Read anuak Jeremaya 17 Bible Online

Jeremaya 17 - anuak bible

Jeremaya 17

¹Wuuö Jwøk aköö, ni «Raay mo jø Juuda onieŋ cwïnyge kaamar gööre mo ogöör bäät kïdi mo göör ka peen nywïënyö mo dhee beth, ni raacge onieŋ bäät tuk gïï wø cïpge olämme moge bäätge.

²Geni, gïï wø cïpge olämme moge bäätge, ka arïëki moge mo wø cwøl na Acara, na en tiet jenni moa näk onigïït piny bäät thuuri, wø lääŋge lääŋŋö, ni caala man wø lääŋge obwöre moge.

³Wui, u na jø Juuda, aani, kïnna na en dï pwöla,[8] ki jap kwärö mou, ki jammi mou bëët moa perge leth, ki kwör lam mou moa en bäät thuuri otïïa nee twier kiper raay moa tïïyu dï paac bäre.

⁴Ki køør raay moa tïïyu, ŋöömö mana näk thööŋŋu na cïba jïïu, uuno käl wøk yie, ni tïïa uuni nee nyïïmän mou tïnynyu yi ŋöömö mo kuyu, kiper wëër mara na näk wääŋö kaamar maac atugu, nee bëëde ni liel na bäre bäre.»

⁵Man beeye luumma caan Wuuö Jwøki, ena köö, na «Acïëni ena bäät ŋat wø ŋääth dhaanhø, ni tïïc dhaanhø na teek mare, ni cwïnye ogaa wøk køør Wuuö Jwøk.

⁶Kiper eni tïmö ni caala abuŋŋö mo ena dïtëën, ni kanyo ö gïna beerri, ba joode. 'Ba eno bëëdö dïtëën kany ma cäŋ keere, yi ŋöömö mo yie da acäbö mo ba løny ki beet.

⁷«'Ba gwïëth ena bäät ŋat wø ŋääth Wuuö Jwøk, ni ŋäädhe mare ena dëër Wuuö Jwøk.

⁸Kiper eni tïmö ni caala jaath mo opiith lak naam, ni wø lweete këët piny, ni bäŋ gïn mo lwääre kany wø lëënh pinynyi; 'ba bøøge moe bëëdö ni marr jaak, ni bäŋ gïn lääŋŋe kiper yïth cwiiri mo meel, ni eni ba kääŋi ki man nyööte ki nyïëdi.»

⁹Cwïny dhaanhø yie da cwøk mo kaala jammi bëët, ni rääye okadhø døc; ?Aŋa noo ŋäc acaac gø?

¹⁰«Beeye aani na Wuuö Jwøk ni wø neen cwïny dhaanhø, ni wø raŋ acaac dhaanhø thuwø, ni ŋati man nø cunna cunnö ki køør uutjïëth bëëtö moe, ki køør tïïe moe ni wø tïïe.»

¹¹Ŋat wø jïti ki jap kwärö ki øtjöö mo patha kare, eni caala ajwiero mo buta bäät tøŋ møøk mo patha moe na leeŋ piny. 'Ba kanyo tïme na thäk nïr cwiiri moe, kwärö manøgø aay cere; 'ba noo tïme na aŋuudi, put ka ŋäc ni tïïc mana tïïe beeye tïï bøøl jaak.

¹²Kar wäl ajiem na kare dwøŋ cøøn wïlöölö, beeye kar lam marø na en kur keere.

¹³Wui Wuuö Jwøk, ï ni wø ŋääth jø Icrielli, jiy bëët mo wø wec ïïni wïthge olääy. Ni jiy mo wø gaa wøk ki øtjöörï nyeŋge ogöör piny yi tør, kiper na wecge ï na Wuuö Jwøk, ï na näk jøøro mar pï kwøw.

¹⁴Wui Wuuö Jwøk, dwøk dëëra kare, nee dëëra jöönne; ni piemï aani, naa jïta ki køny; kiper bee ï ni wø pøøya.

¹⁵Neenï, ge wø köö ki aani, ni «?Luumma caan Wuuö Jwøki otäge wäne? Beerra man täge ennø.»

¹⁶'Ba aani, a kär kweer ki man tïïa tïï dïkwääc jiy mana cïpï jïra, naa kär bëëdö ni ge yaa päc gïï mo leth cäŋ gïïo leth; kiper ï ki dëërï, luup moa ö wøk ki dhaa nyïmï ŋäyï.

¹⁷Kär dëëra wëëk kwanynyi nyïmï, kiper beeye ïïni na kar kan røk jïra kany wø pïïc gïï mo lethi bääta.

¹⁸Beerra man lää wïth jø wø 'caan aani, 'ba beerra man ba lää wïïa; beerra man tïm dëëtge ni kwanynyi ki lwär, 'ba beerra man ba tïm dëëra ni kwanynyi. Beerra man kälï cäŋ gïï mo leth bäätge, ni raanynyï geni ka aranya mo raac døc.

¹⁹Luumma caan Wuuö Jwøki jïra beeye en, ena köö, ni «Ciï ni cuŋŋï dhi kiir mana näk mar jøw bëët, man wø cääth nyeye mo Juuda ki yie; ni cuŋŋï thuwø dhøgi bëët mo kiir mar Jerucalem.

²⁰Ni kööï jïge, ni ‹Wïnynyu luum Wuuö Jwøk, u na nyeye mo Juuda ki jø Juuda bëët, ki jiy mo wø bëëdö Jerucalem bëët, mo wø cäädhi ki dhøgi mo kiir man.

²¹Luumma caan Wuuö Jwøki beeye en: Gwøgu dëëtu, ni ba käädu ki tëër ki cäŋ jwömö; ni ba kännu ki tëër nou cura dhøk kiir mar Jerucalem.

²²Ni ba kïthu wøk ki tëër ki yïth uudi mou cäŋ jwömö, ni bäŋe tïïc mo tïïyu; 'ba gwøgu cäŋ jwömö nee bëëde ni ena kur keere, kaawat mana köömma kwäyu.

²³'Ba kwäyu, mara kärge wïnynyö, ni kärge ïthge ciiø ki dwøra. 'Ba wïthge adøøcge mo teek, ni kärge pwöc mara wïnynyö ni kärge gø jïëö.

²⁴'Ba uuni, ni näk mo mara wïnynyu wïnynyö na kare, ni ba käädu ki tëër nou cura dhøk kiir man ki cäŋ jwömö, 'ba u gwøga cäŋ jwömö nee bëëde ni ena kur keere na mar Jwøk, ni bäŋe tïïc mo tïïyu dïcäŋögø,

²⁵nyeye mo opï piny bäät wäl Deebit dunynyö ki dhøk kiir mar pääny man, geni ki jø kööre moge, ni ge cäädhi ka bäät okwëënyi, ni møøk cäädhi ka jïëthe mo wø tut okwëënyi, ni ge cäädhi ki jø wø bëëdö Jerucalem ki dï Juuda bäre. Ni ö päänynyi man ni tïme na kar bëëtö na bäre bäre.

²⁶Ni ö jiyi ki yïth päänye mo Juuda, ki yïth mïëri moa en deŋ Jerucalem, ki yi ŋööm Benjamen, ni ge ööi ka yi ŋöömma näk ree ee päärö, ki yïth mïëri moa en bäät kïte, ki kanya cwøl ni Nëgëp, ni ge käädö ko olämme mo wø waaŋ bäre, ki teeŋ olämme møga, ki muuce mo beel, ki gïn wø jïye ŋwääi ni met, ni känge thuwø ko olämme mo dwøk met ec yi øt Wuuö Jwøk.

²⁷'Ba ni näk mara ba wïnynyu ki man gwøgu cäŋ jwömö nee bëëde ni ena kur keere na mar Jwøk, ni curu dhøk kiir mar Jerucalem nou käädö ki tëër ki cäŋ jwömö, aani dhøk kiir mar Jerucalem nyeba nyebø ki maac mo ba løny ki bïp, ni put kwöra no ogeerø ni teek bëët dï Jerucalem waaŋ.› »