Read anuak Ciik Kiper Dïlämme 3 Bible Online

Ciik Kiper Dïlämme 3 - anuak bible

Ciik Kiper Dïlämme 3

¹« ‹'Ba ni näk mo olämi mano cïp dhaanhe beeye olämi man wø duunni ki mëër, ni cïbe røk dhäk, nee olämi manøgø beeye rwaath wala dhaagø, wär cïbe nyïm Wuuö Jwøk no olämi mo bäŋ gïn mo ogwäyö dëëre.

²Eni cere wär cïp bäät wï olämi mare manøgø, ni ŋaal gø dho oduŋkaany røømmø. Køøre dïlämme, wäät Aran, remø kønyge dëët bööp gïn wø cïp olämme bääte.

³'Ba ŋatøgø gïïo lwøre dëër olämi manøgø man wø duunni ki mëër noo cïbe jï Wuuö Jwøk no olämi man wø waaŋ ki maac, beeye räämmö na näk gïïa en ec bëët ee rïëbö, ki dwäle bëët moa en bäät gïïa en ec,

⁴ki røgi karge riet na en wïth dïbule, ki maaw mana en bäätge, ki maaw mana näk cwïny okuup ree noo käl wøk ki røgi ciel.

⁵Køøre dïlämme, wäät Aran, gïïögø wär waaŋge bäät gïn wø cïp olämme bääte, ni ege dwal bäät olämi man wø waaŋ bäre mana näk bëëdö ni waaŋ bäät jenni yi maac; ni manøgø beeye olämi man wø waaŋ ki maac ni wø ŋwääi ni met jï Wuuö Jwøk.

⁶« ‹'Ba ni näk mo olämi mare man wø duunni ki mëër mano cïbe jï Wuuö Jwøk käle ki røk dïëk, nee cïbe na nywøk wala dhaagø, wär näk mo bäŋ gïn mo ogwäyö dëëre.

⁷« ‹Ni näk mo olämi mare mano cïbe beeye nyi røømmø, wär tïme ni cïbe nyïm Wuuö Jwøk.

⁸Eni cere wär cïp bäät wï olämi mare manøgø, ni ŋaal gø nyïm oduŋkaany røømmø. Køøre dïlämme, wäät Aran, remø kønyge dëët bööp gïn wø cïp olämme bääte.

⁹'Ba ŋatøgø gïïo lwøre dëër olämi manøgø man wø duunni ki mëër noo cïbe jï Wuuö Jwøk no olämi man wø waaŋ ki maac, beeye maaw mare, ni beeye maaw bäre mana en jïbe, ni ŋøle ki ri cöön pïth, ki räämmö na näk gïïa en ec bëët ee rïëbö, ki dwäle bëët moa en bäät gïïa en ec,

¹⁰ki røgi karge riet na en wïth dïbule, ki maaw mana en bäätge, ki maaw mana näk cwïny okuup ree noo käl wøk ki røgi ciel.

¹¹Køøre dïlämi gïïögø wär waaŋe na cam bäät gïn wø cïp olämme bääte, ni beeye olämi man wø waaŋ ki maac jï Wuuö Jwøk.

¹²« ‹'Ba ni näk mo olämi mare mano cïbe beeye diel ma ateea, wär cïbe nyïm Wuuö Jwøk.

¹³Eni cere wär cïp bäät wï olämi mare manøgø, ni ŋaal gø nyïm oduŋkaany røømmø. Køøre dïlämme, wäät Aran, remø mar gø kønyge dëët bööp gïn wø cïp olämme bääte.

¹⁴'Ba ŋatøgø gïïo cïbe no olämi mare dëër olämi manøgø, no olämi man wø waaŋ ki maac jï Wuuö Jwøk, beeye räämmö na näk gïïa en ec bëët ee rïëbö, ki dwäle bëët moa en bäät gïïa en ec,

¹⁵ki røgi karge riet na en wïth dïbule, ki maaw mana en bäätge, ki maaw mana näk cwïny okuup ree noo käl wøk ki røgi ciel.

¹⁶Køøre dïlämi gïïögø wär waaŋe na cam bäät gïn wø cïp olämme bääte, ni beeye olämi man wø waaŋ ki maac ni wø ŋwääi ni met. 'Ba maaw bäre beeye mar Wuuö Jwøk.

¹⁷« ‹Manøgø tïmö na ciik mo bëëdö na bäre bäre ki yïth beenhnhe mou bëët ki yïth kwöro bëëdu yïthge bëët, nou ba doo cämö ki gïn ma maaw wala gïn ma remø.› »