Read anuak Ciik Kiper Dïlämme 8 Bible Online

Ciik Kiper Dïlämme 8 - anuak bible

Ciik Kiper Dïlämme 8

¹'Ba Wuuö Jwøk acäänö ki Modhe ni kööe,

²ni «Lwør Aran ki wääte na aciel, ka abïïk dïlämme, ki maar rööny, ki rwaath mano cïp no olämi mar wëën raay, ki nyöök rööm karge riet, ki gupa mo yie da muunni mo odeelø ni bäŋ thømmø rege,

³ni kïthï geni dho oduŋkaany røømmø; ni cooŋï dhaanh Icriel bäre kaace.»

⁴'Ba Modhe gïnögø atïïe ki køør mana ö Wuuö Jwøki na kööm eni ki gø. 'Ba kanya ö dhaanh Icrielli na nø cooŋi dho oduŋkaany røømmø,

⁵Modhe aköö jïge, ni «Man beeye gïna cem Wuuö Jwøki ni tïïc.»

⁶Kanyøgø Modhe Aran ki wääte acwöl nyïm ni lwøk geni ki pïï.

⁷Ni ö eni ni røø jalabiiya mana bäär dëër Aran, ni ö kawi mar abïï ni twöö gø yi gø, ni røø jalabiiya mana ciek dëër gø, ni røø abïïna cwøl ni ëëput dëër gø, ni twöö ëëput dëër Aran, ni twöe ka kaan abïïn ëëput na näk ocwääö ki riek waŋ, ni beeye mana twöö ëëput piny ki gø dëër gø.

⁸Køøre eni abïïna näk abïï käw akïth kö gø, ni ö gïï wø cwøl no Urim ki Thumim ni kïth ge yi kïïny abïï käw.

⁹Eni thuwø abïï man wø kïth wïc akïth wï Aran, ni ö warkey mana paŋŋi, man wø nyooth gø ni Aran ocïp kur keere, ni twöö gø ri baap täärnyïm abïï manøgø, ni tïïe ka køør mana ö Wuuö Jwøki na kööm eni na Modhe ki gø.

¹⁰Køøre nø, Modhe maar rööny alwøre ni gweel oduŋkaara kar bëët Wuuö Jwøk, ki gïïa en yie bëët, ni eni cïba ge kur keerge na mo Jwøk.

¹¹Ni ö eni ni ker maaw mør bäät gïn wø cïp olämme bääte ki kwöre abïriiø ni eni gweela gïn wø cïp olämme bääte ki jap tïïc mo gø bëët, ki gïr pï lwøk ki gïre man wø bëëde bäät gø, ni eni cïba ge kur keerge na mo Jwøk.

¹²Køøre eni maar rööny mør athii wï Aran, ni cïba gø kur keere.

¹³Køør manøgø, Modhe wäät Aran akäl nyïm, ni røø jalabiiye moa bäyö dëëtge, ni twöö kaae mo abïïe yïthge, ni kïth cöörri wïthge, ki køør mana ö Wuuö Jwøki na kööm eni na Modhe ki gø.

¹⁴Køøre eni rwaath mana no olämi mar wëën raay akäl nyïm, ni ö Aranni ki wääte ni cïpge ceŋge bäät wï rwaath manøgø na mar wëën raay enø.

¹⁵Køøre Modhe rwaadhøgø aŋaale ni lwør remø, ni lwöte ki lweete ni naaŋ gø dëët tuk gïn wø cïp olämme bääte, ni eni tïïya gïn wø cïp olämme bääte ni waany. Køøre eni remø mana dööŋ akøny tier gïn wø cïp olämme bääte ni mare cïp gø kur keere na mar Jwøk ni tïïe no okïdi kiper gø.

¹⁶Ni ö eni thuwø ni lwør maaw bäre mana en bäät gïïa en ec, ki maaw mana näk cwïny okuup ree, ki røgi karge riet, ki maarge; ni ö eni na Modhe ni waaŋ ge bäät gïn wø cïp olämme bääte.

¹⁷'Ba rwaadhøgø pïëne ki rïŋŋe ki weenynye moe awaaŋe ki maac wøk ŋää twïër ki køør mana ö Wuuö Jwøki na kööm eni na Modhe ki gø.

¹⁸Køøre Modhe nywø røømmø mar olämi man wø waaŋ bäre akäl nyïm, ni ö Aranni ki wääte ni cïpge ceŋge bäät wï nywø røømmø manøgø.

¹⁹Ni ö Modhe ni ŋaal gø, ni køny remø dëët bööp gïn wø cïp olämme bääte.

²⁰'Ba kanya nø ö Modhe na bak gø na thäŋi, wïc ki kwöra bage na thäŋi ki dwäälö awaaŋe ki maac no olämi.

²¹'Ba kanya nø ö Modhe na nø peny gïïa en ec ki tiel, nywø røømmø bäre awaaŋe ki maac no olämi bäät gïn wø cïp olämme bääte, ni beeye olämi man wø waaŋ bäre man wø ŋwääi ni met. Ni manøgø beeye olämi man wø waaŋ ki maac jï Wuuö Jwøk, ki køør mana ö Wuuö Jwøki na kööm Modhe ki gø.

²²Køøre Modhe riet nywø røømmø acäŋ käl nyïm, ni beeye nywø røømmø mar rööny; ni ö Aranni ki wääte ni cïpge ceŋge bäät wï nywø røømmø manøgø.

²³Ni ö Modhe ni ŋaal gø, ni lwöte ri rem gø ni gweel olap mar ïth cwïï Aran, ki lween dwøŋ mar cer cwïï gø, ki lween dwøŋ mar tier cwïï gø.

²⁴Køør manøgø, eni wäät Aran akäl nyïm, ni ö eni na Modhe ni lwør remø ni gweel olap ïthge mo bäät cwïcge, ki lweet døøŋŋø mo ceŋ cwïcge, ki lweet døøŋŋø mo tiet cwïcge. Køøre Modhe remø mana dööŋ akøny dëët bööp gïn wø cïp olämme bääte.

²⁵Ni ö eni ni lwør dwäälö ki maar jïp ki maaw bäre mana en bäät gïïa en ec, ki maaw mana näk cwïny okuup ree, ki røgi karge riet ki maarge, ki ääm mar cwïïc.

²⁶Køøre ena lwötö ki møø aciel mo bäŋ thømmø dëëre, ki møø aciel mo coot ka maaw, ki møø aciel mo otïïö ni reep, ni lwøri røk muunni moa näk odeelø ni bäŋ thømmø rege na en yi gupa nyïm Wuuö Jwøk, ni cïp ge bäät dwäle ki bäät ääm cwïïc.

²⁷Køøre eni gïïögø bëët acïp cer Aran ki ceŋ wääte ni tuuŋge ge yi jamø no olämi man wø tuuŋŋi yi jamø nyïm Wuuö Jwøk.

²⁸Køør manøgø, Modhe gïïögø akäl wøk ceŋge ni waaŋ geni bäät gïn wø cïp olämme bääte, ni ee dwal bäät olämi man wø waaŋ bäre, ni manøgø beeye olämi mar rööny man wø ŋwääi ni met ni wø waaŋ ki maac jï Wuuö Jwøk.

²⁹Køøre thuwø eni na Modhe gøŋŋø mar nywø røømmø mar rööny, ni beeye kuna näk kure, alwøre ni tuuŋ gø yi jamø no olämi man wø tuuŋŋi yi jamø nyïm Wuuö Jwøk, ki køør mana ö Wuuö Jwøki na kööm eni na Modhe ki gø.

³⁰Kanyøgø nø, Modhe alwötö ri maar rööny, ki ri remø mana en bäät gïn wø cïp olämme bääte, ni jør geni bäät Aran, ki bäät abïïe moe, ki bäät wääte, ki bäät abïïe moge, ni manøgø eni cïba Aran kur keere, ka abïïe moe, ki wääte, ka abïïe moge.

³¹Køøre Modhe aköö jï Aran ki wääte, ni «Rïŋö wär thaallu dho oduŋkaany røømmø ni cammu gø na aciel ki muunni moa näk odeelø moa lwør yi gupa mana en muuce mo rööny yie, ni tïïc kaawat mana cema gø na kööa, ni ‹Aran ki wääte beege noo cam gø.›

³²'Ba mano dhäthi ri rïŋö ki ri muunni wär waaŋ ki maac.

³³'Ba uuni, u bëëdö ki nïne abïriiø nou ba døny wøk ki dho oduŋkaany røømmø, këël dïcäŋo thum nïr röönynyi mou yie; kiper rööny maru känna wøk ki nïne abïriiø.

³⁴Teeŋ gïn ni tïïc dïcäŋi ennø, beeye Wuuö Jwøk na caan gø ki man tïï no okïdi kiperu.

³⁵'Ba uuni, u bëëdö nou ena dho oduŋkaany røømmø ki cäŋ ki wäär ki nïne abïriiø nou tïïya gïïa cem Wuuö Jwøki, nou ba thøwu, kiper beeye mana kööm aani ki gø.»

³⁶'Ba Aran ki wääte gïïögø bëët atïïcge, ni beege gïïa cem Wuuö Jwøki ki ri Modhe.