Read anuak Ciik Kiper Dïlämme 9 Bible Online

Ciik Kiper Dïlämme 9 - anuak bible

Ciik Kiper Dïlämme 9

¹'Ba kanya tïme na ri bäc nïne, Modhe Aran ki wääte ki jø døøk Icriel acwøle,

²ni kööe jï Aran, ni «Lwön dëërï ki nyirøøa ma rwaath no olämi mar wëën raay, ki nywø røømmø no olämi man wø waaŋ bäre, ni geni karge riet bäŋ gïn mo ogwäyö dëëtge, ni cïpï geni no olämi nyïm Wuuö Jwøk.

³Køøre ni cäännï jø Icriel ni kööï, ni ‹Lwötu ki nywø ateea no olämi mar wëën raay, ki nyirøøa ki nyi røømmø no olämme mo wø waaŋ bäre, ni geni karge riet cwiicge oceele mo bäŋ gïn mo ogwäyö dëëtge,

⁴ni lwötu ki dhieŋ ki nywø røømmø no olämme mo wø duunni ki mëër, ni cïpu ge nyïm Wuuö Jwøk no okuurö ki muuy mar møk beel mo okïthö ki maaw; kiper dïcäŋi Wuuö Jwøk dëëre nyoodhe nyoodhø jïïu.› »

⁵Kanyøgø nø, geni gïïa ö Modhe na kööm geni ki ge aputge lwør ni kïthge ge nyïm oduŋkaany røømmø, ni ö dhaanh Icrielli bäre ni nyänhge nyïm ni cuŋge nyïm Wuuö Jwøk.

⁶Ni kö Modhe, ni «Man beeye gïna ö Wuuö Jwøki na kööm uuni ki gø nee tïïyu nee ajiem Wuuö Jwøk nyooth jïïu.»

⁷Ni ö Modhe ni put köö jï Aran, ni «Nyänh buut gïn wø cïp olämme bääte ni cïpï olämi marï mar wëën raay, ko olämi marï man wø waaŋ bäre, niï tïïya okïdi kiper dëërï, kiper jiy; ni cïpï olämi mana cïp jiyi niï tïïya okïdi kiperge, kaawat mana cemi ya Wuuö Jwøki.»

⁸Kanyøgø nø, Aran aput nyänh buut gïn wø cïp olämme bääte ni ŋaal nyirøøa kiper dëëre no olämi mar wëën raay.

⁹Ni ö wääte ni mëëkge remø eni, ni ö eni ni cøt lweete yi remø ni naaŋ gø dëët tuk gïn wø cïp olämme bääte, ni ö reme mana dööŋ ni køny gø tier gïn wø cïp olämme bääte.

¹⁰Ni ö maawi mar olämi manø na mar wëën raay enø, ki røgi moe, ki maaw mana näk cwïny okuup ree, ni waaŋ geni bäät gïn wø cïp olämme bääte, kaawat mana ö Wuuö Jwøki na kööm Modhe ki gø.

¹¹'Ba rïŋö ki pïën awaaŋe ki maac wøk ŋää twïër.

¹²Køøre Aran olämi man wø waaŋ bäre aŋaale, ni ö wääte ni mëëkge remø eni, ni køny gø dëët bööp gïn wø cïp olämme bääte.

¹³Ni ö olämi manøgø man wø waaŋ bäre ni gapge gø jïre no obagø na thäŋi, ni gapge ni ege kuurö ki wïc, ni waaŋ geni bäät gïn wø cïp olämme bääte.

¹⁴Eni thuwø gïïa en ec, ki tiel apenye, ni dwal geni bäät olämi mana waaŋe bäät gïn wø cïp olämme bääte.

¹⁵Køør manøgø, Aran olämi mar jiy akäl nyïm, ni lwør ateea no olämi mar wëën raac jiy, ni ŋaal gø ni cïp gø no olämi mar wëën raay ni caala mana tïïe dïkwøŋ.

¹⁶Ni ö eni thuwø ni käl olämi nyïm man wø waaŋ bäre, ni cïp gø no olämi ki køør ciik mana näk ocïp piny.

¹⁷Køør manøgø, muuy mar møk beel akäl nyïm, ni lwöte ri gø ki yi cere ni päŋ ni waaŋ gø bäät gïn wø cïp olämme bääte ni eni meeda gø bäät olämi man wø waaŋ bäre ka amöölla.

¹⁸Køøre Aran dhieŋ ki nywø røømmø aŋaale kiper jiy no olämme mo wø duunni ki mëër, ni ö wääte ni gapge remø jïre, ni køny gø dëët bööp gïn wø cïp olämme bääte.

¹⁹'Ba kuna näk maar dhieŋ ki maar nywø røømmø, ni beeye maar jïbe, ki räämmö na näk gïïa en ec ee rïëbö, ki røgi, ki maaw mana näk cwïny okuup ree,

²⁰gïïögø na mädhi yøø acïpge bäät gøŋŋi mo olämme moøgø, ni ö Aranni ni waaŋ mädhi moøgø bäät gïn wø cïp olämme bääte.

²¹'Ba Aran gøŋŋi ki ääm mar cwïïc man nø atuuŋŋe yi jamø no olämi man wø tuuŋŋi yi jamø nyïm Wuuö Jwøk, ki køør mana cemi ya Modhe.

²²Kanyøgø nø, Aran ceŋŋe atïŋ maal ni ee näät bäät jiy, ni gwïëth geni. 'Ba kanya nø cïp olämi mar wëën raay, ko olämi man wø waaŋ bäre, ko olämi man wø duunni ki mëër, ena ïnh piny.

²³Ni ö Modhe ka Aran ni putge ci yo oduŋkaany røømmø. 'Ba kanya duuge wøk, jiy agwïëthge, ni ö ajiemmi mar Wuuö Jwøk ni puti nyooth jï jiy bëët.

²⁴Kanyøgø maac aput nituc ki nyïm Wuuö Jwøk ni thöör olämi man wø waaŋ bäre, ki dwäälö bäät gïn wø cïp olämme bääte. 'Ba kanya ö jiyi bëët na jootge gø, gena put kwöŋŋö ki met ec, ni këëlge cøŋge piny ki täärnyïmge.