Read anuak Jeremaya 1 Bible Online

Jeremaya 1 - anuak bible

Jeremaya 1

¹Moi beege luup Jeremaya o Kilkiya, na en røk dïlämme moa bëëdö Anathöth yi ŋööm Benjamen.

²Jeremaya beeye ŋata ö dwør Wuuö Jwøki bääte yïth nïra beet nyeya ma Jöcaya wär Amön na nyeny Juuda, ni beeye kanya päŋ cwiic nyeci moe na apaar kurdäk.

³Ni dwør Wuuö Jwøk poot ööa bääte yïth nïra beet nyeya ma Jeyöakëm o Jöcaya na nyeny Juuda, këël mana pïïe ra aŋuun cwiic nyec moa na apaar kurciel na beet nyeya ma Cëdëkiya o Jöcaya na nyeny Juuda, ni beeye cwiina mak jø Jerucalemmi yie ki tøŋ ri bïï dwäde ni kïth geni paac mør.

⁴'Ba dwør Wuuö Jwøk mana ö bääta, a na Jeremaya, beeye en, ena köö,

⁵ni «Kanya poodï niï poot kära cwääö ec, ï yaa jierø; ni kanya poodï niï poot kär nywølø, ï yaa cïp kur keere na mara, ni tïïa ïïni na nyikuŋ Jwøk kiper tiet mïëri.»

⁶Køøre aana köö, «Wui Kwäärö Wuuö Jwøk! Neenï, aani cäänö kuua, kiper a poot thiinh.»

⁷'Ba Wuuö Jwøk aköö jïra, ni «Kärï köö, na ‹A poot thiinh,› kiper ï cøøa kany wäro jääŋŋa ïïni yie, ni gïïo köömma ïïni ki ge bëët caanï caanø.

⁸Kärï lwäyö ki geni, kiper a ena buutï, naa peemma ïïni.» Luummögø caana Wuuö Jwøki.

⁹Kanyøgø Wuuö Jwøk cere arwiee ni gut dhaa, ni kööe jïra, ni «Ennø, luup 'moa acïba dhiï.

¹⁰Ni dïcäŋi, ïïna mooa ki teek ki man køpï luumma dëët akwöm mo wïth juurre, ki dëët akwöm mo nyeye, man näk mo geni cööda wøk, ni keeth geni, ni raany geni, ni nyak geni; ni cäŋ ge tïïyö ni teek, ni këël tietge piny.»

¹¹'Ba dwør Wuuö Jwøk acäŋ ö bääta, ni pëëny aani, ni «?Jeremaya, agïnaŋø ni nëëni jïrï enø?» Ni kööa, na «A neeta bat jaath wø cwøl ni dïkuri.»

¹²Køøre Wuuö Jwøk aköö jïra, na «Ajootï na wøp, kiper a bëëdö ni aana dïkuri, naa koora luubö mara nee thur kare.»

¹³'Ba dwør Wuuö Jwøk acäŋ ö bääta ri rietge, ni kööe, na «?Agïnaŋø ni nëëni jïrï enø?» Ni kööa, na «A neeta dak mo twak, mo dhee ee løø wøk ki jï løø wï-piny ni luu baŋwa.»

¹⁴Køøre Wuuö Jwøk aköö jïra, ni «Gïn mo raac oööi ki wï-piny, ni pïïe bäät jiy bëët mo bëëdö paani en.

¹⁵Ennø, a na Wuuö Jwøk, jiy mo tiet mïëri moa en wï-piny bëët cwøla cwølø. «Ni ö nyeye moge ni öge ni cïpge wälle moge dhøk kiir mar Jerucalem, ni tukge gø ki deŋ kiir mare bäre, ki päänye mo Juuda bëët,

¹⁶naa jääla geni kiper rääö marge na wecge aani ni cïpge ko olämme jï juu møøk, ni wøørge gïïa tïïcge ki ceŋge.

¹⁷«'Ba ennø, ï na Jeremaya en, jiiŋ riï ni ööï maal, ni caanï gïïo caana jïrï bëët jïge. Kärï lwäyö ki geni, niï ba døøya mo lwäär nyïmge.

¹⁸'Ba ka adïëri møn, aani, ïïna tïïa kaamar pääny mo ogeerø ni teek, kaamar werø mar nywïënyö, kaamar kiir mo otïïc ka nywïënyö ma jwïël, niï ba lønyï ki böötö jï jø paani bëët, ni beege nyeye mo Juuda, ki jøøa kwörge, ki dïlämme moe, ki jø paac bëët.

¹⁹Geni, ge këëdö ki ïïni, 'ba ï ba böötge, kiper a ena buutï, naa peemma ïïni.» Luummögø caana Wuuö Jwøki.