Read anuak Ciik Kiper Dïlämme 20 Bible Online

Ciik Kiper Dïlämme 20 - anuak bible

Ciik Kiper Dïlämme 20

¹'Ba Wuuö Jwøk acäänö ki Modhe ni kööe,

²ni «Caanï jï jø Icriel, ni ‹Ni näk da dhaanhø røk jø Icriel wala røk wëëlle moa path mo bëëdö Icriel mo nyey mo käla dëëre ee cïbö jï jwøa cwøl ni Mölek, ka adïëri møn, ŋatøgø wär put 'näk. Jø paac ŋatøgø wär putge këërö ki kïte.

³Aani thuwø dëëtwa raŋwa raŋŋø ki ŋateca ni puta eni tïïc ni tøør yïthakic tuuŋge, kiper eni nyey mana käl dëëre acïbe jï Mölek, ni eni raanynya kar lam mara na en kur keere ni pääta nyeŋŋa na en kur keere.

⁴'Ba ni näk mo jø paac wïthge ege paany wøk kanya ö ŋatøgø na cïp nyaare jï Mölek, ni kärge ŋatøgø nääö,

⁵aani ki dëëra dëëtwa raŋwa raŋŋø ki ŋateca ki jø paare, ni puta eni tïïc ni tøør yïthakic tuuŋge, ni beeye eni ki jiy bëët moa caath køøre na gaa baŋ Mölek, ni ki mana wøørge gø caala man wø tïïc dhaaŋ paaci mo rïïŋö køør käp.

⁶« ‹Ni näk mo da dhaanhø mo ogaa baŋ jøøa näk rege da juu mo cøøra jwïëc jiy moa no othøw, ki jøøa nyeŋge reegø ki jap ajuuk, ni ci cwïnye køørge kaawat man wø tïïc dhaaŋ paaci mo rïïŋö køør käp, aani dëëtwa raŋwa raŋø ki ŋateca ni puta eni tïïc ni tøør yïthakic tuuŋge.

⁷« ‹Cïbu dëëtu kur keeru ni bëëdu nou ena kur keeru, kiper beeye aani na Wuuö Jwøk, Jwøk maru.

⁸Uuni, gwøgu ciik 'moa ni kïthu ge bäät tïïc; beeye aani na Wuuö Jwøk na cïp u kur keeru.

⁹« ‹Ni näk mo da dhaanhø mo janynya wänni wala menni, ka adïëri møn, ŋatøgø wär put 'näk, kiper wänni wala menni ajanynye. Kwör remø mare ena bääte keere.

¹⁰« ‹Ni näk mo da dhaanhø mo kännö ki luk ki cï dhaanhø mør, eni na kännö ki luk enø, ki dhaagø manøgø, ka adïëri møn ge wär put 'näk.

¹¹« ‹Ni näk mo da dhaanhø mo cøøa baŋ cï wänni na dhaagø, eni døøya wänni mo jööt; ka adïëri møn ge karge riet wär put 'näk. Kwör remø marge ena bäätge keerge.

¹²« ‹Ni näk mo da dhaanhø mo cøøa baŋ cï nyaare na dhaagø, ka adïëri møn, ge karge riet wär put 'näk, kiper gena tïïö ki gïn mo ogaa wøk ki ri bëëtö. Kwör remø marge ena bäätge keerge.

¹³« ‹Ni näk mo da dhaanhø mo cøøa baŋ dïcwøø nee bute ki gø kaawat man wø ci baŋ dhaagø, ge karge riet gena tïïö ki gïn mo ec raac ki gø. Ka adïëri møn, ge wär put 'näk. Kwör remø marge ena bäätge keerge.

¹⁴« ‹Ni näk mo da dhaanhø mo dhaagø di nywømø ni rwöp gø ki mii dhaaŋŋøgø, manøgø beeye gïn mo raac. Geni karge dääy ge wär waaŋ ki maac, nee bäŋe gïn mo raac mo ena dïïu.

¹⁵« ‹Ni näk mo da dhaanhø mo cøøa baŋ lääy na dhaagø, ka adïëri møn, ŋateca wär put 'näk. Uuni thuwø, lääy wär putu 'näk.

¹⁶« ‹Ni näk mo da dhaagø mo cøøa baŋ lääy na dïcwøø, dhaagø manøgø ki lääy wär putu 'näk. Ka adïëri møn ge wär put 'näk. Kwör remø marge ena bäätge keerge.

¹⁷« ‹Ni näk mo da dhaanhø mo lwøra coki, nee beeye nyiwänni wala coki mana nywøl menni, nee dëër gø joode, ni ö nyaanøgø ni joot dëër nyenøgø, manøgø beeye gïn mo duunnö ki räny nyeŋ. Geni ge wär put tïïc ni tøør ni nëënö jï tuuŋge. Nyenøgø aci baŋ coki na dhaagø. Bääyö mare ena bääte.

¹⁸« ‹Ni näk mo da dhaanhø mo cøøa baŋ dhaagø mo dëëre da gïr mään ni bute ki gø na dhaagø, ŋatøgø aci baŋ dhaagø ni gïr mään nut ree, ni ö dhaage manøgø ni cïp dëëre ni ree da gïr mään. Geni karge riet wär putge tïmö ni tøør yïthakic tuuŋge.

¹⁹« ‹Uuni thuwø kär dee dhaanhø mo ci baŋ mari cöök menni na dhaagø wala waai cöök wänni, kiper teeŋ ŋatøgø mare døøn ri ŋata kälge ri remø aciel ki gø. Bääyö marge ena bäätge keerge.

²⁰« ‹Ni näk mo da dhaanhø mo cøøa baŋ cï wänni cöök wänni na dhaagø, eni døøya cöök wänni mo jööt. Geni raay moge ena bäätge keerge. Geni ge thøw ni bäŋ obwöre jïge.

²¹« ‹Ni näk mo da dhaanhø mo lwøra cï coki na dhaagø, gïnögø beeye gïn mo raac. Ŋatøgø coki atïïe ni jööt. Geni ge ba jïti ko obwöre.

²²« ‹'Ba uuni, gwøgu ciik 'moa bëët ki luup ŋøl 'moa bëët, ni kïthu ge bäät tïïc, kiper nee ŋöömmo kïtha u yie noo bëëdu yie, nou ba tïïa nou kwiere.

²³Uuni, käru cäädhö køør kööŋŋe mo wø tïïc wïth juurre moo riema wøk nyïmmu, kiper geni teeŋ gïïögø bëët yøø atïïcge. Kiper manøgønø, aana männö ki geni.

²⁴'Ba ennø, anø caana jïïu ki man näk mo ŋöömö marge cøøa jïïu, ni beeye aani ki dëëra noo cïp gø jïïu nee ci jïïu, ni beeye ŋöömma näk caak ki maar kïc päl yie. Beeye aani na Wuuö Jwøk, Jwøk maru, na pää uuni ki wïth juurre.

²⁵« ‹Kiper manøgønø, lääy mana waany wär bëëde ni you pääö ki mana ba waany, ni bëët wenyø mana waany ni you pääö ki mana ba waany. Dëëtu kär tïïyu ni ec raac ki uuni ki køør lääy wala wenyø wala gïrpiny jaak mo muuli ka piny røk gïïa pääa ki uuni na näk ba waany.

²⁶Uuni, bëëdu nou ena kur keeru na 'moa, kiper aani na Wuuö Jwøk, a ena kur keera. Ni beeye aani na cïp uuni kur keeru ki røk wïth juurre møga, nou bëëdu ni uuna 'moa.

²⁷« ‹'Ba ni näk mo da dïcwøø wala dhaagø dïïu mo ree da juu mo cøøra jwïëc jiy moa no othøw, wala waŋe riek ki jap ajuuk, ka adïëri møn, teeŋ jøøgø wär put 'näk. Ge wär put këërö ki kïte; kwör remø marge ena bäätge keerge.› »