Read anuak Ciik Kiper Dïlämme 5 Bible Online

Ciik Kiper Dïlämme 5 - anuak bible

Ciik Kiper Dïlämme 5

¹« ‹'Ba ni näk mo da dhaanhø mo obääyö, ni beeye kiper eni dwøl mana caan wïnyö jïre, kanya kööm jiy ki nyeŋ Jwøk, nee ŋati man nø mare caane, ni eni doo løny jïre ki mana dee adïëri mare lamø kiper gïna näk ee raŋø wala gïna näk ee kwanyø, 'ba eni bäŋ gïn mo caane, teeŋ ŋatøgø bääyö mare ena bääte keere.

²« ‹Wala ni näk mo dhaanhø guta gïn mo ba waany, nee lää paap mo ba waany mo othøw, wala lää paac mo ba waany mo othøw, wala gïï wø muuli ki piny mo ba waany mo othøw, këël ni näk mo gïïögø gude ni kuue, ni put tïmö ni ba waany, eni ajäla ena bääte.

³« ‹Wala ni näk mo eni guta gïn mo ogut dhaanhe mo ba waany, ni beeye teeŋ gïn mør jaak mo tïïya eni ni ba waany, ni gude ni kuue, kanyo ŋäc gø yie, eni ajäla ena bääte.

⁴« ‹Wala ni näk mo dhaanhø okööŋ ki dhee ki man tïïc gïn mo raac wala gïn mo beer, ni eni kööŋ ni wïïe käre caarø bäät gø, ni beeye gïrpiny jaak man wø kööŋ dhaanhe kipere ni eni wïïe käre caarø, ni mare tïïc gø jaak ni kuue, eni kanyo ŋäc gø yie, eni ajäla ena bääte ki køør mana tïïc aciel røk gïïögø.

⁵« ‹Kiper manøgønø, ni näk mo dhaanhø bääyö mare ena røk gïïögø, eni raay moe wär købe ki jöö mana bääye ki gø.

⁶Eni wär cïpe ko olämi mar bääyö mare jï Wuuö Jwøk kiper raay moa tïïe, ni lwøre røk dïëk, ni beeye røømmø ma dhaagø wala ateea ma dhaagø, ni cïp gø no olämi mar wëën raay. Køøre tïïc dïlämi tïïö no okïdi na kar ŋatøgø kiper raay moe.

⁷« ‹'Ba ni näk mo eni cere orëëm ki man cïpe ki diel, eni atuuy ariiø wala akuyi ariiø wär cïbe jï Wuuö Jwøk no olämi mar bääyö mare kiper raay moa tïïe, na aciel cïp no olämi mar wëën raay, ni ö maya ni cïbi no olämi man wø waaŋ bäre.

⁸Ni ö eni ni kïth geni baŋ dïlämi, ni ö dïlämi ni kwøŋ aciel cïp no olämi mar wëën raay. Ni meen ŋut gø, 'ba eni ba cööt wøk.

⁹Køøre eni remø mør mar olämi manøgø na mar wëën raay enø jøre dëër bwøp gïn wø cïp olämme bääte, ni ö reme mano dööŋ ni twiinyi piny tier gïn wø cïp olämme bääte. Ni manøgø beeye olämi mar wëën raay.

¹⁰Ni ö eni ni cäŋ maya jiiŋŋø no olämi man wø waaŋ bäre, ni tïïe ka køør ciik mana no ocïp piny. Ni manøgø tïïc dïlämi no okïdi na kar ŋatøgø kiper raay moa tïïe; køøre eni di wëënnö.

¹¹« ‹'Ba ni näk mo cere orëëm ki man cïpe ka atuuy ariiø wala akuyi ariiø, eni muuy mare mano cïbe kiper bääyö mare wär cïbe na paac wï møø mana pøøth ni wø en yi rumi mar iipa,[2] ni cïp gø no olämi mar wëën raay. 'Ba eni kär nee kunynya bäät gø ki maaw, ni ba cïp gïn wø jïye ŋwääi ni met bäät gø, kiper eno olämi mar wëën raay.

¹²Køøre eni kïthe baŋ dïlämi, ni ö dïlämi manøgø ni lwöte ri gø ki yi cere ni päŋ, ni lwøre na gïr par wïc, ni waaŋ gø bäät gïn wø cïp olämme bääte ni ee dwal bäät olämme mo wø bëëdö ni waaŋ ki maac jï Wuuö Jwøk. Ni manøgø beeye olämi mar wëën raay.

¹³Ni manøgø tïïc dïlämi no okïdi na kar ŋatøgø kiper mana bääye ki gïrpiny aciel røk gïïa no ocaanø; køøre eni di wëënnö. 'Ba thääŋ muuy mano dööŋ tïmö na mar dïlämi ni caala muuy mar møk beel.› »

¹⁴'Ba Wuuö Jwøk acäänö ki Modhe ni kööe,

¹⁵ni «Ni näk mo da dhaanhø mo obääyö ni ba kame ki køør mana ruue ni gïïa en kur keerge na dee cïbö jï Wuuö Jwøk käre cïbö, eni wär cïpe ko olämi mar bääyö mare jï Wuuö Jwøk, ni cïbe røk dïëk na nywø røømmø mo bäŋ gïn mo ogwäyö dëëre, no opäärö ki gät mano cïbï piny mar gwel-bïrö man wø røm ki rumi man wø cwøl ni cekel[3] mar kar lam na en kur keere. No olämi manøgø cïp kaper wëën bääyö.

¹⁶Ni ö eni ni cool gïïa ruu ni käre cïbö røk gïïa no ocïp kur keerge na mo Jwøk, ni meet bïï wïthge bäät gø, ni cïp gø jï dïlämi. Køøre dïlämi manøgø nywø røømmø mana cïp kiper wëën bääyö tïïe tïïö no okïdi na kar ŋatøgø; køøre eni di wëënnö.

¹⁷«'Ba ni näk mo dhaanhø obääyö ni eni tïïya gïrpiny aciel røk gïïa cem Wuuö Jwøki ni kär tïïc, këël na näk tïïe ni kuue, eni ajäla ena bääte, ni bääyö mare ena bääte keere.

¹⁸'Ba eni wär lwöte røk dïëk ki nywø røømmø mo bäŋ gïn mo ogwäyö dëëre, ni cïp gø jï dïlämi no olämi mar wëën bääyö, no opäärö ki gät mana näk iï cïp piny. Køøre nø, tïïc dïlämi tïïö no okïdi kiper bääyö mar ŋatøgø ki køør gïna baae ni kuue ni ba kame; køøre eni di wëënnö.

¹⁹Ni manøgø beeye olämi mar wëën bääyö mare, mana bëëde møn ni eno bääyö dëër Wuuö Jwøk.»