Read anuak Jeremaya 11 Bible Online

Jeremaya 11 - anuak bible

Jeremaya 11

¹Man beeye dwør Wuuö Jwøk mana caane jïra, a na Jeremaya, ena köö,

²ni «Wïny luummi en na tuuda ki kwäyu, ni caanï gø jï jø wø bëëdö Jerucalem ki dï Juuda bäre,

³ni luumma caan Wuuö Jwøki, Jwø Icriel, beeye en, ena köö, na ‹Acïëni oen bäät ŋato ba wïny luummi en na tuuda,

⁴na köömma kwäyu ki gø kanya käla geni wøk ki Ijep, na caal këën thäth mo liel.› Ni kööe jïge, ni ‹Cegu ïthu ki dwøra, ni kïthu ciik moa cïba jïïu bëët bäät tïïc; 'ba uuno bëëdö ni uuna jiya, ni bëëda ni aana Jwøk maru;

⁵nee kööŋ mana kööŋa ki gø jï kwäyu wëëga thur kare, ni beeye ki man cïba ŋöömö jïge, mana näk caak ki maar kïc päl yie, ni beeye ŋöömmo en jïïu enø.› » Ni puta gø løk, ni «Wui Wuuö Jwøk, beerra man put thur kare.»

⁶'Ba Wuuö Jwøk aköö jïra, ni «Caan luup moi ii bëët Jerucalem ki yïth päänye mo Juuda møga bëët, ni kööï ni Wuuö Jwøk aköö, ni ‹Wïnynyu luummi en na tuuda ki kwäyu, ni kïthu gø bäät tïïc.

⁷Kiper kwäyu aköömma døc kanya käla geni wøk ki Ijep, ni bëëda naa köömma geni cooth këël dïcäŋi en, naa wø köö, ni «Wïnynyu dwøra.»

⁸'Ba dwøra kärge wïnynyö, ni ïthge kärge ciiø ki mara, ni ŋati man nø bëëdö ni caatha køør teek wïc mare mana ö ki køør rääö mana en cwïnye. Kiper manøgønø, luummi en na tuuda ki geni atïïa na ajäla bäätge, ni beeye luumma caana jïge nee kïthge bäät tïïc, 'ba kärge kïth bäät tïïc.› »

⁹Ni cäŋ Wuuö Jwøki köö jïra, ni «Da gïrpiny yïth jø wø bëëdö Jerucalem ki yïth jø wø bëëdö dï Juuda bëët.

¹⁰Jø Icriel ki jø Juuda bëët, gena døø baŋ gïïa reyø na tïïc kwäcge, jøøa kweer ki man wïnyge luup 'moa, na cäädhö køør juu møøk nee tïnyge, na kaal luumma tuuda ki kwäcge.

¹¹Kiper manøgønø, mana ŋøla, a na Wuuö Jwøk, beeye ni ennø, a känna bäätge ki gïï mo leth mo ge ba maar bødhø yïthge. Ni këël ge doo jwöŋö dëëra, marge ba wïnynya.

¹²Køøre geni ni wø bëëdö Jerucalem ki yïth päänye mo Juuda bëët, geno cii ni jwöŋge dëët juuga path ni wø wääŋge jïge ki gïn wø jïye ŋwääi ni met; 'ba ka adïëri møn, ge ba piem juugögø kanyo enge yïth gïï mo leth.

¹³Kiper u na jø Juuda, juu mou atïmö ni thööth ni röömi ki kwään päänye mou, ni gïï wø waaŋŋu gïn wø jïye ŋwääi ni met bäätge jï Baal, jwøk mo duua lään wïc, thööth ni röömi ki kwään uutjïëthe mo Jerucalem.

¹⁴«Kiper manøgønø, ï na Jeremaya en, kärï lämö kiper jøøi ii, ni ba tïŋï dwørï maal niï jwöŋö niï lämö kiperge, kiper ïtha ba ciia kanyo cøørge aani kiper gïïo leth noo pïï dëëtge.

¹⁵Jiy 'moa moa mëëra ki geni atïmö ni tïïö ki raay mo thööth. ?Aŋø, a teega ŋø ni en jïge ki man cääthge yi øtø mara? ?Aŋø, olämme moge mo wø cïpge, ränynyö marge dege paanya piny bäätge, nee bëëtge ni ge kanynyø?»

¹⁶'Ba Wuuö Jwøk uuna cwøle na jaath mo oløth mo mïërö mo nyïïe beyø; 'ba uuno ränynyi kaamar jaadhøgø noo waaŋe ki maac mo teek mo lwör kaamar atuunna, ni waaŋ bäädi moe ni thumge.

¹⁷'Ba Wuuö Jwøk, eni na wïth jammi bëët, na këël tietu piny, aköö ni gïn mo leth käle ka bäätu, u na jø Icriel ki jø Juuda, kiper raay moa tïïyu ni u raanynya cwïnye ki køør mana waaŋŋu gïn wø jïye ŋwääi ni met jï Baal.

¹⁸'Ba Wuuö Jwøk gïna caar jø Anathöthi bääta acaane jïra ni jooda gø, ni nyooth tïïe moge na reyø jïra na caarge kipera.

¹⁹'Ba kanya pooda, aana bëëdö kaamar nyidiel mo mwöl mo kïtha kuna ŋaali, ni kuua ni da acaare mo reyø mo ege caarø kipera, ni ge köö, ni «Raanynyø ŋatøgø ki kare bäre; dïïrø wïïe dï jøøa kwøw bäät piny, nee nyeŋŋe put rwäänyö na bäre bäre.»

²⁰'Ba ï na Wuuö Jwøk, ï na wïth jammi bëët, ni wø ŋøl luup na adïëri, ï ni wø raŋ cwïny jiy ka acaacge bëët, wëëk a neen cool kwör marï mano tïïyï dëëtge, kiper luubö mara yaa cïp cerï.

²¹Kiper manøgønø, Wuuö Jwøk mare aŋøle kiper jø Anathöth, jøøa many man 'näkge aani, na köö, ni «Kär luum Wuuö Jwøk køpï, niï ba 'näkwa.»

²²Kiper manøgønø, mana ŋøl Wuuö Jwøki, eni na wïth jammi bëët, kiper jøøgø beeye en, ena köö, ni «Ennø, ge jääla jäälö. Cwøw moge moa teek onäk ri leny; ni ö wäätge ki nyïïge ni thøwge ki käc,

²³ni bäŋe dhaanhø aciel rege mo dööŋ ni kwøw. Kiper gïï mo leth okäla bäätge, ge na jø Anathöth, yi cwiir mano jääla geni yie.»