Read anuak Ciik Kiper Dïlämme 26 Bible Online

Ciik Kiper Dïlämme 26 - anuak bible

Ciik Kiper Dïlämme 26

¹« ‹Uuni, kär dëëtu tëëŋŋu ki kït gïrpiny jaak, ni ba cööthu piny ki gïï lam wala kïte mo di wøørø, ni ba määnynyu dëëtu ki kïte mo otieŋø na juu yi ŋöömö maru kiper nee cøŋŋu këëllu piny nyïmge nou wøøra ge, kiper beeye aani na Wuuö Jwøk, Jwøk maru.

²« ‹Uuni, gwøgu cäŋ jwömö mara, ni wøørru kar lam mara na en kur keere. Beeye aani na Wuuö Jwøk.

³« ‹Ni näk mou caatha køør ciik 'moa, ni gwøgu gïïa cema ni kïthu ge bäät tïïc,

⁴aani køth jääŋŋa jääŋŋö ki kanya näk kare, kiper nee caammi ciekge yi ŋöömmu, ni ö jenni mo wø piith ni nywølge ki nyïëdi.

⁵Ka adïëri møn, tïïc mar dïn beel mou ba cuŋŋi këël mano këët ri pøn nyïïomøki, ni ö pøn nyïïomøki ni këët ri pïïdhö. Uuno bëëdö nou cämö ki caammi mou jaak ni jäŋŋu, ni bëëdu yi ŋöömö maru ni bäŋ gïn caarru kiper leny.

⁶« ‹Aani thuwø bëët mëër tïïa tïïö ni dagø yi ŋöömö, nou bëëdu ni rou you nyaaŋ piny ni bäŋ ŋat mo wëëk u lwär. Aani thuwø, lääc paap moa reyø tïïa tïïö ni bäŋgø yi ŋöömö maru, ni bäŋe tøŋ mo tïŋ mo ööa baŋu yi ŋöömö maru.

⁷Nyïïmän mou riemmu riemmø ni päthge ceŋŋu dhi tøŋ maru.

⁸Jiy abïïc dïïu nyïïmän ma dïpa riemge riemmø, ni ö jiyi ma dïpa ni riemge nyïïmän ma kume apaar, ni put nyïïmänni mou päth ceŋŋu dhi tøŋ maru.

⁹« ‹'Ba aani nyïma luua baŋu ni tïïa uuni nou nyöödu ni nyaayu, ni ö luumma na tuuda ki uuni ni wëëga gø thur kare.

¹⁰U bëëdö nou poot cämö ki caammi moa näk oruuki, ni wiillu geni ki caammi mo ociek na nyärö.

¹¹Aani kar bëëtö mara tïïa tïïö nee bëëde ni ena dïïu, ni bëëda nou ba kwiera.

¹²Aani thuwø, aano cäädhi dïïu, ni bëëda ni aana Jwøk maru, ni bëëdu ni uuna jiya.

¹³Beeye aani na Wuuö Jwøk, Jwøk maru, na käl uuni wøk ki yi ŋööm Ijep, kiper nou ba bëëdu ni uuna laaŋe moge, ni paanya bëët laŋ bäätu na caal jaath puur ni wø jøøny ŋut rwaath, ni tïïa uuni nou cäädhu ni wïthu you täärö jaak.

¹⁴« ‹'Ba ni näk mo dwøra ba wïnynyu ni ba kïthu gïïa cema bäät tïïc,

¹⁵ni näk mo ciik 'moa you kwierø ni bëëdu nou män ki luup ŋøl 'moa, ni ba kïthu gïïa cema bëët bäät tïïc, ni raanynyu luumma na tuuda,

¹⁶aani thuwø, gïï ii tïïa tïïö dëëtu: a känna bäätu ki lwär mo cwöba dëëtu, ki täwe mo leth, ki teeŋ adïrïgi mo tïïya nyeŋŋu ni ba nëënö, mo cama dëëtu. Caammi mou opiithu ki jaak, kiper nyïïmän mou öö ni camge caammi moøgø.

¹⁷Aani dëëtø neenø neenø ki uuni, ni ö nyïïmän mou ni böötge uuni. Jiy moa män ki uuni, uuno bëëdö tietge, ni bëëdu nou böö ni bäŋ ŋat mo oŋwiec køøru.

¹⁸« ‹'Ba køør gïïögø, ni näk mou poot bëëdö ni dwøra ba wïnynyu, aani u jääla jäälö kwöre abïriiø kiper raay mou.

¹⁹Aani thuwø, atöör mar teek maru raanynya raanynyø, ni taala maal ni en bäätu, ni tïïa piny nee tale ni teek kaamar nywïënyö.

²⁰Öölö maru oaay jaak, kiper ŋöömö maru tïmö ni ba ciek ki caammi, ni ö jenni mo ŋöömö maru ni ba nywølge ki nyïëdi.

²¹« ‹'Ba ni näk mou poot gëëmö ki aani ni dwøra poot ba wïnynyu, a känna bäätu ki gïï mo leth kwöre abïriiø ki køør raay mou.

²²Aani cwëënyi mo paap mo owär jääŋŋa jääŋŋö dïïu, ni thöörge obwöre mou, ni dïïrge wïth lääc paac mou.

²³« ‹'Ba ki køør gïïögø, ni näk mou poot ba duu baŋa ni maru poot na ageem ki aani,

²⁴aani ki dëëra kiree, a gëëmmö ki uuni, ni tïïa ki gïï mo leth dëëtu kwöre abïriiø kiper raay mou.

²⁵Aani thuwø a känna bäätu ki leny naa jääla uuni kiper mana raanynyu luumma tuuda ki uuni, ni kanyo bëëdu ni dëëtu you cooŋ yïth päänye mou, täw mo leth jääŋŋa jääŋŋö dïïu ni päthu ceŋ nyïïmän mou.

²⁶Kanyo ŋøla jöör cam maru, mään apaar otïmö ni cam maru thaalge yi këënnö aciel, ni cïpge cam jïïu mana thaalge ni ege petø, ni cammu gø nou ba jäŋ.

²⁷« ‹'Ba ki køør gïïögø, ni näk mo dwøra poot ba wïnynyu ni maru poot na ageem ki aani,

²⁸aani ki dëëra kiree, ageem mara ki uuni puta ka tïïc na wëër dëëtu, ni jääla uuni kwöre abïriiø kiper raay mou.

²⁹Uuni rïk dëët wäätu ki nyïïu cammu camø møn.

³⁰Aani kwör lam mou moa en bäät thuuri raanynya raanynyø, ni ö gïïö ni wø duuŋ gïn wø jïye ŋwääi ni met bäätge ni tøya geni, ni ö dëët jiy moa no othøw ni lööra ge bäät gïïa näk you tieŋø ni wø lammu moa no otøyø, kiper aano nø männö ki uuni.

³¹Päänye mou oraanynya na bäre ni nigeruuth, ni raanynya kwör lam mou, ni tïm muuce mou mo wø waaŋ ni wø ŋwääi ni met ni ba ŋwääi jïra këët.

³²Aani ki dëëra kiree ŋöömö maru raanynya raanynyø, ni ö nyïïmänni mou moo ö baŋ bëëtö yie ni thäŋ yïthge ki gïr gø.

³³'Ba uuni, u keetha keethø yïthakic wïth juurre, ni jääŋŋa tøŋ køøru cooth; ni ö ŋöömö maru ni ränynye, ni ö päänye mou ni ränyge ni nigeruuth.

³⁴Køøre ŋöömö maru yie omïnni kanyo bëëde ni ree ee jwömö ki yïth nïne bëët mo ränynyö mare, ni uuni ki dëëtu u ena yi ŋöömö mar nyïïmän mou. Kanyøgønø, ŋöömö maru ree jwöme jwömö, ni mïn yie ki yïth nïr jwöm moe.

³⁵Nïne bëët moo bëët ŋöömö maru no oränynyö, jïtö ki jwöm røk mo käre kwøŋ joot yïth nïr jwöm mou kanya bëëdu yie.

³⁶« ‹'Ba jiy moo dööŋ ni kwøw dëëtu, cwïnyge kïtha kïthö ki lwär yïth ŋøøp nyïïmän moge, ni dwør bøøŋ jaath mo otuk jame ge puta bwøk ki gø, ni bëëtge ni ge rïïŋö ni bäŋ ŋat mo ŋwieya køørge, keda ge ŋwieya leny, ni putge päänhnhö.

³⁷Geni, dëëtge dhïrge dhïrö ki dëëtge keerge, keda ge ŋwieya leny, këël na bëëde ni bäŋ ŋat mo ŋwieya køørge. Uuni, u bëëdö ni bäŋ teek jïïu ki man cuŋŋu nyïm nyïïmännu.

³⁸'Ba wïthu odïdi yïthakic wïth juurre, ni ö ŋööm nyïïmännu ni thöörge uuni.

³⁹'Ba jiy moo dööŋ ni kwøw dïïu otøp yi ŋööm nyïïmän mou kiper gïïa bacge, këël kiper gïïa bac kwäcge, ge poot tøba kunece kiperge.

⁴⁰« ‹'Ba ni näk mo raay moge ki raay mo kwäcge ege købø, ki jöö mana baacge gø ki gø, ni beeye gïïa tïïcge dëëra, ka ageem mana tïïcge dëëra thuwø,

⁴¹na tïïcge aani naa gëëma ki geni thuwø, ki man kïtha geni yi ŋööm nyïïmän moge; wala ni näk mo cwïnyge na näk kär daŋø ki man cïpge ge jïra, ege døøc mo mwöl, ni jïëcge gïïa bacge,

⁴²aani wïïa caara caarø ki luumma na tuuda ki Jeekap, ki Aydhak, ki Eeberam, ni caara wïïa ki ŋöömö marge.

⁴³Ŋöömö marge wecge wiiø, ni ö ŋöömö ni mïn yie ki jwöm mano joode kanyo bëëde no oränynyö ni ge tøør yie. Geni bääyö marge jïëcge jïëö, kiper geni luup ŋøl 'moa akwierge ni bëëtge ni ge män ki ciik 'moa.

⁴⁴'Ba këël na tïïcge gïïögø, kanyo enge yi ŋööm nyïïmän moge, ge ba kwiera, naa ba männi ki geni ki man raanynya ge. Ni näk mo tïïa tïïö, tïmö naa raanynya luumma tuuda ki geni. 'Ba ba tïïa, kiper beeye aani na Wuuö Jwøk, Jwøk marge.

⁴⁵'Ba kiperge, wïïa caara caarø ki luumma na tuuda ki kwäcge na käla wøk ki yi ŋööm Ijep ni nëënö jï wïth juurre, kiper naa bëëda ni aana Jwøk marge. Beeye aani na Wuuö Jwøk.› »

⁴⁶Moøgø beege ciik ki luup ŋøl ki gïïa cem moa cïp Wuuö Jwøki piny yïthakicge ki jø Icriel bäät Kïn Caynay ki ri Modhe.