Read anuak Jeremaya 14 Bible Online

Jeremaya 14 - anuak bible

Jeremaya 14

¹Man beeye dwør Wuuö Jwøk mana caane jïra, a na Jeremaya, kiper luum meel, ena köö,

²ni «Ŋööm Juuda bëëdö ni jwöŋö, ni ö päänye moe ni öölge, ni bëët jiyi ni jwöŋö kiper ŋöömö, ni ö oduuc Jerucalemmi ni tïme ni päl.

³Jøøa kwörge døøŋŋø jø tïïc moge wø jääŋge jääŋŋö baŋ pïï; 'ba kany wø pïïcge yïth aguule, bäŋ pïï mo jootge, ni duuge ni bäŋ pïï yïth agwäyi moge. Ni bëët wïthge ni laay, ni tïm nyeŋge ni law, ni kwaage ceŋge wïthge.

⁴Piny akaaŋŋø kiper na bäŋe køth; ni ö jø puurri ni tïm wïthge ni laay, ni kwaage ceŋge wïthge.

⁵Këël buba ni wø bëëdö paap, kany wø nywøle, nyaare wiie piny, kiper na bäŋe luum.

⁶Na arëëni mo paap cuŋŋö jaak bäät thuuri moa leer, ni ge jwëëyö ni lëëpge onøbøønhnha kaamar guu; ni nyeŋge otal jaak kiper na bäŋe luum.»

⁷Wui Wuuö Jwøk, këël na bëët raayi mowa ni nyootha bääyö marwa, køny waani ki køør nyeŋŋï. Waani møn, gïïa gaawa wøk ki ge thööth, ni wa bääö dëërï.

⁸Wui, ï ni wø ŋääth jø Icrielli, ï ni wø piem waani cäŋ gïïa leth, ?aperŋø ni bëëdï kaamar wëëllö yi ŋöömmi en? ?Na aperŋø ni bëëdï kaamar ŋat mo tiere ena jöö mo gää baŋ niine keere en?

⁹?Aperŋø ni bëëdï kaamar dhaanhø mo wïïe ocuŋŋö en? ?Na aperŋø ni bëëdï kaamar oteen leny mo ba løny ki man kunynye en? 'Ba ŋäcwa, ni ï na Wuuö Jwøk, ï poot ena yïthakicwa, ni wa cwøla ri nyeŋŋï; kär wa weyï.

¹⁰'Ba mana løk Wuuö Jwøki kiper jøøi ii beeye en, ena köö, ni «Jøøi ii, ge mëër ka wïïrö køør juu møøk, ni dëëtge kärge mänö ki wääth køørge. Kiper manøgønø, ge ba jïëa, a na Wuuö Jwøk, ni ennø, bääyö marge bëëdö ni ŋääa, ni jääla geni kiper raay moge.»

¹¹Ni kö Wuuö Jwøki jïra, ni «Kär niï lämö kiper jööt dëël mar jøøi ii.

¹²Këël ge doo wödö ki cam, oduuc kwac marge ba daa wïnynyö, ni këël ge doo cïpö ko olämme mo wø waaŋ bäre, ki muuce mo beel, ge ba daa jïëö; 'ba beeye ki man dïïra wïthge ri leny, ki käc, ki täwe mo leth.»

¹³'Ba aløøa ni kööa, ni «Wui, Kwäärö Wuuö Jwøk, neenï, nyïïkuk Jwøk moge wø köö jïge ni ïïna köö, ni ‹Bäŋ leny ki käc mo pïï dëëtu, 'ba u mooa mooø ki bëët-mëër ma adïëri kany.› »

¹⁴Ni kö Wuuö Jwøki jïra, ni «Nyïïkuk Jwøk moøgø, luup mo wø køpge ki nyeŋŋa, køpge ka wïthge, ni beege luup tööt. Geni, ge ba jääŋŋa aani, ni ge ba köömma aani, naa kär cäänö ki geni. 'Ba ge køpa luup tööt ki køør lääk moge, ki luup adïëda mo bäŋ gïn kønyge, ki cwøk mo käla wïthge keerge.

¹⁵Kiper manøgønø, mana ŋøla, a na Wuuö Jwøk, beeye en: Nyïïkuk Jwøk moøgø ni wø køp luup ki wïthge yøø ki nyeŋŋa, këël na bëëde ni ge ba jääŋŋa aani, ni ge köö, ni ‹Leny ki käc ba doo pïï yi ŋöömmi en,› nyïïkuk Jwøk moøgø wïthge dïdö ri leny ki käc.

¹⁶Ni ö jø wø køpge luup jïge ni thøwge ri leny ki käc, ni leeŋ dëëtge wøk dï uutjïëthe mo Jerucalem, ni beege geni ki dëëtge, ki määrge, ki wäätge, ki nyïïge bëët, ni bäŋe ŋat mo koony geni, naa dwøga raay moge wïthge.

¹⁷«'Ba ï na Jeremaya en, caan pänh cwïny marï jïge, ni kööï, «ni ‹Beerra man lwör pï nyeŋŋa piny ki wärre ki cääŋŋe, ni ba cöök, kiper jø powa na caal nyakøø mo dëër dïcwøø poot kuue ajïtö ki ŋwellø mo leth, kaamar dhaanhø mo opwödö døc.

¹⁸Ni kany wø cøøa yie jaak töök paac, a joota jiy mo onääö ri leny! Ni kany wø cøøa pääny, a joota jiy mo onäk käci! Ni ö nyïïkuk Jwøki ki dïlämme ni bëëtge ni ge wïïrö kwör mo kucge.› »

¹⁹?Wui Wuuö Jwøk, aŋø, jø Juuda akwierï møn na bäre bäre? ?Aŋø, ïïna put männö ki pääny marge ma Dhayan møn? ?Aperŋø ni caannï waani en, ni tïme ni ba løny ki man døø bëëtö marwa kare en? Waana bëëdö ni wa koora bëët-mëër, 'ba bäŋ gïn mo beer mo oöö; ni koorwa døøn paac kare, 'ba ennø, atïmö ni nuta lwär keere.

²⁰Wui Wuuö Jwøk, rääö marwa ajïëcwa, këël raay moa tïïc wëëkwa, kiper waana bääyö dëërï, wa bëët.

²¹Kär wa jarï, kiper nee nyeŋŋï ba ränynye; kär niï tïïya kar ajiem wälu marï nee jøøŋŋe; 'ba beerra man lääŋŋï luumma tuutï ki waani, ni ba raanynyï gø.

²²?Aŋø, ki røk juu mo oballe jaak mo wïth juurre, dagø dïge mo løny ki man jääŋ køth? ?A løny ki man ö maalli keere ni pädhe ki køth? Wui Wuuö Jwøk, Jwøk marwa, aŋø, paa ï keerï ni wø jääŋ køth? Kiper manøgønø, waani, wa bëëdö ni wa ŋäätha ïïni, kiper beeye ïïni na tïïc japøgø bëët.