Read anuak Jeremaya 12 Bible Online

Jeremaya 12 - anuak bible

Jeremaya 12

¹Wui, Wuuö Jwøk, ï bëëdö ni marï adïëri kany wø lööa nyïmï; 'ba ï poot pëënynya pëënynyö kiper ŋøl marï. ?Aŋø, aperŋø ni ö gïï wø tïïc jø raayi ni thurge karge jïge en? ?Na aperŋø ni ö jiyi bëët mo wø tïïö ki gïï mo reyø ki piny ni bëëtge ni bëëtö marge jööt jaak?

²Beeye ïïni na piith geni kaamar jaath, ni këëlge tietge piny; ni døøŋge ni jïtge ki nyïëdi. Gïrï wø carge carø ki dhøkge jaak, 'ba ki cwïnyge, karge bäär ki ïïni.

³'Ba ï na Wuuö Jwøk, a ŋäyï; na a wø nëënö jïrï cooth, ni raŋï cwïnya man näk a bëëda nidïï ki baŋï. Wui Wuuö Jwøk, peec jøøgø niï kïtha ge baŋ ŋaal kaamar dïëk; kïth geni kur keerge kiper dïcäŋo ŋaal ge yie.

⁴?A këël kany mo nyïëdi nø noo bëët ŋøømmi no otal, noo bëët luummi bäre no onär? Këël lääy ki weny bëët athum ki thøø, ki køør rääö mar jø wø bëëdö yie, kiper ge wø köö, ni «Wuuö Jwøk aŋuun bëëtö marø ba nëëni jïre.»

⁵'Ba aløk Wuuö Jwøki jïra, ni «?Ni näk mo ïïno läätö ki jø ŋwïëy, ni öölï køørge, ïïno läätï nidïï ki jø wø rïïŋi ki bäät okwëënyi? ?A ni näk mo bëëtö marï otïmö ni teek yi paac mo nuta bëët mëër yie, ïïno bëëdï nidïï yi lura cøl bäät Naam Jördan?

⁶Kiper këël nyïïmeru ki dhi øt wäru kiree atïïö ki gïï mo reyø dëërï ki piny, ni ge poot kwöŋŋö køørï døc ki nyeŋŋï. Ïïni, kär niï ŋäätha geni, këël ge doo cäänö ki luup mo beyø jïrï.»

⁷Ni cäŋ Wuuö Jwøki köö jïra, ni «Aani jiy 'moa awiia, ni kwiera geni, ge na näk thööga. Geni na mëëra ki geni ki cwïnya bäre, gena cïba ceŋ nyïïmän moge.

⁸Jiya atïmö kaamar ŋuu mo bëëdö paap, ni öge ni märge bääta kaamar ŋuu. Kiper manøgønø, aana tïmö naa män ki geni.

⁹Jiya atïmö kaamar wenyø mo path ki jï weny, mo ociel wenynyi bëët dïër. Cou ni cooŋu lääc paap bëët kanya ciel, ni kälu geni nee jiya ni caal wenynyøgø enø camge.

¹⁰Kwääc tiet mïëri mo thööth paac mara na beer kaamar pwöth omøki oraanyge, ni nyørge gø ki tietge; ŋöömmögø na mara enø, na mëëra ki gø, oraanyge ni tïme kaamar paap.

¹¹Geni ŋöömö mara oraanyge møn, ni bëët ŋöömö ni jwöŋö dëëra; ŋöömö bäre otïïcge na kany mo oränynyö, ni bäŋe ŋat mo caar gïr gø.

¹²Jøøgø no raany paac yøø, kanyo öge, ge öö ki dï paap, ni ge cura bäät thuuri bëët moa leer, kiper beeye tøŋ mara, a na Wuuö Jwøk, no dïïrge wïth jiy ki gø, ki mano täge ka aŋuun paac maya këël aŋuunne maya, ni bäŋ dhaanhø aciel mo bëëdö ki bëët-mëër.

¹³Jiya, geno piidhø ki beel, 'ba gïïo jootge beege koodhi keerge. Dëëtge oöölge døc, 'ba bäŋ gïn mo jootge. 'Ba wïthge olää gïno jootge, ki køør wëër mara, a na Wuuö Jwøk, noo liel kaamar maac bäätge.»

¹⁴Mana caan Wuuö Jwøki beeye en, ena köö, ni «Ka adïëri møn, mïëc wïth juurre moa reyø na kïïö ki jiya, na tuk paac mana cïba jï jiya ma jø Icriel, ge cööda wøk yïth ŋøøpge, ni cööda jø Juuda wøk thuwø yïthakicge.

¹⁵'Ba kanyo nø bëët juurre moøgø nø ni ge yaa cööt wøk, cwïnya ocäŋ pädhö kiperge, ni dwøga geni yïth ŋøøpge, ni jøøi nø døøa yi ŋöömö marge.

¹⁶'Ba ni näk mo jöör bëëtö mar jiya kwanyge kwanyø møn, ni bëëtge ni ge kööŋŋa ri nyeŋŋa, ni ‹Ŋëët Wuuö Jwøk, Jwøa kwøw,› kaawat mana kwøŋge jiya pwönynyø ki man kööŋge ri Baal, aani tietge këëlla piny yïthakic jiya.

¹⁷'Ba ni näk mo da paac mo ba wïny mara, paanøca cööda wøk ni raanynya gø.» Luummögø caana Wuuö Jwøki.