Read anuak Ciik Kiper Dïlämme 21 Bible Online

Ciik Kiper Dïlämme 21 - anuak bible

Ciik Kiper Dïlämme 21

¹'Ba Wuuö Jwøk aköö jï Modhe, ni «Caanï jï dïlämme, wäät Aran, ni kööï jïge ni Wuuö Jwøk aköö, ni ‹Kär dee dïlämi mo tïïya dëëre ni ba waany ki køør dhaanhø mo othøw yïthakic tuuŋge,

²ni näk mo paa tuuŋge moa kälge ri remø aciel ki gø kiree, kaamar menni, ki wänni, ki wääde, ki nyaare, ki coki ma dïcwøø,

³ki coki ma dhaagø mo dëër dïcwøø poot kuue, mo bëëdö buute kiper eni poot bäŋ dïcwøø jïre. Ki køør coki manøgø na dhaagø enø, løny ki man tïïc dëëre ni ba waany.

⁴Dïlämi dëëre kär tïïe ni ba waany dï tuuŋge ki køør nywöm mare, nee ba duunne ka apääda dëëre.

⁵« ‹Dïlämme wïthge kär määnyge ki bøønne, ni ba ŋatge deŋ jïëc tïkge, ni ba pwötge dëëtge ki gïï mo beth kiper thøø.

⁶Geni, ge wär bëëtge ni ge ena kur keerge na 'moa, a na Jwøk marge, ni ba päätge nyeŋŋa, a na Jwøk marge, kiper beeye geni ni wø waaŋ olämme ki maac jïra, a na Wuuö Jwøk, ni cïpge na cam jïra, a na Jwøk marge. Geni, ge wär bëëtge ni ge ena kur keerge.

⁷« ‹Kär dee dïlämi mo nywøma dhaagø mo ree ee päädö ki køør tïï käp, ni ba nywøm dhaagø mo onø bødhø baŋ cwøre. Kiper dïlämi ena kur keere na mara, a na Jwøk.

⁸Uuni, u jø Icriel, dïlämi wär raŋŋu ni ena kur keere, kiper beeye eni ni wø cïp cam no olämi jïra, a na Jwøk maru. Dïlämi wär bëëde ni ena kur keere ki jïïu, kiper aani na Wuuö Jwøk, na cïp u kur keeru, a ena kur keera.

⁹« ‹Nyi dïlämi thuwø, ni näk mo ree ee päädö ki køør tïï käp, eni pääta wänni; eni wär waaŋ ki maac.

¹⁰« ‹'Ba dïlämi mana kare dwøŋ yïthakic nyïïmenni, na näk maar rööny othii wïïe, no orøønyø ki man käär abïïk dïlämi, kär jïëye wiie ni rege jwälö ni ba jeec abïïe moe kiper thøø.

¹¹Eni kär ci bäät dhaanhø mo othøw, ni ba tïïc dëëre ni ba waany, këël thøwa wänni wala menni;

¹²ni ba døny wøk ki yi kar lam mana en kur keere kiper thøø, kiper nee kar lam mara ba pääde, a na Jwøk mare, kiper rööny mana røønya eni ki gø, a na Jwøk mare, ena bääte, ki køør mana thïïm wïïe ki maaw. Beeye aani na Wuuö Jwøk.

¹³« ‹'Ba eni wär tïme ni nywøma nyakøø mo dëër dïcwøø poot kuue.

¹⁴Dhaagø ma cï thøø, ki dhaagø mo obøth, ki dhaagø mo ree ee päädö ki køør tïï käp, teeŋ mään moøgø kär nyöömmö rege. 'Ba eni wär tïme ni nywøma nyakøø mo dëër dïcwøø poot kuue røk jø poge,

¹⁵kiper nee kunhnhö mare ba tïme ni ba waany røk jø poge, kiper beeye aani na Wuuö Jwøk na cïp eni kur keere.› »

¹⁶Køøre Wuuö Jwøk acäänö ki Modhe ni kööe,

¹⁷ni «Caanï jï Aran ni Wuuö Jwøk aköö, ni ‹Ki røk jø wø käl dëërï, këël beenhnhe moge moo ööi, bäŋe ŋat mo dëëre da möönynyö mo nyänhnhö ki man cïp cam no olämi jïra, a na Jwøk mare.

¹⁸Ka adïëri møn, kär dee dhaanhø mo nyänhnhö mo dëëre da möönynyö, nee cwør, wala ŋwøl, wala oliec, wala dhaanhø mo yi cwääc mare ba beer,

¹⁹wala dhaanhø mo tiete rege baŋø wala ceŋŋe oränynyö,

²⁰wala dhaanhø mo kööre da cala wala mo ocwääö ni ciek døc, wala dhaanhø mo da gïn mo ogwäyö ri nyeŋŋe, wala dhaanhø mo dëëre da täw mo jelli, wala dhaanhø mo jage rege dïnö.

²¹Ki røk jøw okäl dëër dïlämi ma Aran, bäŋe dhaanhø mo dëëre da möönynyö mo nyänhnhö ki man cïp olämi man wø waaŋ ki maac jïra, a na Wuuö Jwøk. Kiper mana näk da möönynyö dëëre, eni kär nyänhnhö ki man cïp cam no olämi jïra, a na Jwøk mare.

²²Eni løny jïre ki man cäme ki cam man wø cïp jïra no olämi, a na Jwøk mare, ni beeye teeŋ cam mana en kur keere ki mana en kur keere na pere leth.

²³'Ba eni, kiper mana näk dëëre da möönynyö, ba løny jïre ki man døny yi kanya en kur keere nyïm abïïna näk gëëŋi, ni ba nyänh buut gïn wø cïp olämme bääte, kiper nee kar lam mara na en kur keere ba pääde. Beeye aani na Wuuö Jwøk na cïp gø kur keere.› »

²⁴'Ba Modhe gïïögø aput caan jï Aran ki wäät Aran ki jø Icriel bëët.