Read anuak Ciik Kiper Dïlämme 22 Bible Online

Ciik Kiper Dïlämme 22 - anuak bible

Ciik Kiper Dïlämme 22

¹'Ba Wuuö Jwøk acäänö ki Modhe ni kööe,

²ni «Caanï jï Aran ki wääte nee dëëtge gwøkge ki muuce moa en kur keerge ni wø cïp jø Icrielli kur keerge jïra, kiper nee nyeŋŋa na en kur keere ba päätge. Beeye aani na Wuuö Jwøk.

³«Caanï jïge ni Wuuö Jwøk aköö, ni ‹Ki røk jø wø käl dëëtu bëët këël mano këët røk beenhnhe mou moo ööi, ni näk mo da dhaanhø mo nyänhnha buut muuce moa en kur keerge ni wø cïp jø Icrielli kur keerge jïra, a na Wuuö Jwøk, ni ŋatøgø ba waany, eni puta tïmö ni tøør nyïma. Beeye aani na Wuuö Jwøk.

⁴« ‹Ni näk mo da dhaanhø røk jø wø käl dëër Aran mo dëëre da täw buny dëël mo muuö, wala mo dëëre da tuut mo ööa wøk ki yi jaath dëël mare, eni kär cämö ki muuce moa en kur keerge këël mano tïme ni waany. Ni näk da dhaanhø mo guta gïn mo ba waany, na gïn mo dhaanhø mo othøw ee gudö, wala dhaanhø mo pï dëëre oö wøk,

⁵wala dhaanhø mo guta gïn mo muuli ki piny mo døøya eni mo ba waany, wala guta dhaanhø mo døøya eni mo ba waany ki køør gïna tïïc gø ni ba waany,

⁶dhaanhø mo guta teeŋ gïïögø tïmö ni ba waany këël mano päth cäŋŋi. Eni kär cämö røk muuce moa en kur keerge këël kanyo lwøk dëëre ki pïï.

⁷'Ba kanyo päth cäŋŋi, eni tïmö ni waany. Ki køør manøgø, eni cämö ri muuce moa en kur keerge, kiper beeye cam mare.

⁸Eni kär cämö ki lääy mo thøwa eni keere, wala mo onäk cwienynyi, ni ba tïïc dëëre ni ba waany ki køør gø. Beeye aani na Wuuö Jwøk.

⁹« ‹Dïlämme gïïa cema geni ki ge wär gwøkge, kiper nee ge ba jïtge ki raay ki køørge, nee ba thøwge ki køør mano päätge ge. Beeye aani na Wuuö Jwøk na cïp geni kur keerge.

¹⁰« ‹'Ba dhaanhø jaak kär cämö ki muuce moa en kur keerge. Dhaanhø mo wëëllö mo bëëdö ki dïlämi, wala dhaanhø mo tïïö baŋe ki gwel, kär cämö ki muuce moa en kur keerge.

¹¹'Ba ni näk dïlämi da laŋŋø mo ee ŋeeø ki gwete na mare, wala laaŋe mo nywølla paare, løny ki man cämge ri cam mare.

¹²'Ba ni näk nyi dïlämi onywøm dhaanhe mørri jaak, eni kär cämö ki gïï wø cïp kur keerge na muuce.

¹³'Ba ni näk mo nyi dïlämi odööŋ na cï thøø wala obøth baŋ cwøre ni bäŋ nyilaal jïre, ni duu po wänni kaawat mana bëëde ni poot thiinh, eni løny jïre ki man cäme ri cam wänni; 'ba dhaanhø jaak kär cämö ri gø.

¹⁴« ‹'Ba ni näk mo da dhaanhø mo ocämö ri muuce moa en kur keerge ni kuue, eni cam manøgø na en kur keere enø, kar gø wär dwøge ni mëën bäät gø ki bïï wï cam ni cïp gø jï dïlämi.

¹⁵Dïlämme muuce moa en kur keerge na cïp jø Icrielli jïra, a na Wuuö Jwøk, kär päätge,

¹⁶ni ge kïtha bäät jiy ka ajäl bääyö ki køør mano ö jiyi noo camge muuce moa en kur keerge; kiper beeye aani na Wuuö Jwøk na cïp geni kur keerge.› »

¹⁷'Ba Wuuö Jwøk acäänö ki Modhe ni kööe,

¹⁸ni «Caanï jï Aran ki wääte ki jø Icriel bëët, ni kööï jïge ni Wuuö Jwøk aköö, ‹Ni näk da ŋat dhi øt Icriel wala wëëllö mo path mo bëëdö Icriel mo cïpö ko olämi mare, nee beeye olämi man wø cïp na mar kööŋ, wala olämi man wø cïp na mar met ec jïra, a na Wuuö Jwøk, no olämi man wø waaŋ bäre,

¹⁹kiper nee olämme moøgø jïëc jïïu, wär tïme na rwaath, wala nywø røømmø, wala nywø ateea mo bäŋ gïn mo ogwäyö dëëtge.

²⁰Ni näk mo lääy da gïn mo di jøøŋŋø ree, kär cïpu, kiper ba jïëc jïïu.

²¹Kanyo näk dhaanhø cïpö jï Wuuö Jwøk ko olämi man wø duunni ki mëër ni eni wëëga kööŋ mare thur kare, wala nee cïbe no olämi mar met ec røk dhäk moe wala røk dïëk moe, wär näk mo paya ni bäŋ gïn mo ogwäyö ree, kiper nee jïëc.

²²Lääy ma cwør, wala lääy mo da kare kany mo otoor wala da gïn mo oŋaal gø, wala mo dëëre da atwøda mo muulö ki tuut, wala täw mo jelli, wala nyoonynyø, teeŋ lääy moøgø kär cïpu jïra, a na Wuuö Jwøk, no olämi man wø waaŋ ki maac bäät gïn wø cïp olämme bääte.

²³'Ba ni näk ma dhieŋ wala diel mo cwääc mare ba beer wala da gïn mo ogwäyö ri cwääc mare, løny ki man cïpu gø no olämi mar met ec, 'ba ba jïëc no olämi man wø cïp na mar kööŋ.

²⁴Lääy mo odïnö, nee dïn ni di kamø wala ba kam, kär cïpu no olämi jïra, a na Wuuö Jwøk, ni ba tïïyu teeŋ gïnögø yi ŋöömö maru,

²⁵ni kär nou lwøra teeŋ lääy moøgø baŋ dhaanhø ma jur kiper nee cïpu na cam no olämi jïra, a na Jwøk maru, kiper gïïa raany geni poot ena dëëtge ni da gïn mo di jøøŋŋø dëëtge; geni, ge ba jïëc jïïu.› »

²⁶Køøre Wuuö Jwøk acäänö ki Modhe ni kööe,

²⁷ni «Kanyo näk da dhieŋ, wala røømmø, wala ateea mo onywølø, wär wec nee bëëde ki nïne abïriiø ki menni, 'ba ki mano tägi ri bäc nïne, løny ki man jïëy no olämi man wø waaŋ ki maac jïra, a na Wuuö Jwøk.

²⁸'Ba dhieŋ wala diel kär ŋaallu ki nyaare dïcäŋ aciel.

²⁹«Kany wø cïpu olämi mar dwøk met ec jïra, a na Wuuö Jwøk, wär cïpu ki jöö mo løny ki man jïëc u ki køøre.

³⁰Olämi manøgø wär put cam dïcäŋögø, ni bäŋe gø mo weyu wiiø ree mo këëta amöölla. Beeye aani na Wuuö Jwøk.

³¹«Kiper manøgønø, ciik 'moa wär gwøgu ni kïthu ge bäät tïïc. Beeye aani na Wuuö Jwøk.

³²Uuni, nyeŋŋa na en kur keere kär päätu, 'ba u jø Icriel, a wär raŋŋu naa ena kur keera. Beeye aani na Wuuö Jwøk na cïp u kur keeru,

³³na käl uuni wøk ki yi ŋööm Ijep, naa bëëda ni aana Jwøk maru. Beeye aani na Wuuö Jwøk.»