Read anuak Ciik Kiper Dïlämme 27 Bible Online

Ciik Kiper Dïlämme 27 - anuak bible

Ciik Kiper Dïlämme 27

¹'Ba Wuuö Jwøk acäänö ki Modhe ni kööe,

²ni «Caanï jï jø Icriel ni kööï jïge, ni ‹Ni näk mo dhaanhø okööŋ ki kööŋ mo ena kur keere, ni eni cïba jiy kur keerge jï Wuuö Jwøk, ïïni gïno cool kiperge wär cïp piny no orømø kiperge.

³Mano cïbï piny kiper dïcwøø mo cwiiye tägi ka pïërariiø këël cwiiri ma pïërabïciel, wär cïp piny na gwel-bïrö ma cekelli ma pïërabïïc mar kar lam na en kur keere.

⁴'Ba ni näk mo ena dhaagø, mano cïbï piny kipere beeye gwel-bïrö ma cekelli ma pïëradäk.

⁵'Ba ni näk mo cwiic ŋateca tägi ka cwiiri abïïc këël cwiiri ma pïërariiø, mano cïbï piny kiper dïcwøø beeye gwel-bïrö ma cekelli ma pïërariiø, 'ba kiper dhaagø beeye gwel-bïrö ma cekelli apaar.

⁶'Ba ni näk mo dwääne aciel këël cwiiri abïïc, mano cïbï piny kiper dïcwøø beeye gwel-bïrö ma cekelli apaar, ni mano cïbï piny kiper dhaagø beeye gwel-bïrö ma cekelli adäk.

⁷'Ba ni näk mo cwiic ŋateca tägi ka pïërabïciel këël kunece, mano cïbï piny kiper dïcwøø beeye gwel-bïrö ma cekelli apaar kurbïïc, 'ba kiper dhaagø beeye gwel-bïrö ma cekelli apaar.

⁸'Ba ni näk mo ŋata kööŋ can døc, ni gät mana cïbï piny kipere ba løny ki man cïp gø, ŋata cïp wär kïth baŋ dïlämi, ni ö dïlämi ni cïp piny jï ŋata kööŋ ki gät mana no orømø, ki køør mano løny jïre ki man joot gø.

⁹« ‹'Ba ni näk mo dhaanhø kööŋ ni eni cïpa lääy man wø jïëc no olämi man wø cïp jï Wuuö Jwøk, teeŋ lääy mana cïp jï Wuuö Jwøk enø tïmö ni ena kur keere.

¹⁰Eni lääy manøgø kär wiile, ni ba kïth kar gø ki mør, ni wiila mana beer ki mana raac, wala wiila mana raac ki mana beer. 'Ba ni näk mo lääy ee wiilø ki lääy maya, lääy manøgø ki mana wiili ki gø, geni karge riedi, ge tïmö ni ena kur keerge.

¹¹'Ba ni näk mo gïna kööŋe kiper gø ki man cïp gø, beeye lääy mo ba waany, na man wø ba jïëc ki man cïbi no olämi jï Wuuö Jwøk, eni lääy manøgø wär kïth baŋ dïlämi.

¹²Køøre dïlämi løny ki man ŋøl mare, ki man näk mo beer wala raac, ni gät mano cïp dïlämi piny jaak, beeye mano tïmö na eni.

¹³'Ba ni näk mo eni manynya gø nee wïïl wøk, eni bïï wï gät mano cïbï piny kiper läänögø wär meet bäät gø.

¹⁴« ‹'Ba ni näk mo dhaanhø øde ee cïp kur keere, na man wø cïp kur keere na mar Wuuö Jwøk, dïlämi mare wär ŋøle ki man näk mo beer wala raac; ni gät mano cïp dïlämi piny, puta cuŋŋö kare.

¹⁵'Ba ŋata cïp øde kur keere, ni näk mo manynya gø nee øde wïïl wøk, eni bïï wï gät mana cïbï piny kiper øtø wär meet bäät gø. Køøre øtø døøa baŋe.

¹⁶« ‹'Ba ni näk mo dhaanhø cïba thääŋ ŋöömö mare kur keere jï Wuuö Jwøk, gät mano cïbï piny kipere, wär tïïyï ki køør köödhi moo rømi kipere, nee kööth beek wø cwøl ni gäbci,[15] gät rumi man wø cwøl ni kömer[16] beeye gwel-bïrö ma cekelli ma pïërabïïc.

¹⁷Ni näk mo eni pwödhö mano cïp kur keere tägi ki kanya thum cwiirri man wø cwøl ni Jubili, gät mano cïbï piny kipere wär put cuŋŋö kare.

¹⁸'Ba ni näk mo eni pwödhö mano cïp kur keere tägi ni cwiir man wø cwøl ni Jubili onø pöödhö, dïlämi gät gø mana näk orømø wär cääbe ki køør kwään cwiiri moa no odööŋ këël kanyo këët ri cwiir man wø cwøl ni Jubili. 'Ba kar gät cwiiri moa pöödhö wär ŋul wøk.

¹⁹'Ba ŋata cïp pwödhö mare kur keere, ni näk mo manynya gø nee pwödhö mare wïïl wøk, eni bïï wï gät mana cïbï piny kiper pwödhö wär meet bäät gø. Køøre pwödhö døøa baŋe.

²⁰'Ba ni näk mo eni pwödhö käre wïïl wøk, wala ee gadhø ki ŋat mør, pwödhö manøgø ba cäŋ wïïl wøk këët.

²¹'Ba pwödhö manøgø kanyo duui yi cwiir mar Jubili, tïmö na pwödhö mo ena kur keere jï Wuuö Jwøk, ni caala pwödhö mo owëëk Wuuö Jwøk na bäre bäre. Eni tïmö na mar dïlämi ni beeye thööŋŋe.

²²« ‹'Ba ni näk mo dhaanhø pwödhö mano cïp kur keere jï Wuuö Jwøk beeye mo ee ŋeeø, ni paa thääŋ pwödhö mana näk thööŋŋe,

²³dïlämi gät gø mana näk orømø wär cääbe këël mano këët ri cwiir man wø cwøl ni Jubili; køøre gät mana näk ocïp piny wär put cool dïcäŋögø, ni tïmge na gwel mo ocïp kur keerge jï Wuuö Jwøk.

²⁴Noo tïme na cwiir man wø cwøl ni Jubili, pwödhö døøa baŋ ŋata ŋeei baŋ gø, na näk pwödhö manøgø beeye thööŋŋe.

²⁵Gät man wø cïp piny, wär tïme ni käl ka køør rumi man wø cwøl ni cekel mar kar lam na en kur keere, na näk yie da rumme ma pïërariiø mar rumi man wø cwøl ni gëëra.

²⁶« ‹'Ba kaai mo lääc paac, bäŋe ŋat mo cïba geni kur keerge jï Wuuö Jwøk. Kiper kaai mo lääc paac oløny na mo Wuuö Jwøk, nee ena dhieŋ wala diel, beeye mar Wuuö Jwøk.

²⁷'Ba ni näk mo ena røk lääc paac moa näk ba waany, wär wïïl wøk ki køør gät mana näk iï cïp piny, ni mëën bäät gø ki bïï wï gäte. 'Ba ni näk mo kär wïïl wøk, wär dwøk pwödhö ki køør gät mana näk iï cïp piny.

²⁸« ‹'Ba gïn mo onø wëëk dhaanhe Wuuö Jwøk na bäre bäre røk jammi bëët moa näk thööge, nee dhaanhø wala lää paac, wala pwödhö mana näk thööŋŋe, ba løny ki man dwøgi pwödhö ni ba wïïl wøk. Gïrpiny jaak mo onø wëëk Wuuö Jwøk na bäre bäre beeye gïn mo ena kur keere mo pere leth na mar Wuuö Jwøk.

²⁹Dhaanhø mo onø wëëk Wuuö Jwøk na bäre bäre ba cäŋ wïïl wøk; ka adïëri møn, eni di nääö.

³⁰« ‹'Ba paac wïth gïï wø ciek yi ŋöömö bëët, ni beeye caammi mo pwöth, ki nyïïjenni, gena mo Wuuö Jwøk. Ge ena kur keerge na mo Wuuö Jwøk.

³¹'Ba ni näk mo da dhaanhø mo manynya gø nee thäk paac wïth jammi moe wïïl wøk, eni bïï wï gät gø wär meet bäät gø.

³²'Ba paac wïth dhäk, ki paac wïth dïëk, ni beege paac wï lääy man nø mana näk okwään wøk, paacge ena kur keere na mar Wuuö Jwøk.

³³Bäŋe gø mo jier ni beer wala raac, ni ba wiili ki mør; 'ba ni näk mo di wiilø ki mør, lääy manøgø ki mana wiili ki gø karge riet, ge tïmö ni ge ena kur keerge, ni ba løny ki man wïïli wøk.› »

³⁴Moøgø beege ciik moa cïp Wuuö Jwøki piny jï jø Icriel, na kööm Modhe ki ge bäät Kïn Caynay.