Read anuak Ciik Kiper Dïlämme 25 Bible Online

Ciik Kiper Dïlämme 25 - anuak bible

Ciik Kiper Dïlämme 25

¹'Ba Wuuö Jwøk acäänö ki Modhe bäät Kïn Caynay ni kööe,

²ni «Caanï jï jø Icriel, ni kööï jïge ni Wuuö Jwøk aköö, ni ‹Kanyo dønynyu yi ŋöömmo cïba jïïu, kany wø tïme na ri bïriet cwiiri, ŋöömö wär jïte ki jwöm nou wøøra aani, a na Wuuö Jwøk.

³Pwöth mou wär bëëde ni piithu piidhø ki cwiiri abïciel, ni bëët omøki mou ni wïthge goorru goorø ki yïth cwiiri abïciel, ni bëët nyïïge ni cooŋu piny;

⁴'ba noo tïme na ri bïriet cwiiri, ŋöömö wär jïte ki jwöm, na jwöm mo ocïp kur keere jïra, a na Wuuö Jwøk. Ni uuni, pwöth mou ba piithu, ni ba goorru wïth omøki mou.

⁵Uuni, caammi mo pwöth mou moa näk bär kär kayu, ni ba pønnu nyïïomøki mou moa nywøl ni wïthge kär goorø. Manøgø beeye jwöm ma yi cwiir kiper ŋöömö.

⁶'Ba yi cwiinøgø no ö pwöthi noo jwömge rege yie, bär moo ciek yïth pwöth poot bëëdö na cam kiperu bëët, ki laaŋe mou moa näk cwøw ki moa näk mään, ki jø wø tïny uuni ki gwel, ki wëëlle moa path ni wø bëëdö dïïu.

⁷Këël lääc paac mou, ki lääc paap moa en yi ŋöömö maru, gïïo ciek yi ŋöömö jaak tïmö na cam kiperge.

⁸« ‹'Ba uuni kwör jwöm abïriiø mo yïth cwiiri wär kwäänu wøk, na abïriiø kwöre ma cwiiri abïriiø; køøre tïmö ni da kwör jwöm abïriiø jïïu mo yïth cwiiri, ni beeye kar cwiiri ma pïëraŋween ka abïŋween.

⁹'Ba noo tïm nïr dwää abïriiø na apaar, tuuŋ nywø røømmø wär put kooth yi ŋöömö bäre, ni beeye yi Cäŋ Man Wø Tïïc Okïdi Yie noo kooth tuuŋ yie.

¹⁰Ni manøgø u cïba pïërbïï cwiiri kur keere, ni gøøu luubö piny mar dwøk ŋøøm ki wec jiy yi ŋöömö bäre. Manøgø bëëdö jïïu ni beeye cwiir mo di cwølø ni Jubili,[14] ni ö ŋati man nø ni døø pwödhö mare baŋe, ni ö jøøa biel dëëtge na laaŋe ni døøge baŋ jø tuuŋge.

¹¹Pïërbïï cwiiri cooth wär bëëde jïïu ni beeye kar jwöm mar Jubili; ni bëëdu nou ba pïïdhö ni ba kayu caammi moa näk bär, ni ba pønnu nyïïomøki moa nywøl ni wïthge kär goorø.

¹²Kiper cwiin Jubili bëëdö ni ena kur keere ki jïïu. Uuni wär bëëde nou cama bär moa ciek yïth pwöth.

¹³« ‹Noo tïme na yi cwiir mar Jubili, ŋati man nø dïïu pwödhö mare wär døø baŋe.

¹⁴« ‹'Ba ni näk mo pwödhö marï iï gadhø ki ŋat pou, wala ï ŋeewa pwödhö baŋe, kär dëëtu møønnu.

¹⁵Kanyo ŋëëï ki pwödhö baŋ ŋat pou, gäte wär cääp no opäärö ki kwään cwiiri moa no opöödhö køør cwiin jwöm mar Jubili; ni ŋato gath pwödhö mare ki ïïni, gäte wär cääp ki køør kwään cwiiri moo dööŋ mo kac caammi.

¹⁶Ni näk mo cwiiri poot thööth, gät pwödhö mano gathï wär meetï ki jöö ma kare. 'Ba ni näk mo cwiiri oløny ni nøk, gät pwödhö wär dwøk piny ki jöö ma kare, kiper pwödhö mano gath dhaanhø ki ïïni käle ka køør kwään cwiiri moo kac caammi yïthge.

¹⁷'Ba uuni, kär dëëtu møønnu; 'ba bëëdu nou lwäära aani, a na Jwøk maru; kiper beeye aani na Wuuö Jwøk, Jwøk maru.

¹⁸« ‹Uuni, bëëdu nou gwøga ciik 'moa ki luup ŋøl 'moa, ni kïthu geni bäät tïïc, kiper nou bëëdu yi ŋöömö ni bäŋ gïn caarru kiper leny,

¹⁹ni ŋöömö bëëdö ni ciek ki caammi, nou cämö ni jäŋŋu, kiper nou bëëdö yi ŋöömö ni bäŋ gïn caarru kiper leny.

²⁰'Ba ni näk mou pëëö, na «?Agïnaŋø noo camwa kany wø tïme na ri bïriet cwiiri, ni näk mo wa ba pïïdhö ni kacwa geni?»

²¹Aani na Wuuö Jwøk, kany wø tïme na ri bïcier cwiiri, gwïëth mara jääŋŋa jääŋŋö bäätu, kiper nee ŋöömö maru jïte ki cam mo päl, ma kar cwiiri adäk.

²²Ni kanyo tïme na kar pïïdhö maru ri bäc cwiiri, u poot bëëdö nou cama caammi moa dïkwøŋ, ni bëëdu nou cama geni këël mano pïïyu ri bïŋweer cwiiri mano kayu caammi møga yie.

²³« ‹'Ba ŋöömö ba dwøk pwödhö nee put bëëtö na bäre bäre. Kiper ŋöömö beeye mara, a na Wuuö Jwøk, ni ni bëëdu ki aani en, u bëëdö kaamar wëëlle.

²⁴Pwöth moa näk you ŋeeø na mou yi paac bäre, wär cäŋu weyø nee wiil ŋata ŋeewu ŋöömö manøgø baŋe.

²⁵« ‹'Ba ni näk mo ŋat pou otïmö ni can, ni gath pwödhö mare kiper can, watge mana kare cään wär cøøe, ni cäŋ pwödhö ŋeewø mana gath watge.

²⁶'Ba ni näk mo dhaanhø bäŋ watge mo cäŋa pwödhö wïïl wøk baŋ ŋata gadhi ki gø, ni näk mo eno cäŋ kwärrö, ni jït cere ki jammi mo orømø ki man cäŋ pwödhö wïïl wøk ki ge,

²⁷eni cwiiri wär cääbe ki mana täge ki kanya gath gø yie, ni dwøk thäk jap ŋata gath pwödhö ki gø, ni ö eni ni døø yi pwöthe.

²⁸'Ba ni näk mo cere ba jïti ki jammi mo rømø ki man døø pwödhö baŋe, pwödhö mana gadhe wär bëëde cer ŋata ŋeew gø këël mano këët ri cwiir mar Jubili. 'Ba no pïïe ri cwiir mar Jubili, pwödhö di duuö; køøre, eni løny ki man døø yi pwödhö mare.

²⁹« ‹'Ba ni näk mo dhaanhø gatha øtø mo ena yi pääny mo ogeerø ki kiir, eni teek mare man wïïl øtø wøk ki gø, bëëdö no okoorø këël kanyo päŋ cwiirri, ni täk ki kanya gadhi yie. Teek mare man wïïl øtø wøk ki gø, thöödhö ki cwiir bäre.

³⁰'Ba ni näk mo øtø kär cäŋ wïïl wøk kipere kanyo thum cwiirri, ødøgø ni en yi pääny mo ogeerø ki kiir enø, puta bëëtö na bäre bäre jï ŋata ŋeew gø, këël mano këët yïth beenhnhe moe moo ööi. Ødøgø ba løny ki man dwøgi këët yi cwiir mar Jubili.

³¹'Ba uudi moa näk mo atude moa näk kär geerø ki kiiri, di kwaanø kaamar pwöth. Løny ki man cäŋ ge wïïl wøk, ni løny ki man duui yi cwiir mar Jubili.

³²« ‹'Ba jø tuuŋ Libay jïge da teek, ni kanyo manyge jaak, løny jïge ki man cäŋge uudi moge wïïl wøk moa en yïth päänye moa näk thöökge.

³³Øtø mo ogath jø tuuŋ Libayi yi pääny mana näk thööŋge, løny ki man cäŋi wïïl wøk. 'Ba noo tïme na yi cwiir mar Jubili, dwøga baŋ wänni mana gath gø, kiper uudi moa en yïth päänye mo jø tuuŋ Libay beeye thöökge na bäre bäre dï jø Icriel.

³⁴'Ba pwöle mo kwör kwaath mo päänye moge, ba løny ki man dwøgi pwödhö, kiper beeye thöökge na bäre bäre.

³⁵« ‹'Ba ni näk mo ŋat pou otïmö ni can, ni ba løny jïre ki man køny dëëre keere dïïu, eni wär kønyï kaawat mana diï wëëllö kønyø, wala ŋat mo beeta kany mo thiinh buutï; kiper nee eni bëëde ni ena dïïu.

³⁶Ïïni, kär gïïa maae baŋï cwølï ni da wïthge; 'ba bëëdï niï lwäära Jwøk marï, nee ŋat pou lønye ki man bëëde dïïu.

³⁷Ïïni, kär eni wëëk mäyö ki gwel baŋï nee duue ni da wïïe, wala cam marï mo duue ni ee meedø.

³⁸Beeye aani na Wuuö Jwøk, Jwøk maru, na käl u wøk ki yi ŋööm Ijep, nee ŋööm Keenan cïba jïïu, naa bëëda ni aana Jwøk maru.

³⁹« ‹'Ba ni näk mo ŋat pou otïmö ni can dïïu, ni biel dëëre baŋï, kär eni wëëk tïïc mo caala tïï laŋ.

⁴⁰Eni wär bëëde ki ïïni kaamar dhaanhø mo tïnynya ïïni ki gwel, ni caala ŋat mo path mo bëëdö buutï. Eni wär bëëde ni tïnynya ïïni këël mano ŋuude ri cwiir mar Jubili.

⁴¹Køøre nø, eni ki wääte wär weyï nee aacge, ni døøge baŋ jø tuuŋge, nee lønye jïre ki man døø yi ŋööm kwäcge.

⁴²Kiper jø Icriel na käla wøk ki yi ŋööm Ijep, ge bëëdö na jø tïïc 'moa, a na Wuuö Jwøk; geni ge ba dwøk pwödhö na laaŋe.

⁴³Uuni, kär ge magu ni you caannø, 'ba bëëdu nou lwäära aani na Jwøk maru.

⁴⁴« ‹'Ba cwøw ki mään moo bëëdö na laaŋe jïïu, wär tïme ni ŋeewu baŋ wïth juurre moa en deŋŋu. Løny jïïu ki man ŋëëu baŋge ki laaŋe.

⁴⁵Uuni thuwø, løny jïïu ki man ŋëëu røk obwöre mo jøøa path ni wø bëëdö dïïu, ki røk wïth tuŋi moge, ni beege moa nywølge yi ŋöömö maru. Teeŋ jøøgø, ge tïmö ni gena mou.

⁴⁶Uuni løny ki man weyu geni jï wäätu nee dööŋge køøru na moge, ni tïïyu geni nee bëëtge na laaŋe na bäre bäre. 'Ba uuni jø pou ma jø Icriel, kär magu ni ge you caannø.

⁴⁷« ‹'Ba ni näk mo wëëllö mo path, wala ŋat mo beeta kany mo thiinh dïïu okwär, ni ö ŋat pou ni tïme ni can ni biel dëëre baŋ wëëllö mo path mo bëëdö dïïu, wala baŋ tuuŋ wëëllö mo path,

⁴⁸eni jïre da teek ki man wïïli wøk køør mana nø biel dëëre. Dhaanhø aciel røk jø tuuŋge, kaamar coki, løny ki man wïïl gø wøk.

⁴⁹Teeŋ cöök wänni, ki o cöök wänni, ki ŋat mo ge käla ri remø aciel ki gø røk tuuŋge, løny ki man wïïl gø wøk. Wala ni näk mo eni cere jïtö ki jammi, løny ki man wïïl dëëre wøk.

⁵⁰Eni ki ŋata biel dëëre baŋ gø, cwiiri wär cääpge, ni täkge ki kanya ö ŋatøgø na biel dëëre yie, këël mano këët ri cwiir mar Jubili. Gät mano cool kiper nee ŋatøgø wec, wär tïïc ni dïët ki køør kwään cwiiri. Kanya beede buut ŋatøgø gäte wär tïïc ni caala man wø cool jï ŋat tïïc mo tïïö ka gwel.

⁵¹Ni näk mo poot da cwiiri mo thööth mo odööŋ, eni gät moa no orømø na karge, na mo wïïl dëëre wøk ki ge, wär coole jï ŋata biel dëëre baŋ gø.

⁵²'Ba ni näk mo dööŋŋa cwiiri mo nøk ki man pïïö yi cwiir mar Jubili, eni wär cääpge ki ŋatøgø. Køøre eni gät moa no orømø ki køør kwään cwiiri wär coole ni eni wïïla dëëre wøk ki ge.

⁵³Ŋata biel røk baŋe, ŋatøgø wär maae ni caala ŋat tïïc mo tïïö baŋe ki yi cwiir, mo cunne cunnö ki gwel. Ŋatøgø kär dhaanhø maae ni ee caannø ni nëënö jïrï.

⁵⁴« ‹'Ba këël ni näk mo eni kär wïïl wøk yïth cwiiri moøgø, eni ko obwöre moe ge poot di wiiø kanyo tïme na yi cwiir mar Jubili.

⁵⁵Kiper jø Icriel gena jø tïïc 'moa. Gena jø tïïc 'moa na käla wøk ki yi ŋööm Ijep. Beeye aani na Wuuö Jwøk, Jwøk maru.