Read anuak Ciik Kiper Dïlämme 24 Bible Online

Ciik Kiper Dïlämme 24 - anuak bible

Ciik Kiper Dïlämme 24

¹'Ba Wuuö Jwøk acäänö ki Modhe ni kööe,

²ni «Kööm jø Icriel nee känge jïrï ki maaw mana tøŋ kiper lambae, mo käla ri nyïï jenni mo wø wel na mädhi, nee lambae bëëtge ni liel cooth.

³Køøre Aran lambae wär bëëtge ni ee jiiŋŋø yo oduŋkaany røømmø, jï wøk ŋää abïïna näk gëëŋi mar kanya en kur keere na pere leth na en acanduki yie mar luumma tuut Wuuö Jwøki ki jiy, ni tïïc ge nee bëëtge ni liel cooth nyïm Wuuö Jwøk ki mano täge ki wïthïënhö këël amöölla. Manøgø tïmö na ciik mo bëëdö na bäre bäre këël yïth beenhnhe mou moo ööi.

⁴Aran lambae wär bëëtge ni ee jiiŋŋø na karge cooth bäät gïn wø cïp lambae bääte na näk tïïc ka warkey mana tøŋ na en nyïm Wuuö Jwøk.

⁵«'Ba ïïni wärï lwötï ri møø mana pøøth ni deelï gø no opamø na apaar kurriiø; ni møø man nø beeye møø ma rumme ariiø røk rumme apaar man wø en yi rumi mar iipa.

⁶Køøre ïïni muunni moøgø wär cïïmmï na tëëŋŋe ariiø nyïm Wuuö Jwøk bäät tharabëëta mana näk dëëre olëënynyö ki warkey mana tøŋ, na abïciel moi nø ocïïmmö na tëëŋŋö aciel.

⁷Køøre ïïni gïn wø jïye ŋwääi ni met mana tøŋ wär cïïmmï bäät tëëŋŋö man nø na gïr par wïc, nee cääthge ki muunni na aciel no olämi man wø waaŋ ki maac jï Wuuö Jwøk.

⁸Ki cäŋ jwömö cooth, Aran muunni moøgø wär cïp nyïm Wuuö Jwøk. Manøgø bëëdö ni beeye gïn mo otuudö kiper jø Icriel mo bëëdö na bäre bäre.

⁹Muunni moøgø bëëdö na mo Aran ki jø wø käl dëëre, ni bëëde ni camge yi kany mo ena kur keere. Kiper beeye gïn mo ena kur keere mo pere leth ri kuna näk kurge røk olämme mo wø waaŋ ki maac jï Wuuö Jwøk.»

¹⁰'Ba da nyen mør mo menni nyi jø Icriel, mo wänni nyï Ijep. Nyenøgø ena aa wøk dï jø Icriel, ni këëtge ki ŋat Icriel yi twïër.

¹¹'Ba nyenøgø na o nyi jø Icriel enø, Wuuö Jwøk apääde ni jany gø. Kanyøgø ena put jiyi kïth baŋ Modhe. 'Ba nyeŋ menni beeye Cëlömith nyi Debiray, nyen mo käla ri tuuŋ Daan.

¹²Køøre geni nyenøgø akïthge øt twöc, këël mano ŋäcge dwøl mano cur dhi Wuuö Jwøk kiper nyenøgø.

¹³'Ba køøre Wuuö Jwøk aput cäänö ki Modhe ni kööe,

¹⁴ni «Nyena jädö kïth wøk ŋää twïër, ni ö jøøa wïny ajaany mare bëët ni peethge ceŋge wï nyenøgø. Køøre dhaanh Icriel bäre nyenøgø wär këërge ki kïte.

¹⁵Køøre ïïni wär put caan jï jø Icriel ni Wuuö Jwøk aköö, ni ‹Ni näk da ŋat mo janynya aani na Jwøk mare, bääyö mare ena bääte keere.

¹⁶Maya thuwø, ŋat mo pääta aani na Wuuö Jwøk, ka adïëri møn, eni wär put 'näk. Dhaanh Icriel bäre, nyenøgø wär putge këërö ki kïte møn. Nee wëëllö mo path wala ŋat Icriel, ni näk maa ee päädö, eni wär put 'näk.

¹⁷« ‹'Ba ni näk mo dhaanhø nyääga jwïëc dhaanhø, ka adïëri møn, eni wär put 'näk.

¹⁸'Ba ŋat mo nyääga jwïëc lää paac mar dhaanhø mør, kar gø wär coole. Gïn mo kwøw cool ka gïn mo kwøw.

¹⁹'Ba ni näk mo dhaanhø ŋat mør ee mooø ki ŋwellø, teeŋ ŋwellø mana tïïe wär dwøk dëëre.

²⁰Kiper toor cool ka toor, ni waŋ cool ka waŋ, ni lëëö cool ka lëëö. Ŋatøgø teeŋ ŋwellø mana tïïe dëër dhaanhø mør, wär put dwøk dëëre.

²¹Ŋat mo 'näga lää paac, kar gø wär coole; 'ba ŋat mo 'näga dhaanhø, eni wär 'näk.

²²Uuni, ciik moøgø bëëdö na aciel kiperu, u na jø Icriel, ki wëëlle moa path. Kiper beeye aani na Wuuö Jwøk, Jwøk maru.› »

²³'Ba Modhe aput cäänö ki jø Icriel; køøre jiy ŋata jany Wuuö Jwøk aputge kïth wøk ŋää twïër, ni këërge gø ki kïte. Ni manøgø tïïc jø Icrielli ka køør mana ö Wuuö Jwøki na kööm Modhe ki gø.