Read anuak Ciik Kiper Dïlämme 6 Bible Online

Ciik Kiper Dïlämme 6 - anuak bible

Ciik Kiper Dïlämme 6

¹'Ba Wuuö Jwøk acäänö ki Modhe ni kööe,

²ni «Ni näk da dhaanhø mo obääyö dëër Wuuö Jwøk ki køør man wø mooŋ gïn mo okan watge baŋe ki ŋäädhe, wala gïn mo owii baŋe nee gwøe, wala eni kwala jap watge, wala ni näk mo eni lwøra jap watge ki teek,

³wala eni joota gïn mo orwäänyö ni mooŋ gø, wala eni mare kööŋ ki tööt bäät gïna tïïe røk gïïögø ni wø bääc dhaanhe rege,

⁴eni gïno tïïe ki køør bääyö mare, jammi moa kwale wala jammi moa lwøre ki teek, wala jammi moa no okan baŋe ki ŋäädhe, wala jammi moa joode na no orwäänyö,

⁵wala gïna kööŋe ki tööt bäät gø jaak, wär dwøge, ni coole na kare na teeŋ gïneca, ni meet bïï wïthge bääte, ni cïp gø jï wää gïnögø dïcäŋo cïp olämi mare yie mar wëën bääyö mare.

⁶Eni olämi mar bääyö mare mano cïbe jï Wuuö Jwøk wär käl baŋ dïlämi, ni cïbe røk dïëk na nywø røømmø mo bäŋ gïn mo ogwäyö dëëre, no opäärö ki gät mana näk ocïp piny kiper olämi mar wëën bääyö.

⁷Ni manøgø tïïc dïlämi no okïdi kiper ŋatøgø, ni tïïe nyïm Wuuö Jwøk; køøre eni di wëënnö kiper gïna tïïe røk gïïögø na wëëk eni bääyö.»

⁸'Ba Wuuö Jwøk acäänö ki Modhe ni kööe,

⁹ni «Kööm Aran ki wääte ni kööï ni Wuuö Jwøk aköö, ni ‹Man beeye ciik kiper olämi man wø waaŋ bäre. Olämi man wø waaŋ bäre wär put bëëdö ki wäär bäre bäät gïn wø cïp olämme bääte këël mano këët amöölla, ni maac bëëdö ni liel bäät gïn wø cïp olämme bääte.

¹⁰Køøre dïlämi jalabiiya mare mana näk lïïna wär røø dëëre, ni røø libaa lïïna dëëre man wø røø tier jalabiiya, ni ö eni ni jøøp bur mar olämme mo wø waaŋ bäre na no othöör maaci bäät gïn wø cïp olämme bääte, ni cïp gø buut gïn wø cïp olämme bääte.

¹¹Køøre eni abïïe moa en dëëre wär käl wøk, ni røø abïïe møga dëëre, ni aae ki bur ni kääre käärö ni kïth gø wøk ŋää twïër kany mo waany.

¹²'Ba maac mana en bäät gïn wø cïp olämme bääte wär bëëde ni liel, ni ba thøw. 'Ba dïlämi wär bëëde ni dhøk jenni äbe äbö bäät gø cooth ka amöölla, ni peeth olämi man wø waaŋ bäre bäät maac, ni waaŋ thäk dwäle mar olämme mo wø duunni ki mëër bäät gø.

¹³Maac wär bëëde ni liel jaak bäät gïn wø cïp olämme bääte, ni ba wëëgi thøø.

¹⁴« ‹'Ba man beeye ciik kiper muuce mo møk beel. Wäät Aran beege noo cïp muuce moøgø nyïma, a na Wuuö Jwøk, nyïm gïn wø cïp olämme bääte.

¹⁵Køøre dhaanhø aciel rege lwötö ri møø mana pøøth mar muuy mar møk beel ni kuure ka maaw ki yi cere ni päŋ, ni dwal gø ki gïn wø jïye ŋwääi ni met na no ocïp bäät muuy mar møk beel manøgø, ni ö eni ni waaŋ geni bäät gïn wø cïp olämme bääte na gïr par wïc man wø ŋwääi ni met jïra, a na Wuuö Jwøk.

¹⁶'Ba mano dööŋ dëër møø wär cam Aranni ki wääte. Wär cam no otïïö na muunni mo opamø mo bäŋ thømmø rege, ni camma yi kany mo ena kur keere, ni kany wø camge gø yie beeye yi kal mar oduŋkaany røømmø.

¹⁷Møø manøgø kär deel ni dëëre da thømmø. Aani na Wuuö Jwøk, møø manøgø yaa nø cïp na kurge røk olämme mo wø waaŋ jïra ki maac; eni ena kur keere ni pere leth ni caala olämi mar wëën raay ko olämi mar wëën bääyö.

¹⁸Dïcwøø man nø mo käla dëër Aran løny ki man cam gø. Ni manøgø beeye kur ŋatøgø røk olämme mo wø waaŋ jïra ki maac, ni bëëde ni nut jïre cooth ki yïth beenhnhe mou bëët. 'Ba ki røk jiy jaak, ŋato gut gïïögø, da gïn mo raac mo tägö dëëre.› »

¹⁹'Ba Wuuö Jwøk acäänö ki Modhe ni kööe,

²⁰na «Aran ki ŋato käl dëëre man wø läw kar dïlämi, muuy mano cïbe jï Wuuö Jwøk no olämi dïcäŋ wø thïïm wïïe ki maaw beeye paac wï møø mana pøøth ni wø en yi rumi mar iipa, ni beeye muuy mar møk beel man wø cïp cooth, ni thääŋŋe dï cïbö ka amöölla, ni thääŋŋe maya di cïbö ka abøøya.

²¹Møø manøgø wär jiiŋŋi no okïthö ki maaw, ni deeli ki gïr deel, no ocoodø na kare døøc. Ni pøti na thäŋi ni cïbi na muuy mar møk beel na gïn mo ŋwääö ni met jï Wuuö Jwøk.

²²'Ba ŋato cïp gø beeye ŋat mo käla dëër Aran mo wïïe othïïmmö ki maaw na dïlämi kar wänni. Ni manøgø beeye ciik moa no ocïp piny nee bëëde ni nut cooth ki man bëët teeŋ olämi manøgø ni di waaŋø bäre jï Wuuö Jwøk.

²³Kiper manøgønø, muuy mar møk beel man wø cïp dïlämi di waaŋø bäre, ni bäŋ kany mo di camø dëëre.»

²⁴'Ba Wuuö Jwøk acäänö ki Modhe ni kööe,

²⁵ni «Caanï jï Aran ki wääte ni kööï, ni ‹Man beeye ciik kiper olämi mar wëën raay: Olämi mar wëën raay wär tïme ni ŋaalla nyïm Wuuö Jwøk kany wø ŋaal olämi yie man wø waaŋ bäre; ni manøgø beeye gïn mo ena kur keere mo pere leth.

²⁶Dïlämi mano cïp gø kiper wëën raay beeye noo cam gø. Eni wär tïme ni camma yi kany mo ena kur keere yi kal mar oduŋkaany røømmø.

²⁷'Ba ki røk jiy jaak, ŋato gut rïŋ gø, da gïn mo raac mo tägö dëëre. 'Ba ni näk mo remø oniker dëër abïï, ïïni remø mana gut abïï wär pïny wøk yi kany mo ena kur keere.

²⁸'Ba gïno thaal rïŋö ki gø nee beeye dak, wär nyath. 'Ba ni näk mo thaal ka dhiinh jwïël, wär gøøp døøc ni laai ki pïï mo tøŋ.

²⁹Dïcwøø man nø røk dïlämme løny ki man cäme ri gø. Ni manøgø beeye gïn mo ena kur keere mo pere leth.

³⁰'Ba olämi man nø mar wëën raay man wø remme kïth yo oduŋkaany røømmø nee tïïc no okïdi yi kanya en kur keere, rïŋŋe ba cam. Eni di waaŋø ki maac bäre.