk olämme mo wø waaŋ ki maac jï Wuuö Jwøk.

¹²Møø mo ree da thømmø wala maar kïc wär cïpu no okwaan ri muuce mo caammi mo wø kwøŋ ciek; 'ba geni ba waaŋ bäät gïn wø cïp olämme bääte na gïï wø ŋwääi ni met.

¹³Uuni muuce mo møk beel mou bëët wär buugu ka acäbö, kiper nee muuy mar møk beegu ba bëëde ni dëëre bäŋ acäbö, kiper acäbö nyootha gïna tuutu ki Jwøk maru; muuce bëët mo møk beel mou wär buugu ka acäbö.

¹⁴« ‹'Ba ni näk miï kännö ki muuy mar beel mo wø kwøŋ ciek jï Wuuö Jwøk, wär näk miï käla abäy ma twiinye mo obulö ki maac, køøre ni ŋiinyi, ni beeye muuy mar beegï moa kwøŋ ciek.

¹⁵Køøre ïïni maaw wär køny bääte, ni cïbï gïn wø jïye ŋwääi ni met bääte, ni manøgø beeye muuy mar beel.

¹⁶Køøre nø, dïlämi lwötö ri nyeŋ moøgø no oŋiinyø yøø ni kuure ka maaw, ni dwal gø ki gïn wø jïye ŋwääi ni met, ni waaŋ geni na gïr par wïc, ni beeye olämi man wø waaŋ ki maac jï Wuuö Jwøk.