Read anuak Jeremaya 13 Bible Online

Jeremaya 13 - anuak bible

Jeremaya 13

¹'Ba mana caan Wuuö Jwøki jïra, a na Jeremaya, beeye en, ena köö, ni «Ciï ni ŋëëmmï dëërï ka abïï ma lïïna,[6] ni dwølï gø dëërï; 'ba kär niï cøta gø yïth pïï.»

²Kanyøgø aana put ŋëëö ka abïï ma lïïna ki køør mana caan Wuuö Jwøki, ni dwøla gø dëëra.

³Ni ö dwør Wuuö Jwøki ni cäŋ ö bääta ri rietge, ni kööe,

⁴ni «Ö maal ni ciï bäät Naam Upareeti ka abïï mana ŋeewï ni iï dwølø enø, ni kanï gø kaace yi kïdi mo okak.»

⁵Køøre aana aay ni kana gø lak Naam Upareeti, kaawat mana caani ya Wuuö Jwøki jïra.

⁶'Ba kanya tïme na køør nïne mo thööth, Wuuö Jwøk aköö jïra, ni «Ö maal ni ciï bäät Naam Upareeti ni lwørï abïï mana caana jïrï na kanï kaace.»

⁷Køøre aana ci bäät Naam Upareeti ni gööla abïï wøk, ni lwøra gø kanya kana gø yie kaace. 'Ba abïïnögø ajooda no oränynyö, ni bäŋ gïn mo kønye këët.

⁸Køøre dwør Wuuö Jwøk aö bääta ni kööe,

⁹ni «Mana ŋøla, a na Wuuö Jwøk, beeye en, aana köö, na ‹Atöör mana dwøŋ mar jø Jerucalem ka atöör mar jø Juuda møga bëët raanynya raanynyø kaawat mana räny abïïnögø.

¹⁰Geni na jøøa reyø, ni wø kweer ki man wïnyge luup 'moa, ni wø bëëdö ni ge caatha køør teek wïc marge, ni wø caath køør juu møøk nee tïnyge ni wøørge geni, ge tïmö ni ge caala abïïnögø ni bäŋ gïn kønye këët enø.

¹¹Kiper ka adïëri møn, kaawat man wø bëët abïï no okïth dhaanhe dëëre ni teek, jø Icriel bëët ki jø Juuda bëët akäla raa, nee bëëtge na jiya, nee nyeŋŋa wïnye, ni jïta ki pwøc ka ajiem ki køørge; 'ba luumma kärge wïnynyö.› » Luummögø caana Wuuö Jwøki.

¹²«'Ba ï na Jeremaya en, caan luummi jïge, ni ‹Luumma caan Wuuö Jwøki, Jwø Icriel, beeye ni dääe bëët doo pääŋö ki køøŋ nyïïomøki.› 'Ba geno kööi, na ‹?Aŋø, kucwa cøøn ni dääe bëët doo pääŋö ki køøŋ nyïïomøki?›

¹³Køøre caanï caanø jïge ni mana ŋøl Wuuö Jwøki beeye en, ena köö, ni ‹Ennø, aani jiy bëët mo wø bëëdö yi ŋöömmi en jääla jäälö, ni tïïa geni kaamar jiy mo ojäŋ ki kwøŋ ni ge meeyø, ni beege nyeye mo wø läw bäät wäl Deebit, ki dïlämme, ki nyïïkuk Jwøk, ki jiy bëët mo wø bëëdö Jerucalem.

¹⁴Ni tïïa geni nee dëëtge nyathge keerge, ni beege jø døøŋŋø ko obwöre bëët. 'Ba aani, cwïnya ba doo pädhö ki gïrge, ni cwïnya ba daa bäädhö ki geni, ni yia ba daa warø ki geni, ni ge ba wiia ki man raanynya geni.› » Luummögø caana Wuuö Jwøki.

¹⁵U na jø Juuda, wïnynyu gïn ni kïthu gø cwïnynyu; käru nou töödö, kiper Wuuö Jwøk mare anø ŋøle.

¹⁶Jiemmu Wuuö Jwøk, Jwøk maru, kanyo poode ni muudhö poot käre kälö, kanyo poot tietu ni poot käru cwanynyø bäät kïte moa en yi muudhö; ni kanyo lääŋŋu tar, eni tar wiile wiilø na muudhö mo cøl, ni tïïc gø na muudhö mo cøl døc.

¹⁷'Ba ni näk luumma ba wïnynyu, aani, a jwöŋö ni kuyu kiper atöör maru. Ni jwöŋa ni yia yaa keeyø døc, ni nyeŋŋa lwanynyi ki pïï, kiper jic Wuuö Jwøk omak ki tøŋ ni käli.

¹⁸'Ba Wuuö Jwøk aköö jïra, ni «Kööï jï nyeya ki menni ma gwanynyø, ni ‹Weyu wälu ni tïmu ni uuna jiy mo ena piny, kiper adun ajiem maru akäl wøk wïthu.›

¹⁹Dhøk kiiri mo päänye mo Nëgëp ocïëgi, ni bäŋe ŋat mo jap ge. Jø Juuda bëët omak ki tøŋ, ni käl ge bëët.

²⁰«Wui, ï na Jerucalem, tïŋ wïïï maal ni raŋï nyïïmän ni ööi ki wï-piny yøø. ?Aŋø, jiyï na cïp jïrï na mïërö na caal pïïth dïëk ocøøa kaa?

²¹?Agïnaŋø no caanï kanyo ö jiyi moa dwätï ki ge noo mooa ge ki teek bäätï? ?Aŋø, ï ba rämö kaamar dhaagø mo ree da mäc lwaar?

²²'Ba ni näk miï köö ki cwïnyï, na ‹?Aperŋø na ö gïnni ni leth en bääta?› beeye kiper raay moï na thööth na tïmï kaamar dhaagø ma abïïne okäl wøk dëëre, ni dööŋe ki dëëre.

²³?Aŋø, løny jï dhaanhø mo cøl ki man wiil kït dëëre? ?A løny jï kwac ki man wiil kït moe? Ni näk moøgø løny, løny jïïu thuwø ki man tïïyu gïn mo beer, u na no oŋïyö ki tïïc gïï mo reyø.

²⁴Kiper manøgønø, ï na Jerucalem, jiy moï okeetha kaamar lethø ni wø køøl jame paap.

²⁵Ni man beeye kurï, gïno tïïa dëërï, kiper wïïï awïl ki aani, a na Wuuö Jwøk, ni bëëdï niï ŋäätha luup tööt.

²⁶Kiper manøgønø, aani, ï tïïa tïïö kaamar dhaagø ma abïïne okäl wøk dëëre, ni dööŋe ki dëëre, ni ö laac wïci mare ni joodi.

²⁷Tïïe moï moa näk ec raac ki ge døc na tïïyï kwör lam moa en bäät thuuri ajooda, ni beege luui moï, ki tïk mana en riï, ki käp marï. Wui, ï na Jerucalem, otïmö ni raac jïrï! ?A këël kany mo nyïëdi nø noo bëëdï niï ba waany?»