Read anuak Jeremaya 15 Bible Online

Jeremaya 15 - anuak bible

Jeremaya 15

¹'Ba Wuuö Jwøk aköö jïra, a na Jeremaya, ni «Këël Modhe ki Camiel doo cuŋŋö nyïma ni kwaacge aani kiper jøøi ii, cwïnya ba daa løøa baŋge. Riem geni wøk nyïma, nee aacge.

²'Ba kanyo pëënyge ïïni, ni ‹?Wa ciwa kaa ŋø?› wär caanï jïge ni mana ŋøl Wuuö Jwøki beeye en, ena köö, «ni ‹Jøøa näk marge thøø, othøw; ni jøøa näk marge ŋaal, oŋaal; ni jøøa näk marge käc, onäk käci; ni jøøa näk marge mäk ki tøŋ, omak ki tøŋ.›

³«Ni mana ŋøla, a na Wuuö Jwøk, beeye naa kännö ki teeŋ gïïpinyi aŋween mo raanynya geni, ni beege opëëlle mo ŋaal ge ki ge, ki guu mo tuuda dëëtge wøk ni cama geni, ki wec maal ki lääc paap mo cam geni ni raanyge geni.

⁴Geno tïïa nee tiet mïëri bëët mo bäät piny tïmge ni cwïnyge böö ki gïïo tägi dëëtge, ni beeye kiper gïna raac na tïïc Maneeca wär Edhekaya yi Jerucalem kanya bëëde na nyeny Juuda.

⁵«?Wui, u na jø Jerucalem en, aŋa noo cwïnye pädhi ki gïru? ?Na aŋa noo kïmmi kiperu? ?Na aŋa noo gää baŋu nee jööt dëël maru pëënynye?

⁶Uuni, aana weyu, a na Wuuö Jwøk, ni bëëdu nou døøa ŋäthu. Kiper manøgønø, u jääla jäälö ni raanynya uuni; aana jøøm ni cwïnya ba wara ki uuni këët.

⁷Uuni, u kwøra kwørø kaamar lethø, ni cööra u wøk ki dhøk kiiri; thøø okäla bäätu, ni raanynya uuni, u na jiya; kiper cwïnynyu käru løø ki jöör bëëtö maru na raac.

⁸Määr thuunhnhi otïïa ni thööth ni kaala nyeŋ akwöny deŋ näpa døøŋŋø; aani, a känna bäät mëëk wøpe ki jiy mo raanynya geni ki dhöör dïcäŋ. Ki nyi kany mo thiinh, kïmmö ki lwär okäla bäätge.

⁹Dhaaŋŋa näk onyöötö ki wääte abïriiø odwat ki dööŋ can, ni tïme ni jwïëy mare teek; ni bëët cäŋŋi no opädhö ki baŋe kanyo poode na dïcäŋ. eno bëëdö ni wïïe laay ni bëët waŋe ni law. 'Ba aani, jiy mo obøth ki thøø cïba ceŋ nyïïmän moge nee 'näk.» Luummögø caana Wuuö Jwøki.

¹⁰?Wui, aŋø ni ö mera ni nywøl aani yi pinyi en, ni tïma ni aana ŋat pïëm yi paani bäre en? Bäŋ ŋat mo omäyö baŋa ki jammi maa pïïdö ki gø, ni bäŋ ŋat mo aano mäyö baŋe ki jammi mo pïïdö ki aani, 'ba jiy bëët, ge bëëdö ni ceenna aani.

¹¹'Ba aløk Wuuö Jwøki jïra, ni «Ka adïëri møn, ïïni, ï mooa mooø ki teek kiper tïïe mo perge leth; ka adïëri møn, aani, nyïïmän moï otïïa ni kwaacge ïïni kanyo täk gïï mo lethi dëëtge.

¹²«?Aŋø, da ŋat mo løny jïre ki man toor nywïënyö mo teek mo käli ki jï løø wï-piny?[7]

¹³U na jiya, jap kwärö mou ki jammi moa perge leth ocïba jï nyïïmän nee twier kaamar jammi mo bäŋ gätge, ni beeye kiper raay mou na thööth na tïïyu yi paani en bäre.

¹⁴Aani, u cïba ceŋ nyïïmän mou, ni tïnynyu geni paac mo kuyu, kiper wëër mara na liel na wääŋö kaamar maac käla bäätu.»

¹⁵Wui Wuuö Jwøk, ï ni wø ŋäc jammi bëët, lääŋ aani ni luuï wïïï baŋa; cool kwöra dëët jø wø caan aani. Ki køør cïp cwïny marï piny, kär a weyï naa käl; beerra man ŋäyï gø na ajaany wø jwøra jwørø ki køørï.

¹⁶Kanya ö luupï baŋa, amwønya yia, ni cïpge ki met cwïny jïra, ni mïn yia, kiper a wø cwøla ri nyeŋŋï, ï na Wuuö Jwøk, Jwø wïth jammi bëët.

¹⁷Aani, a kär dwätö ki jø wø bëën kwääk jaak, naa kär bëëdö ni yia met kaawat marge; 'ba kiper cerï ena bääta, aani, aana bëëdö a keera, kiper aana tïïyï nee cwïnya ränynye kiper gïïa tïïcge.

¹⁸?Aŋø ni ba cuŋ pänh cwïnynyi mara en? ?Na aŋø ni bëët pänh cwïnynyi mara ni ba døø piny ni bëëdö kaamar atwøda mo ba caŋŋi en? ?Aŋø, ïïna tïmö kaamar waŋ naam mo nëëni kee yie da pïï, mo noo cøø, bäŋ pïï yie?

¹⁹'Ba mana løk Wuuö Jwøki jïra beeye en, ena köö, «Ni näk ma acaara manøgø wiilï wiilø, aani, ï dwøga bäät tïïc marï, ni tïnynyï aani. Ni näk miï jiera moa perge leth ni weyï moa no oballe, ïïni, ï bëëdö na kar dhøk mara. Ni ö jiyi ni luuge rege baŋï, 'ba ï ba doo luga baŋge.

²⁰'Ba aani, ï tïïa tïïö kaamar kiir mo teek mo tïïc ka nywïënyö ma jwïël ki jï jøøgø. Ni këël ge doo këëdö ki ïïni, ï ba böötge, kiper a ena buutï naa peemma ïïni, ni käla ï wøk ceŋge.

²¹Aani, ï käla wøk ceŋ jøøa reyø møn, naa piema ïïni ceŋge, ge ni wø tïïö ki gïï mo reyø dëët jiy.» Luummögø caana Wuuö Jwøki.